سونىعا سالعان سوقپاق

جيىن اياسىندا ۇلت ادەبيەتىنىڭ مارتە­بەسىن وسىرگەن جازۋشى بەردىبەك سوقپاق­باەۆتىڭ قۇندى كىتاپتارى مەن جەكە زاتتارى قويىلعان كوشپەلى كورمەنىڭ تانىس­­تىرىلىمى ءوتتى.

مەرەكەلىك كەشكە الماتى وبلىسىنىڭ اكىمى مارات سۇلتانعازيەۆ پەن جازۋشىنىڭ قىزى سامال سوقپاقباەۆا, جازۋشىلار وداعىنىڭ باسقارما توراعاسى مەرەكە قۇلكەنوۆ, اقىن-دراماتۋرگ, مەملەكەت جانە قوعام قايراتكەرى, مەملەكەتتىك سىي­لىقتىڭ لاۋرەاتى نۇرلان ورازا­لين, ءباسپاسوز ارداگەرلەرى مارات توقاشباەۆ, جاقىپجان نۇرعوجاەۆ, پرە­زي­دەن­ت كەڭەسشىسى مالىك وتارباەۆ, اقىن پارلامەنت ءماجىلىسىنىڭ دەپۋ­تاتى جانار­بەك ءاشىمجان, قوجانىڭ ءرولىن سومداعان اكتەر نۇرلان سەگىزباەۆ قاتىسىپ, قۇتتىق­تاۋ­لا­رىن ارنادى.

ادەبيەتتىڭ قايتالانباس تۇلعاسى بەردىبەك سوقپاقباەۆ ۇلت ادەبيەتىن الەمدىك دەڭگەيگە كوتەرگەن قالامگەرلەرىمىزدىڭ ءبىرى جانە بىرەگەيى, جازۋشىنىڭ قالامىنان تۋعان «مەنىڭ اتىم – قوجا», «بالالىق شاققا ساياحات», «قايداسىڭ, گاۋھار؟», «ولگەندەر قايتىپ كەلمەيدى» سىندى ومىرشەڭ شىعارمالارى بىرنەشە بۋىن ۇرپاقتى تاربيەلەگەنىن الماتى وبلىسىنىڭ اكىمى مارات سۇلتانعازيەۆ تىلگە تيەك ەتتى.

«مەملەكەت باسشىسى ءتول ادەبيەتى­مىز­دىڭ دامۋىنا ەرەكشە كوڭىل ءبولىپ كەلەدى. وسى ورايدا ءبىرتۋار تۇلعا بەردىبەك سوقپاقباەۆتىڭ مەرەيتويىن تۋعان ولكەسىندە جوعارى دەڭگەيدە اتاپ ءوتىپ, جازۋشىنىڭ شىعارمالارىن جانە ونەگەلى ءومىرىن ەل اراسىندا دارىپتەپ, ەسىمىن ۇلىقتاۋ – ءبىزدىڭ ابىرويلى مىندەتىمىز», – دەگەن ءوڭىر باسشىسى جازۋشىنىڭ 100 جىل­­دىق مەرەيتويى اياسىندا ءوزى تۋىپ-وسكەن تاۋلى اۋداندا بىرقاتار ءىس-شارا اتقارىلاتىندىعىن تارقاتىپ ءوتتى.

ەڭ الدىمەن, رايىمبەك اۋدانىنىڭ ورتالىعى – نارىنقول اۋىلىنداعى ورتالىق ساياباققا بەردىبەك سوقپاق­باەۆ­تىڭ اتى بەرىلىپ, جازۋشىنىڭ ەڭسەلى ەسكەرتكىشى بوي كوتەرەتىن بولادى. سونداي-اق وسى اۋىلداعى بەردىبەك سوقپاقباەۆ اتىنداعى مەكتەپ-گيمنازياعا اعىمداعى جوندەۋ جۇمىس­تارىن جۇرگىزۋ, ونداعى جازۋشىنىڭ مۋزەيىن زاماناۋي ۇلگىدە جابدىقتاۋ جانە مەك­تەپ الدىندا ورنالاسقان قالامگەردىڭ ءبيۋس­تىن قايتا جاساۋ سىندى بىرقاتار جۇ­مىس­ جوسپارلانعاندىعىن اتاپ ايتتى.

