27 قاڭتاردا حالىقارالىق تەرروريستىك ۇيىمنىڭ ارەكەتىنە قاتىسى بولۋى مۇمكىن كۇدىكتى, 22 جاستاعى قازاقستان ازاماتى ىستانبۇلدان الماتىعا دەپورتاتسيالاندى, دەپ جازادى Egemen.kz ۇلتتىق قاۋىپسىزدىك كوميتەتىنىڭ ءباسپاسوز قىزمەتىنە سىلتەمە جاساپ.
«تەرگەۋ ماتەريالدارىنا سايكەس كورسەتىلگەن تۇركىستان وبلىسىنىڭ تۋماسى 2020 جىلى سيرياعا كەتىپ, وندا ارەكەتتەگى قارۋلى توپتاردىڭ بىرىنە كىرگەن. ونى ۇستاۋدى جانە وتانىنا بەرۋدى ۇقك تۇركيالىق سەرىكتەستەرىمەن بىرلەسىپ, سونداي-اق قازاقستان رەسپۋبليكاسىنىڭ باس پروكۋراتۋراسى مەن ءىىم-ءنىڭ قولداۋىمەن ۇيىمداستىردى.
ۇستالعانعا قاتىستى ۇقك قىلمىستىق كودەكستىڭ 257-بابىنا سايكەس تەرروريستىك ارەكەتكە قاتىسۋ فاكتىسى بويىنشا قىلمىستىق ىستى تەرگەپ-تەكسەرۋدە. ول سوت سانكتسياسىمەن قاماۋعا الىندى. قاجەتتى تەرگەۋ امالدارى ءجۇرىپ جاتىر.
قر قىلمىستىق-پروتسەستىك كودەكسىنىڭ 201-بابى 1-بولىگىنە سايكەس وزگە اقپارات جاريا ەتۋگە جاتپايتىنى» جازىلعان اقپاراتتا.