كوكشەتاۋدا اسقار زابيكۋلينگە ەسكەرتكىش ورناتىلدى

ءىس-شارانىڭ اشىلۋ سالتاناتىندا ءسوز سويلەگەن توتەنشە جاعدايلار ۆيتسە-ءمينيسترى باۋىرجان سىزدىقوۆ مەملەكەتتىڭ ستراتەگياسى ەڭ الدىمەن ازاماتتاردى قورعاۋعا, توتەنشە جاعدايلاردىڭ الدىن الۋعا جانە جويۋعا باعىتتالعانىن ايتىپ ءوتتى. وسى رەتتە ول قۇتقارۋشىلار مەن ءورت سوندىرۋشىلەردىڭ ەڭبەگى اسا ماڭىزدى ەكەنىن تىلگە تيەك ەتتى. 

«اسقار زابيكۋليننىڭ ەرلىگى, ونىڭ ءومىرى – ءپاتريوتيزمنىڭ, پارىزدىڭ, قورىقپاۋدىڭ ۇلگىسى. بۇگىن الاڭعا شىققان ءورت سوندىرۋشىلەردىڭ قازىرگى بۋىنىنا قارايتىن ادام بار. اسقار زابيكۋليننىڭ ەسىمى توتەنشە جاعدايلار مينيسترلىگىنىڭ عانا ەمەس, بۇكىل ەلىمىزدىڭ تاريحىندا جازىلعان. ونىڭ قاھارمان مىسالىندا جانە بورىشى ءۇشىن ءوز ءومىرىن قۇربان ەتكەن باسقا قۇتقارۋشىلاردىڭ مىسالىندا قازاقستان رەسپۋبليكاسى ازاماتتارىنىڭ قاۋىپسىزدىگىن ادال جانە جاۋاپكەرشىلىكپەن قامتاماسىز ەتۋ ءۇشىن ازاماتتىق قورعاۋ ورگاندارىنىڭ جۇيەسىنە كەلەتىن جاستاردىڭ جاڭا بۋىنى تاربيەلەنەتىن بولادى. اسقار تۋرالى جاقسى ەستەلىك, ءوز ءىسىنىڭ مامانى رەتىندە ءبىزدىڭ جۇرەگىمىزدە ماڭگى قالادى», دەدى ب.سىزدىقوۆ.

ەسكەرتكىش تاقتادان اق جامىلعى الىنعاننان كەيىن, جينالعاندار مەموريالعا گۇل شوقتارىن قويىپ, باتىردى ءبىر مينۋت ۇنسىزدىكپەن ەسكە الدى.

«اقمولالىق قۇتقارۋشىلار وتكەن جىلى 300-دەن استام ادامنىڭ ءومىرى مەن دەنساۋلىعىن ساقتاپ قالدى. سىزدەردىڭ جانقيارلىق ەڭبەكتەرىڭىز ودان ءارى قاۋىپسىزدىك كەپىلى بولاتىنىنا سەنىمدىمىن.  اسقار زابيكۋليننىڭ اتا - اناسىنا ۇلكەن العىسىمدى بىلدىرگىم كەلەدى», دەپ اتاپ ءوتتى وبلىس اكىمىنىڭ ورىنباسارى ەلدوس رامازانوۆ.

اسقار زابيكۋلين ءبيۋستىنىڭ بيىكتىگى 3,7 مەترلىك تۇعىرعا ورناتىلعان. ەسكەرتكىشتىڭ اينالاسى اباتتاندىرىلىپ, اعاشتارمەن قورشالعان.

ەسكە سالايىق, ەلوردالىق ءورت ءسوندىرۋشى اسقار زابيكۋلين 2022 جىلدىڭ قاراشا ايىندا تۇرعىن ءۇي كەشەنىندەگى ءورتتى ءسوندىرۋ بارىسىندا قىزمەتتىك بورىشىن وتەۋ كەزىندە قازا تاۋىپ, ءوز ءومىرىن قاتەرگە تىگىپ, ءۇش ادامنىڭ ءومىرىن ساقتاپ قالعان بولاتىن. پرەزيدەنت جارلىعىمەن اسقار قايتىس بولعاننان كەيىن ءى دارەجەلى «ايبىن» مەملەكەتتىك ناگراداسىمەن ماراپاتتالدى.