18 قاڭتاردا استانا قالاسىنداعى العاشقى ۇشەم №2 قالالىق كوپسالالى اۋرۋحانانىڭ اكۋشەرلىك بلوگىندا دۇنيەگە كەلدى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
سابيلەردىڭ اناسى اجار قابيتوۆا جۇبايىمەن بىرگە 2020 جىلى دۇنيەگە كەلگەن قىزدارى مەن 2022 جىلى تۋعان ەگىز بالالارىن تاربيەلەپ وتىر. جاس انا جۇكتىلىكتىڭ 34-ءشى اپتاسىندا بوساندى, سابيلەرىنىڭ ءبارى - ۇل بالالار. بالالاردىڭ سالماعى 3000 گرامم, 2300 گرامم جانە 2500 گرامم بولىپ تۋعان.
ايتا كەتسەك, جاڭا تۋعان نارەستەلەر ءبىر اپتاعا جۋىق ۋاقىتتان بەرى №2 قالالىق كوپسالالى اۋرۋحاناسىندا جاتىر.
دارىگەرلەردىڭ ايتۋىنشا, بالالاردىڭ دەنساۋلىعى جاقسى, ازداپ سالماق قوسىپ جاتىر. ۇدايى دارىگەرلەردىڭ باقىلاۋىندا. 24 قاڭتار كۇنى ۇيلەرىنە شىعارىلادى.
سابيلەرىن دۇنيەگە اكەلۋىنە كومەكتەسكەنى ءۇشىن اجار ءوزىنىڭ Instagram اككاۋنتىندا دارىگەرلەر مەن مەديتسينا قىزمەتكەرلەرىنە العىسىن ءبىلدىردى.
«استانا قالاسىنداعى №2 قالالىق كوپسالالى اۋرۋحانانىڭ مەديتسينالىق پەرسونالى مەن اكۋشەرلىك بلوك دارىگەرلەرىنە, اتاپ ايتقاندا, اردانا ايداربەكقىزى مەن ۆەنەرا ۋساينقىزىنا العىسىمدى بىلدىرەمىن. سىزدەردىڭ قامقورلىعىڭىز, جىلۋلىعىڭىز جانە كاسىبيلىگىڭىز مەنىڭ ءومىرىمنىڭ وسى ماڭىزدى ساتىندە سەنىمدىلىك پەن قاۋىپسىزدىك اتموسفەراسىن سىيلادى. جۇمىستارىڭىز ءۇشىن جانە جاڭا ءومىر باستاۋعا قوسقان ۇلەستەرىڭىز ءۇشىن راقمەت», دەپ جازدى ول.