31 قاڭتار كۇنى تاڭەرتەڭ الماتى-تاشكەنت-تەرمەز تاس جولىنىڭ جابىق بولىگىندە ءىرى جول اپاتى بولدى. اۆتوكولىكتەردىڭ جينالۋىنا بايلانىستى جول قىزمەتكەرلەرى ىلەسىپ جۇرەتىن كولىكتەر كولونناسىن تاراز-شىمكەنت باعىتى بويىنشا وتكىزۋگە شەشىم قابىلدادى, بىراق اۋا رايىنىڭ قولايسىزدىعى ءىرى اپاتقا سەبەپ بولدى, دەپ حابارلايدى Egemen.kz.
«قازاۆتوجولدىڭ» حابارلاۋىنشا, ساعات 10:45 شاماسىندا اۆتوكولوننانى الىپ ءجۇرۋ كەزىندە الماتى-تاشكەنت تاس جولىنىڭ 567-ءشى شاقىرىمىندا 15-20-عا جۋىق كولىكتىڭ قاتىسۋىمەن ءىرى جول-كولىك وقيعاسى بولدى (ناقتى سانى انىقتالىپ جاتىر).
ءسال بۇرىن بۇل كولىكتەردىڭ وتۋىنە مۇمكىندىك بەرۋ ءۇشىن تاس جول بولىگىندەگى قوزعالىس شەكتەۋلەرى ۋاقىتشا الىنىپ تاستالدى.
وقيعا سالدارىنان 19 ادام, سونداي-اق ءبىر بالا ءارتۇرلى دەنە جاراقاتتارىمەن ب.مومىش ۇلى اۋىلىنداعى اۋداندىق اۋرۋحاناعا جەتكىزىلدى.
«توتەنشە جاعدايلار قىزمەتى قىسىلىپ قالعان ادامداردى شىعارۋ ءۇشىن قۇتقارۋ جۇمىستارىن جۇرگىزىپ جاتىر. زارداپ شەككەندەر جوق. وقيعا ورنىندا جەدەل مەديتسينالىق جاردەم جانە جول قىزمەتى جۇمىس ىستەپ جاتىر. نۇرلىكەنت اۋىلىنداعى «مادەنيەت ءۇيى» جىلىتۋ پۋنكتىنە 39 ادام جەتكىزىلدى, ونىڭ سەگىزى بالا», دەپ حابارلادى جامبىل وبلىسى توتەنشە جاعدايلار دەپارتامەنتى.