مەرەيتوي شەڭبەرىندە قالامگەردىڭ تۋعان اۋىلى قوستوبە دە كوز تارتارلىقتاي اباتتاندىرىلىپ, ينفراقۇرىلىمىن جوندەۋ جوسپارلانعان.

ء«بىرتۋار جازۋشىعا قۇرمەت كورسەتۋ تۋعان اۋدانىمەن عانا شەكتەلىپ قال­ماي­دى. ماسەلەن, قالىڭ بۇقارا قولداپ جاتسا, وبلىستىق كىتاپحاناعا بەردىبەك سوق­پاق­باەۆ ەسىمىن بەرۋدى ۇسىنامىن. بۇعان قوسا بيىل ىلە اۋدانىنداعى كوكقاينار اۋىلىندا 1500 بالاعا ارناپ سالىنعان جاڭا مەكتەپكە جازۋشىنىڭ اتىن بەرۋ جونىندەگى ۇسىنىستى قولداپ وتىرمىز.

سونىمەن قاتار كەگەن اۋدانى مەن قوناەۆ قالاسىنداعى ساياباقتارعا قا­لام­­­گەردىڭ ەسىمى بەرىلمەك. ول ساياباق­تار بالالار جازۋشىسىنىڭ اتىمەن اتالا­تىن­دىقتان, سوعان لايىق جاساق­تا­لىپ, ويىن الاڭدارى بار رۋحاني ورتا­لىققا اينالادى.

وبلىس اۋماعىنداعى اۋدان ورتالىق­تارىندا, قوناەۆ جانە الاتاۋ قالا­لارىندا كوشەلەردى جازۋشى ەسىمىمەن اتاۋ بويىنشا باستامالار دا بار. ولارعا جەرگىلىكتى قوعامداستىق مۇشە­لەرى قولداۋ كورسەتەرىنە سەنىمىم مول. بەردىبەك سوقپاقباەۆتىڭ 100 جىلدىق مەرەيتويىنىڭ اياسىندا رۋحاني مۇراسىن دارىپتەۋ جۇمىسىن حالىقارالىق دەڭگەيدە كورسەتۋىمىز قاجەت. بۇل ورايدا اعامىزدىڭ «ولگەندەر قايتىپ كەلمەيدى» رومانى تۇرىك تىلىنە اۋدارىلىپ, تۇساۋكەسەرى «تۇركسوي» حالىقارالىق ۇيىمىنىڭ قولداۋىمەن تۇركيا مەملەكەتىنىڭ استاناسى انكارا قالاسىندا وتكىزۋ جوسپارلانىپ وتىر», – دەدى ءوڭىر باسشىسى مارات ەلەۋسىز ۇلى.

سونىمەن قاتار وبلىس اۋماعىندا ورتا ءبىلىم بەرۋ مەكەمەلەرىنىڭ 5-11 سىنىپ­ وقۋ­شىلارى اراسىندا «مەنىڭ اتىم – قوجا» تاقىرىبىندا رەسپۋبليكالىق شىعارمالار بايقاۋى جانە بالالار جازۋشىلارىنا ارنالعان «بالالىق شاققا سايا­حات» اتتى رەسپۋبليكالىق پروزا بايقاۋى جاريالاناتىندىعى دا جاس بۋىننىڭ جازۋشى شىعارمالارىن جەتە تانىپ, ناسيحاتتالۋىنا سەپتىگىن تيگىزەتىن يگى ءىس سانالادى.

جازۋشىنىڭ ءومىرى مەن شىعارما­شى­لىعىن جان-جاقتى ناسيحاتتاۋ ماقساتىندا استانا قالاسىندا «بەردىبەك سوقپاقباەۆ – بالالار ادەبيەتىنىڭ كلاسسيگى» اتتى كىتاپ كورمەسى وتكىزىلىپ, دەرەكتى فيلم تۇسىرى­لە­تىندىگى دە جان جادىراتارلىق جاڭالىق.

بەردىبەك سوقپاقباەۆتىڭ ۇلت مادە­نيەتى مەن ادەبيەتىنە سىڭىرگەن ۇشان-تەڭىز ەڭبەگىن باعالاۋ بۇل باستامالارمەن عانا شەكتەلمەي, جازۋشىنىڭ شىعار­ماشىلىعىن ناسيحاتتاۋ بولاشاقتا دا جالعاسا بەرەتىندىگىن ايرىقشا اتاعان وبلىس باسشىسى سالتاناتتى شاراعا جيىلعان زيالى قاۋىم وكىلدەرى مەن ءوڭىر جۇرتشىلىعىن ايتۋلى مەرەكەمەن قۇتتىقتادى.

