«جاتاقحانالاردا بوس ورىنداردىڭ بولماۋى سەبەبىنەن ستۋدەنتتەر جالدامالى پاتەرلەردى نەمەسە تەحنيكالىق قاۋىپسىزدىگى وسال, ارزان حوستەلدەردى پانالاۋعا ءماجبۇر». پلەنارلىق وتىرىس بارىسىندا ماجىلىسمەن نۇرگۇل تاۋدىڭ ۇكىمەتكە جولداعان دەپۋتاتتىق ساۋالى وسىلاي باستالدى, دەپ حابارلايدى Egemen.kz Respublica پارتياسىنىڭ ءباسپاسوز قىزمەتىنە سىلتەمە جاساپ.
دەپۋتات حالىقپەن كەزدەسۋ بارىسىندا كەلىپ تۇسكەن شاعىمدار بويىنشا Respublica پارتياسىنىڭ بىرقاتار ءماسليحات دەپۋتاتتارىمەن بىرلەسىپ, استانا, الماتى قالالارى جانە الماتى وبلىسىندا بىرنەشە ستۋدەنتتىك جاتاقحاناعا بارىپ, ستۋدەنتتەردىڭ جاعدايىمەن تانىسقان.
«جاستار اراسىنداعى ۇيسىزدىك پەن كۇيسىزدىك جاعدايلارى قوعامنىڭ وزەكتى ماسەلەسىنە اينالدى. كۇنى كەشە الماتىداعى حوستەلدە بولعان ورتتەن 13 ادام قازا تاپتى. ءتىلسىز جاۋدىڭ سالدارىنان كوز جۇمعانداردىڭ اراسىندا ستۋدەنتتەر دە بار. عىلىم جانە جوعارى ءبىلىم مينيسترلىگىنىڭ دەرەكتەرى بويىنشا, ەلىمىزدە 380 ستۋدەنتتىك جاتاقحانا بار. الايدا, جاتاقحانالاردا 23,7 مىڭ ورىن تاپشى. بۇل ماسەلە قازىرگى ۋاقىتتا الماتى, استانا, شىمكەنت قالالارى جانە سولتۇستىك قازاقستان وبلىسىندا وزەكتى», دەدى نۇرگۇل تاۋ.
دەپۋتات ۇلتتىق ستاتيستيكا بيۋروسىنىڭ مالىمەتىنە سۇيەنىپ 2017 جىلدان 2022 جىلعا دەيىن جاتاقحانالاردا تۇراتىن ستۋدەنتتەر سانى 68,1 مىڭنان 73,1 مىڭ ادامعا دەيىن وسكەنىن ايتتى. وڭ ءۇردىس بولعانىمەن, قاجەتتىلىك بويىنشا كورسەتكىشتەر كوڭىل كونشىتپەيدى. جاتاقحانالار ءبىلىم بەرۋ وبەكتىلەرىنە قويىلاتىن سانيتاريالىق-ەپيدەميولوگيالىق تالاپتارعا سايكەس كەلمەيدى.
«مىسالى, س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى جاتاقحانالارىنىڭ توزىعى جەتكەن. ستۋدەنتتەردىڭ جۋىناتىن بولمەلەرىنىڭ تازالىق جايى سىن كوتەرمەيدى. بۇل, اسىرەسە, مەديتسينا سالاسىنداعى ۋنيۆەرسيتەتكە ساي كەلمەيتىن, جات جاعداي. استانا مەديتسنالىق ۋنيۆەرسيتەتىنىڭ جاتاقحانالارىندا ستۋدەنتتەر اراسىندا ءبىر شاعىن بولمەدە 9-11 ادامنان تۇرۋ قالىپتى جايتقا اينالىپ كەتكەن. سونداي-اق اتالعان جاتاقحانالاردا ءۇي-جايلارىن جوندەۋگە جانە كۇتىپ ۇستاۋعا قويىلاتىن تالاپتاردى قاتاڭ ساقتاۋدى قاداعالاۋ ماسەلەسىن قولعا الۋ قاجەت», دەدى دەپۋتات.
دەپۋتاتتىق ساۋالىندا نۇرگۇل تاۋ ستۋدەنتتەرگە قاتىستى تاعى بىرنەشە ماسەلەنى تىلگە تيەك ەتتى. ولاردىڭ ىشىندە جاتاقحانالاردىڭ قاۋىپسىزدىگى, تەرروريزمنەن قورعانۋ دەڭگەيى, ءورت قاۋىپسىزدىگى دەڭگەيلەرىنىڭ تومەندىگى بار. كەيبىر جاتاقحانالار تەرروريستىك اكتىگە قارسى قىزمەتتەردى شاقىرۋعا ارنالعان «دابىل تۇيمەسىمەن» جابدىقتالماعان بولىپ شىقتى.
تىعىرىقتان شىعۋدىڭ بىرنەشە جولىن اتاعان ماجىلىسمەن ۇكىمەتكە جەكە كاسىپكەرلىك سۋبەكتىلەرى مەن مەملەكەتتىك-جەكەمەنشىك سەرىكتەستىگىن قۇرۋ ارقىلى ستۋدەنتتەرگە ارنالعان جاتاقحانالاردى سالۋ جانە ونىڭ قىزمەتىن ۇيىمداستىراتىن ۇلتتىق جوبا قۇرۋدى, شىعىنداردىڭ جارتىسىن وتەۋ ماقساتىندا «كراۋدفاندينگ» تەتىگى بويىنشا جەكە جانە زاڭدى تۇلعالاردان ينۆەستيتسيا تارتۋدى, جاستاردىڭ پاتەردى جالعا الۋ قاراجاتىن تولەۋ گرانتتارىن ەنگىزۋدى, كاسىپتىك وقۋ ورىندارىن ستۋدەنتتەردى تولىقتاي جاتاقحانامەن قامتاماسىز ەتۋگە مىندەتتەۋدى جانە ەۋروپادا ستۋدەنتتەر قاۋىمىنا كورسەتىلەتىن ءتۇرلى قولداۋ جولدارىن مىسالعا كەلتىرىپ, اتالعان تەتىكتەردى ءبىزدىڭ ەلدە دە قولدانىپ, ءبىلىم الىپ جاتقان جاستاردىڭ بىرقاتار ماسەلەسىن شەشۋگە بولاتىنىن ايتتى.