پرەزيدەنت قاتاردىڭ سىرتقى ىستەر مينيسترىمەن كەزدەستى

قاسىم-جومارت توقاەۆ قوناقجايلىق كورسەتكەنى ءۇشىن قاتار مەملەكەتىنىڭ پرەمەر-مينيسترىنە العىس ايتتى. سونىمەن بىرگە قازاقستان مەن قاتار اراسىنداعى قارىم-قاتىناستى جوعارى باعالايتىنىن اتاپ ءوتىپ, بۇگىن قول جەتكىزگەن كەلىسىمدەر سەرىكتەستىكتى جاڭا دەڭگەيگە كوتەرۋگە تىڭ سەرپىن بەرەتىنىنە سەنىم ءبىلدىردى.

«وسى ساپاردى دايىنداۋعا اتسالىسقانىڭىز ءۇشىن سىزگە شىن جۇرەكتەن ريزاشىلىعىمدى بىلدىرگىم كەلەدى. ساپار شىنىمەن ءساتتى بولدى. ءبىزدىڭ قارىم-قاتىناسىمىزعا تىڭ سەرپىن بەرەتىن قۇجاتتار توپتاماسىنا قول قويىلدى. جوعارى مارتەبەلى قاتار امىرىنە ايتقانىمداي, ءبىز ءوزارا بايلانىستاردى ەكى ەل اراسىنداعى ستراتەگيالىق سەرىكتەستىك دەڭگەيىنە كوتەردىك. بۇل وتە ۇلكەن جەتىستىك دەپ سانايمىن. مەن وسىنداي ناتيجەگە قول جەتكىزگەنىمىزگە قۋانىشتىمىن. بىراق ءبىز مۇنىمەن شەكتەلىپ قالماي, العا قادام باسىپ, ءوزارا ىنتىماقتاستىقتىڭ جاڭا مۇمكىندىكتەرىن قاراستىرۋىمىز كەرەك», دەدى قازاقستان پرەزيدەنتى.

قاسىم-جومارت توقاەۆتىڭ ايتۋىنشا, ەكونوميكالىق بايلانىستار بىرلەسكەن كۇش-جىگەردىڭ نەگىزگى تىرەگىنە اينالۋعا ءتيىس.

قاتار پرەمەر-ءمينيسترى ساپارمەن كەلگەنى ءۇشىن قازاقستان پرەزيدەنتىنە العىس ايتىپ, سوڭعى جىلدارى مەملەكەتتەر اراسىنداعى ەكىجاقتى قاتىناستاردىڭ ايتارلىقتاي جاندانعانىن اتاپ ءوتتى.

ء«بىز سوڭعى جىلدارى بۇرىن-سوڭدى بولماعان جانە ايتارلىقتاي جەتىستىكتەرگە قول جەتكىزدىك. ءوزىڭىز ايتقانداي, بۇل ءوز-وزىنەن بولا سالعان دۇنيە ەمەس. ودان دا ۇلكەن جەتىستىكتەرگە جەتۋ ءۇشىن جۇمىستى جالعاستىرۋ قاجەت. ەلدەرىمىز اراسىنداعى قارىم-قاتىناستاردىڭ ستراتەگيالىق سەرىكتەستىك دەڭگەيىنە كوتەرىلگەنىنە وتە قۋانىشتىمىن. ەكى ەلدىڭ مول الەۋەتى بار دەپ سانايمىز», دەدى شەيح مۇحاممەد بەن ابدۋلراحمان ءال ءتاني.

قازاقستان پرەزيدەنتى ەكى ەل ۇكىمەتتەرىن ساۋدا-ساتتىق قارقىنىن ارتتىرۋ ءۇشىن ناقتى ەكونوميكالىق ماسەلەلەرگە نازار اۋدارۋعا شاقىردى.

قاسىم-جومارت توقاەۆ «ورتا ءدالىز» رەتىندە تانىمال ترانسكاسپي حالىقارالىق كولىك باعىتىن دامىتۋعا زور ءۇمىت ارتىپ وتىرعانىنا توقتالدى. سونداي-اق شىعاناق ايماعىنىڭ ۇلكەن نارىعىنا كەڭ جول اشۋعا جانە جاڭا ترانزيتتىك باعىتتاردى قاراستىرۋعا باسا ءمان بەرەتىنىن جەتكىزدى. مەملەكەت باسشىسى قاتار كومپانيالارىن قازاقستانداعى ءىرى ينفراقۇرىلىمدىق جوبالاردى بىرلەسە جۇزەگە اسىرۋعا شاقىردى.

سونىمەن قاتار كەلىسسوز بارىسىندا اۋىل شارۋاشىلىعى, تسيفرلاندىرۋ, ەنەرگەتيكا سالالارىنا قاتىستى وزەكتى ماسەلەلەر تالقىلاندى.