جازۋشىنىڭ قىزى سامال سوقپاقباەۆا بۇل اكەسىنىڭ عانا ەمەس, كوركەمسوزدى قۇرمەتتەگەن قازاق حالقىنىڭ تويى ەكەنىن ايرىقشا اتادى. قالامگەردىڭ 100 جىلدىعى شەڭبەرىندە ەل ىشىندە اتقارىلاتىن جۇمىستار كوپ ەكەندىگىنە, بۇل ورايدا جازۋشى ەڭبەگىن باعالاپ, قولداۋ بىلدىرگەن مەملەكەت باسشىسىنا, اقىن-جازۋشىلار مەن اكىم-قارالارعا ريزاشىلىعىن ءبىلدىردى. ءسوز زەرگەرىنىڭ ۇرپاعىنا القىزىل گۇل شوعى تابىستالىپ, قۇرمەت كورسەتىلدى.

اسپانتاۋ اياسىنداعى نارىنقول اۋدا­نى قوستوبە اۋىلىندا 1924 جىلى 15 قازاندا دۇنيەگە كەلگەن بەردىبەك سوقپاقباەۆ نەبارى سەگىز جاسىندا انادان كوز جازىپ, جەتىمدىكتىڭ اششى ءدامىن تاتادى. ومىردەن قاعاجۋ كورگەن جاس بالانىڭ جۇرەگى جەتىمدىكتىڭ ءار ءساتىن سانا سۇزگىسىنەن وتكىزىپ قانا قويماي, قالام ۇشىمەن ورنەكتەپ اق قاعازعا قالدىرادى.

«دۇنيەدە مەن ءۇشىن ودان اسقان جەكسۇرىن ءسوز جوق. تاقياسىن قورىعان تازشاداي وسى ءسوز قاي جاعىمنان سارپ ەتە قالادى دەپ زارەم ۇشىپ, ۇرەيلەنىپ تۇرامىن. بالالار, مەنىڭ قىمباتتى جان دوستارىم! «جەتىم» دەگەن تاجالداي سۋىق ءسوزدى ايتپاڭدار, اينالايىندار! ۇر, سوق, توبەلەس! ءتىپتى ەتىنەن ەت كەسىپ ال بىراق الگىندەي دەپ تىلدەمە. اياڭدار!» دەيدى ءوزىنىڭ «بالالىق شاققا ساياحات» پوۆەسىندە.

زاڭعار جازۋشىنىڭ ءمانى تەرەڭ بۇل ويىن بالا تۇگىلى ەرەسەكتەر قاپەرگە العان با؟ السا جەتىمىن جىلاتقانى بىلاي تۇرسىن, تۋعان توپىراعىنان جىراقتاتىپ, كوزىن جاۋدىرەتىپ, جات جۇرتقا جىبەرمەس ەدى-اۋ دەگەن وي قىلاڭ بەرەدى. تارىداي شاشىراعان قانشاما قازاق بالاسى وسى كۇنى تۋعان انا مەن تۋعان وتانىنا جەتۋدى اڭساپ كۇنەلتۋدە.

بالا جانىنىڭ نازىكتىگى مەن تاڭعى شىقتاي تازالىعىن قاز-قالپىندا اق قاعازعا تۇسىرگەن بەردىبەك سوقپاقباەۆ العاشقى شىعارماشىلىق جولىن بالالارعا ارناپ ولەڭ جازۋدان باستاعان.

ال پروزا جانرىنا جاڭا لەپپەن كەلگەن «مەنىڭ اتىم – قوجا», «بالالىق شاق­قا ساياحات» شىعارمالارى وقىرمان جۇرە­­گىندە جاتتاۋلى دەسەك اسىرەلەگەندىك ەمەس. بالالار تاقىرىبىن ارقاۋ ەتكەن كور­كەم تۋىندىلاردىڭ كەستەلەنۋىنە تۋعان اۋىلى­ نارىنقولدا ۇستازدىق ەتۋى جازۋشى ومىرىنە سونى سەرپىن بەرىپ, شىعار­ما­شى­لىققا باۋراي تۇسەدى.

