جىل سايىن الماتى قالاسىندا قولقا قاقپاقشاسى تارىلعان 20-22 ناۋقاسقا وپەراتسيا جاسالسا, وسىنداي حيرۋرگيالىق وپەراتسياعا مۇقتاج ناۋقاستاردىڭ سانى 200-250-گە دەيىن جەتىپ جىعىلادى. وسى ورايدا الماتىداعى كارديولوگيا ورتالىعىندا جۇرەككە جوعارى تەحنولوگيالىق جانە زاقىمى بارىنشا از وپەراتسيا جاسايتىن TAVI ورتالىعىنىڭ اشىلۋىن مەگاپوليس مەديتسيناسىنداعى ىلكىمدى وقيعالار قاتارىنا قوسار ەدىك.
ەندىگى جەردە ەلىمىزدە جۇرەگىنە اشىق وپەراتسيا جاساۋعا بولمايتىن اۋىر ناۋقاستاردى يننوۆاتسيالىق ادىسپەن ەمدەۋگە بولادى. ورتالىقتا تارىلعان قولقا قاقپاقشاسىن جۇرەككە اشىق وپەراتسيا جاساماي-اق, تامىر ارقىلى اۋىستىرۋعا بولادى. «قولقا قاقپاقشاسىنىڭ ستەنوزى» دياگنوزىنا جوعارى تەحنولوگيالىق وپەراتسيانىڭ بۇل ءتۇرى ناركوزسىز جاسالادى ءارى اعزاعا زاقىمى بارىنشا از. قىسقاسى, كوزىمىز ۇيرەنگەن ءداستۇرلى حيرۋرگيامەن سالىستىرعاندا ناۋقاس تەز وڭالادى, اۋرۋحانادا بۇرىنعىداي ۇزاق جاتپايدى. مۇنداي يننوۆاتسيالىق وپەراتسيانىڭ جاسى 70-تەن اسقان جانە ودان ەگدە جاستاعىلار ءۇشىن تيىمدىلىگى جوعارى.
«قولقا قاقپاقشاسىنىڭ ستەنوزى» – ورتا قاقپاقشاسى تارىلىپ, قاجەتىنشە اشىلماعان كەزدە, ياعني جۇرەكتەن دەنەگە قاننىڭ قالىپتى وتۋىنە كەدەرگى كەلتىرەتىن ساڭىلاۋدىڭ قاتتى تارىلۋىنان پايدا بولاتىن كەسەل.
ال ناۋقاستار قالالىق كارديولوگيا ورتالىعىندا جۇرەكتىڭ ۋلترادىبىستىق زەرتتەۋىنەن وتە الادى. بۇعان قوسا جوعارى دەڭگەيدە دياگنوستيكالاۋعا مۇمكىندىك بەرەتىن 128 تىلىمنەن تۇراتىن زاماناۋي كت اپپاراتى بار. كورسەتكىشتەر بويىنشا قاجەت بولعان جاعدايدا پاتسيەنتتەرگە جەدەل حيرۋرگيالىق TAVI (transcatheter aortic valve implantation) وپەراتسياسى جاسالادى.
وسى ارادا TAVI ورتالىعىنىڭ اشىلۋىنا وراي, كارديولوگيا ورتالىعىنىڭ قىزمەتكەرلەرىنە شەبەرلىك ءدارىسىن وتكىزۋ ءۇشىن فرايبۋرگتەن (گەرمانيا) ەندوۆاسكۋليارلىق حيرۋرگيا ديرەكتورى فرانتس-يوزەف نەيمان ارنايى شاقىرتىلعانىن ايتا كەتكەن ءجون.
