پرەزيدەنت قاسىم-جومارت توقاەۆ «قازاتومونەركاسىپ» ۇلتتىق اتوم كومپانياسى» اق باسقارما توراعاسى مەيىرجان يۋسۋپوۆتى قابىلدادى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
مەملەكەت باسشىسىنا «قازاتومونەركاسىپتىڭ» بىلتىرعى اتقارعان جۇمىستارىنىڭ ناتيجەسى تۋرالى ەسەپ بەرىلىپ, كومپانيانىڭ قىسقا مەرزىمدى جانە ورتا مەرزىمدى پەرسپەكتيۆاعا ارنالعان ماقساتتارى مەن جوسپارلارى تانىستىرىلدى.
پرەزيدەنتكە وتكەن جىلدىڭ قورىتىندىسى بويىنشا ۋران ونىمدەرىن ءوندىرۋ كولەمى 21 مىڭ توننادان, ال ساتۋ كورسەتكىشى 18 مىڭ توننادان اسقانى جونىندە باياندالدى. مەيىرجان يۋسۋپوۆتىڭ ايتۋىنشا, 2023 جىلى ترانسكاسپي حالىقارالىق كولىك باعدارى ارقىلى تاسىمالدانعان ۋران ونىمدەرىنىڭ ۇلەسى ايتارلىقتاي ارتقان. قازاقستاننان باتىس ەلدەرىنە جونەلتىلگەن ۋراننىڭ 64 پايىزى وسى ترانزيت ءدالىزى ارقىلى تاسىمالدانعان.
بۇدان بولەك, مەملەكەت باسشىسىنا «قازاتومونەركاسىپ» كومپانيالار توبى جۇزەگە اسىرىپ جاتقان ينۆەستيتسيالىق جوبالار, سونداي-اق ءوندىرىس ورىندارى ورنالاسقان وڭىرلەردى دامىتۋعا جانە قولداۋعا باعىتتالعان الەۋمەتتىك ماڭىزى بار جوبالار تۋرالى مالىمەت بەرىلدى.
سونىمەن قاتار پرەزيدەنتكە مينەرالدىق-شيكىزاتتىق بازانى كەڭەيتۋ جانە تولىقتىرۋ جۇمىستارى تۋرالى ايتىلدى.
كەزدەسۋ سوڭىندا قاسىم-جومارت توقاەۆ «قازاتومونەركاسىپ» جۇمىسىنىڭ تيىمدىلىگىن ارتتىرۋ جونىندە بىرقاتار ناقتى تاپسىرما بەردى.