فرانتسيانىڭ مونپەلە قالاسىندا تەننيستەن جۇلدە قورى 579 320 ەۋرونى قۇراعان «اتر 250» ءتۋرنيرى اياقتالدى. فينالدىق سايىستا قازاقستاننىڭ ءبىرىنشى راكەتكاسى الەكساندر بۋبليك حورۆاتيالىق بورنا چوريچپەن كۇش سىناستى.
بۋبليك فينالعا دەيىن كانادالىق دەنيس شاپوۆالوۆ (№137), جۋىردا عانا قازاقستان ازاماتتىعىن العان الەكساندر شەۆچەنكو (№59) جانە ۇيەڭكى جاپىراقتارى ەلىنىڭ تاعى ءبىر وكىلى فەليكس وجە-الياسسيمنەن (№30) ايلاسىن اسىردى. ال شەشۋشى كەزدەسۋدىڭ العاشقى سەتى بورنا ءچوريچتىڭ جەڭىسىمەن اياقتالسا, قالعان ەكەۋىندە الەكساندر بۋبليك باسىمدىق تانىتىپ, باس جۇلدەنى ولجالادى. ەسەپ – 5:7, 6:2, 6:3. وسى تابىسى ارقىلى ول 88 125 ەۋرونى ەنشىلەدى.
بۇل كۇندەرى دۋبايدا تۇرىپ جاتقان 27 جاستاعى زاگرەب قالاسىنىڭ تۋماسى ب.چوريچ ءوزىنىڭ سپورتتىق مانسابىندا اتر تۋرنيرلەرىن ءۇش رەت ۇتتى. 2019 جىلى اۋستراليانىڭ اشىق بىرىنشىلىگىنىڭ ءتورتىنشى كەزەڭىنە دەيىن جەتسە, 2020 جىلى «US Open» دوداسىنىڭ شيرەك فينالىندا وينادى. بەس رەت رولان گارروستىڭ ءۇشىنشى اينالىمىندا ونەر كورسەتتى. وسىدان بەس-التى جىل بۇرىن بورنا الەمدىك رەيتينگتە 12-ورىنعا دەيىن كوتەرىلگەن. قازىرگى كەزدە ول 37-ساتىعا تۇراقتادى.