قالالىق كارديولوگيا ورتالىعىنىڭ ديرەكتورى, مەديتسينا عىلىمدارىنىڭ دوكتورى, پروفەسسور روزا قۋانىشبەكوۆا: «قولقا قاقپاقشاسى تارىلعان پاتسيەنتتەرىمىز ءبىزدىڭ ستاتسيونارعا قايتا-قايتا ءتۇسىپ جاتادى. ال كونسەرۆاتيۆتى ەم-دوم بارلىق كەزدە ءتيىمدى بولا بەرمەيدى. TAVI ءادىسىن قولدانۋ جانە وعان قوسا TAVI ورتالىعىنىڭ اشىلۋى – دەنساۋلىق ساقتاۋ جۇيەسىندەگى ماڭىزدى وقيعا. پاتسيەنتتەرگە دە ايتارلىقتاي پايداسى كوپ. ءداستۇرلى وپەراتسيا جاسى كەلگەن, ەگدە جاستاعى پاتسيەنتتەر ءۇشىن تىم قاۋىپتى. ال بۇل وپەراتسيادان كەيىن ناۋقاس تەز وڭالادى ءارى اسقىنۋ ىقتيمالدىعى از. TAVI وتاسى قولقا قاقپاقشاسى ستەنوزىنىڭ اۋىر تۇرىنە دۋشار بولعان جانداردىڭ دەنساۋلىعىن ايتارلىقتاي جاقسارتادى. سونداي-اق TAVI ورتالىعى كارديوحيرۋرگيا سالاسىنداعى ماڭىزدى مەديتسينالىق زەرتتەۋلەردى دامىتۋعا, ارنايى مامانداردى دايارلاۋعا ءوز ۇلەسىن قوسادى», دەيدى.
ورتالىقتا وسى وپەراتسيانى جۇزەگە اسىرا الاتىن, ۇلتتىق عىلىمي كارديوحيرۋرگيا ورتالىعىنىڭ ماماندارى ماشىقتاندىرعان گەرمانيا مەن تۇركيا كلينيكالارىنىڭ جەتەكشى دارىگەرلەرىنەن ءبىلىم العان قىزمەتكەرلەر بار.
«TAVI پروتسەدۋراسى سانداعى كۇرەتامىر ارقىلى باراتىن كاتەتەر ارقىلى جۇزەگە اسىرىلادى. كاتەتەر جاڭا كلاپاندى قالاعان جەرگە جەتكىزىپ, وندا ول تارىلعان كلاپاندى اشىپ, اۋىستىرادى. بۇل ۇدەرىس ناركوزسىز جاسالادى جانە جۇرەككە اشىق وپەراتسيا جاساۋدى قاجەت ەتپەيدى, قان اعىمىن قالپىنا كەلتىرۋگە مۇمكىندىك بەرەدى. ال مۇنىڭ بارلىعى ءبىر جەردەن تابىلۋى ناۋقاستىڭ ماسەلەسىن جەدەل شەشۋگە مۇمكىندىك بەرەدى», دەيدى قالالىق كارديولوگيالىق ورتالىقتىڭ رەنتگەن حيرۋرگياسى ءبولىمىنىڭ مەڭگەرۋشىسى ورازبەك ساحوۆ.
ەندوۆاسكۋليارلىق حيرۋرگيا ديرەكتورى فرانتس-يوزەف نەيمان ءوز ەلىندە قولقا قاقپاقشاسىن اۋىستىرۋ وپەراتسياسى ءجيى جاسالىناتىنىن, TAVI يمپلانتى وتە دامىعانىن, گەرمانيا وسى وتانى جۇرگىزۋ جاعىنان ەۋروپادا الدىڭعى ورىنعا يە ەكەنىن ايتادى.
ال 2 ميلليوننان اسا حالقى بار مەگاپوليسكە دە وسىنداي ءبىر ورتالىق اسا قاجەت ەكەنى ايتپاسا دا تۇسىنىكتى. سوندىقتان بۇل جوبا ءمامس پەن تمككك اياسىندا اتقارىلعانىن ايتا كەتكەن ءجون. ەڭ باستىسى, الماتى ايماقتاردان كەلگەن ناۋقاستاردى دا اجالدان اراشالاپ قانا قويمايدى, بۇل جەردە مايتالمان ماماندار تاجىريبە الماسا وتىرىپ, مەديتسينانى دا دامىتۋعا بولادى.
الماتى