سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى «استانا جاستارى» جاستار رەسۋرستىق ورتالىعىندا بولدى. ەلىمىزدەگى جاستار ساياساتىنىڭ وزەكتى ماسەلەلەرى تالقىلاۋدىڭ نەگىزگى تاقىرىبى بولدى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
«جاستاردى جۇيەلى جانە جان-جاقتى قولداۋ ماسەلەسىندە بىرقاتار پروبلەما بار. جۇمىسسىزدىق, جاستاردىڭ بەيرەسمي جۇمىس ىستەۋى جانە ۋاقىتشا جۇمىس ورىندارى سولاردىڭ قاتارىنا جاتادى. وكىنىشكە قاراي, ءبىزدىڭ قولىمىزدا بۇل تۋرالى ناقتى دەرەكتەر جوق. جالپى وسى ماسەلەلەردىڭ ءبارىن جان-جاقتى قاراستىرىپ, ماڭىزدى ۇسىنىستار ازىرلەۋ قاجەت», دەدى سەناتور نۇرتورە ءجۇسىپ كەزدەسۋ بارىسىندا.
مادەنيەت جانە اقپارات مينيسترلىگىنىڭ وكىلى وسىعان بايلانىستى جاستاردىڭ الەۋمەتتىك جانە جەكە دامۋىنا ىقپال ەتەتىن, جاستار ۇيىمدارىنىڭ قىزمەتىن قولدايتىن, سونداي-اق اقپاراتتىق جانە كونسۋلتاتسيالىق قىزمەتتەر كورسەتەتىن جاستار رەسۋرستىق ورتالىقتارىنىڭ قىزمەتى تۋرالى ايتىپ بەردى. ەلىمىزدىڭ بارلىق وڭىرلەرىندە وسىنداي 232 ورتالىق جەلىسى جۇمىس ىستەيدى, ونىڭ ىشىندە 16 وبلىستىق, 37 قالالىق, 179 اۋداندىق ورتالىق بار.
وتىرىسقا ەڭبەك جانە حالىقتى الەۋمەتتىك قورعاۋ, عىلىم جانە جوعارى ءبىلىم, تۋريزم جانە سپورت مينيسترلىكتەرىنىڭ وكىلدەرى, سونداي-اق دەنساۋلىق ساقتاۋ جانە جاستار ساياساتى سالاسىنداعى ساراپشىلار قاتىستى.
بۇل كەزدەسۋ «دەموگرافيالىق ءوسۋ – ۇلتتىڭ باسەكەلەستىك ارتىقشىلىقتارىنىڭ نەگىزى» تاقىرىبىنا ارنالعان ۇكىمەتتىك ساعاتقا دايىندىق اياسىندا ۇيىمداستىرىلدى.