1963 جىلى ەكرانعا شىققان «مەنىڭ اتىم – قوجا» ءفيلمى قازاق كينو ونەرىنىڭ شوقتىعى بيىك جۇلدىزىنا اينالىپ, التىن­ قورعا ەندى.

«مەنىڭ اتىم – قوجا» ءفيلمى – قازاق كينو ونەرىنىڭ شىڭى. ويتكەنى ول كەزدە حالىقارالىق ۇلكەن ماراپاتتاردى بەرەتىن ورتاعا ءالى ساياسات ارالاسپاعان كەزەڭ ەدى ءارى ونەر ءادىل باعالاناتىن. بالكىم, بۇل كينونى وسكارعا ۇسىنعاندا دا الىپ كەتەر مە ەدى؟ رەجيسسەر ابەكەڭنىڭ (ابدوللا قارساقباەۆ) كۇش-قايراتىنىڭ, ۇلتقا دەگەن ماحابباتىنىڭ كەمەلدەنگەن كەزى بولاتىن. كەيىنگى تۋىندىلارى دا بۇدان كەم سوقپادى دەپ ويلايمىن. ونىڭ جەمىسى – «باندىنى قۋعان حاميت».

بەردىبەك اعامىز شىعارماسىنا ارقاۋ بولعان اۋىل تاقىرىبىن وسكەلەڭ ۇرپاق ارقىلى سۋرەتتەۋى عاجاپ. ونى قوجا سياقتى ۇرپاقتارسىز ەلەستەتۋ استە مۇمكىن ەمەس, ول ۇرپاق بۇگىن ەرجەتتى. ەگەر سول ۇرپاقتىڭ قانىندا اۋىلعا دەگەن ماحابباتى مەن تابانىنىڭ تاڭباسى جاتپاسا, بۇگىنگى ورتاعا قازاق بولىپ ءسىڭىپ كەتە مە, جوق پا, كىم بىلەدى؟ مىنە, وسىنداي دۇنيەلەر بۇگىندە كۇن تارتىبىندە تۇر. ۇلتتىڭ رۋحاني قۇندىلىعىن ۇرپاق بويىنا سوقپاقباەۆتاي سىڭىرسەك, سوندا عانا جان-جاعىنا ادال, با­ۋىرمال, شىنشىل ازاماتتار تاربيەلەنەدى», – دەيدى قازاقستاننىڭ حالىق ءارتىسى دوسقان جولجاقسىنوۆ.

1967 جىلى بالالار مەن جاسوسپى­رىم­دەرگە ارنالعان كانن قالاسىندا وتكەن حالىقارالىق فەستيۆالدا «مەنىڭ اتىم – قوجا» ءفيلمى ارناۋلى جۇلدەگە يە بولدى. وسى فيلم ارقىلى تورتكۇل دۇنيە قازاق كينويندۋسترياسىنىڭ جەتىسىتىگىن كورىپ, قازاق اۋىلىنىڭ عاجايىپ كورى­نىس­تەرى مەن كەڭپەيىل, اقجارقىن بولمىسىن قوجا ارقىلى تانىپ, ءبىلدى.

«مەن قوجانىڭ رولىندە ويناعاندا ون ەكى جاستا ەدىم, ودان بەرى 60 جىل ۋاقىت ءوتتى. بىراق بالا قوجا ارامىزدا ءالى بار جانە ول حالقىمەن بىرگە جاساي بەرەدى. سەبەبى سوقپاقباەۆتىڭ شىعارماسىنىڭ جەلىسىمەن تۇسىرىلگەن فيلم ءوزىنىڭ ومىرشەڭدىگىمەن قۇندى», دەيدى «مەنىڭ اتىم – قوجا» فيلمىندە باستى ءرولدى سومداعان اكتەر نۇرلان سەگىزباەۆ.

سوقپاعى بولەك سوقپاقباەۆتىڭ كوركەم تۋىندىلارى كسرو حالىقتارىنىڭ جانە شەتەلدەردىڭ كوپتەگەن تىلىنە اۋدارىلىپ, ۇلكەن ساحنا, ەكرانداردا كورسەتىلدى.

