سەنات توراعاسى ماۋلەن اشىمباەۆ ينۆەستورلاردىڭ وزەكتى ماسەلەلەرىن ۆەدومستۆوارالىق ۇيلەستىرۋ مەن شەشۋگە قاتىستى پروبلەمالارعا توقتالدى. ول بۇل جونىندە پالاتا وتىرىسىندا ايتتى. وتىرىس بارىسىندا دەپۋتاتتار قاتار جانە سينگاپۋر ۇكىمەتتەرىمەن ينۆەستيتسيالىق ىنتىماقتاستىق تۋرالى زاڭداردى قاراعان بولاتىن.
ماۋلەن اشىمباەۆ اتاپ وتكەندەي, وڭىرلەرگە ساپارى كەزىندە سەناتورلار كاسىپكەرلەرمەن جانە ينۆەستورلارمەن مىندەتتى تۇردە كەزدەسەدى. وسىعان بايلانىستى ەل بويىنشا اتالعان سالا وكىلدەرىن الاڭداتىپ وتىرعان ءۇش نەگىزگى ماسەلەنى قامتيتىن بلوك قۇرىلعان ەدى.
ء«بىرىنشى ماسەلە – قانداي دا ءبىر تۇيتكىلدەر بويىنشا شەشىمدەردى كەلىسۋ مەرزىمىنىڭ ۇزاقتىعى. بىزدە ادامدار جاۋاپكەرشىلىكتى ءوز موينىنا العىسى كەلمەيدى, جۇيە سولاي جۇمىس ىستەيدى. وسىعان بايلانىستى ورتالىق نەمەسە جەرگىلىكتى مەملەكەتتىك ورگاندار تاراپىنان شەشۋدى تالاپ ەتەتىن ماسەلەلەر كەيىنگە قالا بەرەدى. سوندىقتان ينۆەستورلارمەن جۇمىس ىستەۋدىڭ بارلىق پروتسەدۋراسىن ناقتى جازۋ كەرەك. ەكىنشى ماسەلە, كەن ورىندارى تۋرالى كەيبىر اسپەكتىلەر بويىنشا اقپاراتقا قول جەتكىزۋدىڭ قيىندىعىمەن بايلانىستى. وسى رەتتە ينۆەستورلار ءۇشىن قاجەتتى اقپاراتتار بويىنشا اۋديت جۇرگىزۋ قاجەت. ءۇشىنشى ماسەلە, مەملەكەتتىك ورگاندار اراسىنداعى ۇيلەستىرۋدىڭ جەتكىلىكسىز دەڭگەيدە بولۋىنا قاتىستى. بۇل ورتالىق اتقارۋشى ورگاندار اراسىندا دا, سونداي-اق ورتالىق جانە جەرگىلىكتى اتقارۋشى ورگاندار اراسىندا دا كەزدەسەدى. ياعني ورتالىق دەڭگەيدە شەشىمدەر قابىلدانعانىمەن, ولار جەرگىلىكتى جەرلەردە تولىق ىسكە اسىرىلمايدى», دەدى پالاتا سپيكەرى.
ماۋلەن اشىمباەۆ سەنات ءوز تاراپىنان وسى ماسەلەلەردى شەشۋگە جانە قاجەت جاعدايدا ءتيىستى زاڭنامالارعا وزگەرتۋلەر ەنگىزۋگە ىقپال ەتۋگە دايىن ەكەنىن ايتتى.