قۇرىلىس سالاسىنداعى زاڭسىزدىق كۇش الىپ بارادى. سوڭعى 3 جىلدا 45 قىلمىستىق ءىس قوزعالعان جانە 4700-دەن استام ۇلەسكەر زارداپ شەگىپ وتىر. سەناتور گەننادي شيپوۆسكيح ءوزىنىڭ دەپۋتاتتىق ساۋالىندا قۇرىلىس ۇيىمدارىمەن جاسالعان شارتتاردىڭ ورىندالماۋى مەن شاعىمدار تۋرالى دەرەكتەردى ۇسىندى, دەپ جازادى Egemen.kz.
سەنات دەپۋتاتى تالاپتى ورەسكەل بۇزىپ, جوسىقسىز قۇرىلىس سالۋشىلاردان زارداپ شەككەندەردىڭ باسىم بولىگى استانادا – 1 282 ادام, قاراعاندىدا – 961 ادام, اقتوبەدە – 657, اتىراۋدا – 631 جانە الماتىدا – 360 ادام ەكەنىن جەتكىزدى.
2019-2022 جىلدار ارالىعىندا ەلوردادا پروبلەمالىق وبەكتىلەردىڭ قۇرىلىسىن اياقتاۋعا ۇلتتىق قوردان 60 ملرد تەڭگە جانە رەسپۋبليكالىق, جەرگىلىكتى بيۋدجەتتەردەن 154,6 ملرد تەڭگە بولىنگەنىن اتاپ ءوتتى. وسىلايشا, مەملەكەتتىڭ قاتىسۋىمەن ەلوردادا 120 پروبلەمالىق تۇرعىن ءۇيدىڭ قۇرىلىسى اياقتالدى. الايدا بۇگىندە ەلىمىزدە 7 مىڭعا جۋىق الدانعان سالىمشى بار, ونىڭ 4 مىڭنان استامى - استانا قالاسىنىڭ تۇرعىنى.
«سوڭعى ەكى جىلدا قۇقىق قورعاۋ ورگاندارى زاڭسىز قاراجات جيناعانى ءۇشىن 300-دەن استام كومپانيانى اكىمشىلىك جاۋاپكەرشىلىككە تارتىپ, ولارعا 250 ملن تەڭگەگە ايىپپۇل سالىپتى. ياعني, ورتا ەسەپپەن العاندا, ءبىر كومپانياعا 800 مىڭنان ءسال اساتىنداي ايىپپۇل سالىنعان. بۇل دەگەنىڭىز ءبىر پاتەردىڭ 2 شارشى مەترىنىڭ باعاسى عانا. ال كەلتىرىلگەن زالال 30 ملرد تەڭگەدەن استى. ايىپپۇل – 250 ميلليون, زالال 30 ميلليارد. بۇل پارادوكس ەمەس پە؟ ۇلەسكەرلەرگە كەلتىرىلگەن شىعىندار كۇدىكتىلەر ەسەبىنەن تولىق وندىرىلمەي, كوپشىلىگى مەملەكەت تاراپىنان ءوندىرىلىپ جاتىر. وسى ماسەلەنى ەسكەرە وتىرىپ, قۇرىلىس كومپانيالارىنا قويىلاتىن تالاپتار مەن مەملەكەتتىك باقىلاۋدى كۇشەيتۋ قاجەت. قۇرىلىس كومپانيالارىنا ءىس قوزعالعان ساتتە سول كومپانيالاردى جارنامالاپ جۇرگەن ءتۇرلى بلوگەرلەر مەن تانىمال تۇلعالاردىڭ دا جاۋاپكەرشىلىگىن ارتتىرۋ قاجەت», دەپ جازدى گ.شيپوۆسكيح پرەمەر-مينيسترگە جولداعان ساۋالىندا.