«حح عاسىر قازاققا ۇلىلاردى, ارىس­تاردى مولىنان بەردى. اسىرەسە ادەبيەت پەن ونەردە, عىلىمدا ءبىزدىڭ جەتكەن بيىگىمىز دە, العان اسۋلارىمىز دا وتە مول. ال ەندى, كوركەم ادەبيەتكە كەلەر بولساق, كەشەگى عاسىر باسىنداعى قايعى مەن قاسىرەتتى ارقالاعان, ءومىردىڭ كۇنگەيى مەن كولەڭكەسىن دە جەرىنە جەتكىزىپ جازدى. سولاردىڭ ءبىرى, الىپتاردىڭ جالعاسى, جاقسىنىڭ كوزىندەي بولعان كەشەگى قازاق ادەبيەتىنىڭ, ءوزى دە كوزى تىرىسىندە كلاسسيك اتانعان بالالار ادەبيەتىنىڭ جۇلدىزى بەردىبەك سوقپاقباەۆ سول ساناتتاعى, سول سيپاتتاعى تۇعىرى بيىك تۇلعالارىمىزدىڭ ءبىرى بولاتىن. بەكەڭنىڭ شىعارمالارى ول وتە تەرەڭ ماعىناسىمەن, شىنشىلدىعىمەن, كوركەمدىك قۋاتىمەن قازاق ادەبيەتىنە كەلىپ قوسقان ارنالى, اۋقىمدى قايتالانبايتىن كوركەم كەڭىستىك. بەردىبەك سوقپاقباەۆ – قايتالانباس وزىنە عانا ءتان بولمىس-ءبىتىمى بولەك قالام يەسى. سوندىقتان بولار, كوزى تىرىسىندە شىعارمالارى 70-كە­ تارتا الەم تىلدەرىنە اۋدارىلعان, «مەنىڭ اتىم – قوجا» ءفيلمى ارقىلى قازاقتىڭ كينوسىن, قازاقتىڭ پروزاسىن جارتى الەمگە تانىتقان ۇلى سۋرەتكەر. حالىقتىڭ ماحابباتىنا بولەنگەن قالامگەر. ونىڭ قالامىنان تۋعان «مەنىڭ اتىم – قوجا», «جەكپە جەگى», «قايداسى, گاۋھارى؟», «ولگەندەر قايتىپ كەلمەيدى» اتتى مىقتى رومانى سول ءداۋىردىڭ كەسەك كەڭىستىگىن قالامىنان قانىن اعىزىپ جازعان باتىل, باتىر شىعارمالارى بولاتىن. جازۋ­شى شىعارمالارىنىڭ كوپتەگەن تىلگە اۋدارىلۋى بەردىبەك سوقپاقباەۆ شىعارمالارىنا دەگەن سۇرانىستىڭ سالماعىن بايقاتسا كەرەك», دەيدى قوعام قايراتكەرى نۇرلان ورازالين.

«بەردىبەك سوقپاقباەۆتىڭ «مەنىڭ اتىم – قوجا» اتتى شىعارماسىن قازاق قابىلدامادى. قابىلداماعاندىقتان ول شىعارما ماسكەۋدە «بالالار ادەبيەتى» باسپاسىنان باسىلىپ شىققان. ودان كەيىن لۋي اراگون كورىپ, فرانتسۋز تىلىندە شىعارعان. سودان كەيىن عانا قازاق حالقىمەن قاۋىشقان. ويتكەنى ول كەڭەستىك داۋىرگە قارسى بولدى. سوندىقتان بالالارعا ارناپ جازدى, بالالارعا ارنالعان شىعارمادا وتىرىك بولمايدى. وندا تەك قانا سەزىم مەن ماحاببات بولادى. بەردىبەك سوقپاقباەۆتىڭ ۇلىلىعى وسىندا. ءبىز بۇگىن پرەزيدەنت قاسىم-جومارت توقاەۆقا العىس ايتامىز. سەبەبى كوزىنىڭ تىرىسىندە مۇنداي قۇرمەتتى, ىقىلاستى كورمەگەن جازۋشى ەندى, مىنە, تۋعانىنا 100 جىل تولايىن دەپ تۇرعاندا بۇكىل قازاق الاقانىنا سالايىن دەپ وتىر. بۇكىل قازاق بەردىبەك سوقپاقباەۆ ارقىلى «مەن قازاقپىن» دەپ الەمگە جار سالايىن دەپ تۇر», – دەدى جازۋشىلار وداعىنىڭ باسقارما توراعاسى مەرەكە قۇلكەنوۆ.

كەلەسى كەزەكتە مەملەكەت باسشىسى قاسىم-جومارت توقاەۆتىڭ ىقىلاسىن جەتكىزگەن پرەزيدەنت كەڭەسشىسى مالىك وتارباەۆ: «وزدەرىڭىزگە ءمالىم, بىلتىر 7 ماۋ­سىمدا يۋنەسكو-نىڭ باس ديرەكتورى ودرە ازۋلە ارنايى استاناعا كەلىپ, پرەزيدەنتىمىز قابىلداعان بولاتىن. اراعا ءۇش اي سالىپ, ءمالىم بولعانداي 9 قىركۇيەكتە يۋنەسكو-نىڭ باس كونفەرەنتسياسىنىڭ 42-سەسسياسىندا ب.سوقپاقباەۆتىڭ 100 جىلدىعىن اتاپ ءوتۋ, اتاۋلى كۇندەر قاتارىنا ەنگىزۋ تۋرالى شەشىم قابىلدادى. مۇنىڭ بارلىعى دا مەملەكەت باسشىسىنىڭ ىقىلاسى جانە قولداۋى دەپ بىلەمىز. ءبىز بەردىبەك سوقپاقباەۆتىڭ شىعارماسىمەن وستىك. جازۋشى شىعارمالارى ادامگەرشىلىك, يماندىلىق, ادەپتىلىك سىندى ادامي قۇندىلىقتاردى سىڭىرەدى. «بالالىق شاققا ساياحات» تۋىندىسىندا «اقىلدىلىق تەك ۇلكەن ىستەن عانا بايقالمايدى, ۇساق-تۇيەكتەن دە انىق كورىنەدى» دەگەن ءسوزىنىڭ ءمانى زور. وسىنداي دارا ويلارىمەن قازاقتىڭ بىرنەشە بۋىنى تاربيەلەنىپ, بۇگىندە ەلدىڭ تاۋەلسىزدىگىن نىعايتۋ جولىندا قىزمەت ەتىپ كەلەدى. قازاق ادەبيەتىنىڭ مارتەبەسى وسە بەرسىن», دەگەن ىزگى تىلەگىن ءبىلدىردى.

ال پارلامەنت ءماجىلىسىنىڭ دەپۋتاتى جاناربەك ءاشىمجان ۇلى جازۋشىنىڭ بول­مىسى باياندالاتىن رىمعالي نۇر­عا­ليەۆتىڭ «تاۋدان تۇسكەن ادام» اتتى ەسسە­سىندە دىنمۇحامەد قوناەۆتىڭ شاڭى­را­عىنداعى العاشقى كەزدەسۋلەرى تۋرالى جۇرەككە جىلى ەستەلىگىمەن ءبولىستى. قوناەۆ قالاسىندا سوقپاقباەۆ تويىنىڭ باستالۋىنىڭ دا رامىزدىك ءمانى بارىن ايتا كەلە, كوزى تىرىسىندە مەملەكەتتىك سىيلىقتان, حالىق جازۋشىسى اتاعىنان, باسقا دا ماراپاتتاردىڭ بارىنەن قاعىلعان قالامگەرگە قۇرمەت پەن ىقىلاس ەندى اۋىپ جاتقانىن قۋانا جەتكىزدى.

بەردىبەك سوقپاقباەۆ – بالالار ادەبيە­تى­نىڭ عانا ەمەس, ۇلت ادەبيەتىنىڭ كلاسسيگى. سوندىقتان الاتاۋدىڭ باۋرايىنان باس­تال­عان جازۋشىنىڭ عاسىرلىق مەرەيتويى الاش جۇرتىنا, ودان ءارى وركەنيەت بەسىگى انا­دولىعا, ءتۇبى پاريجگە دە جەتەر كۇن جاقىن.

«بەردىبەك الەمىنە ساياحات» اتتى ادەبي-سازدى كەش بارىسىندا ۇلت مادەنيەتى مەن ادەبيەتىنە ولشەۋسىز ۇلەس قوسقان ب.سوق­پاق­باەۆتىڭ شىعارمالارىنان ۇزىندىلەر ساح­نا­لانىپ, كورەرمەن جۇرەگىن ەلجىرەتتى. ءسويتىپ, ءبىر ءسات ءتۇتىنى ءتۇزۋ ورىلگەن التىن بەسىك اۋىل مەن بەيكۇنا بالالىق شاققا ساپارلاپ قايتقانداي كۇيگە بولەندى.

الماتى وبلىسى