سپورت ارداگەرى, داڭقتى قاقپاشى قۇرالبەك ورداباەۆ ء«بىرىنشى بول» يۋتۋب ارناسىنا بەرگەن سۇحباتىندا 1979 جىلدىڭ 11 تامىزىندا بولعان جانتۇرشىگەرلىك اۋە اپاتى تۋرالى تىڭ دەرەك ايتتى, دەپ جازادى Egemen.kz.
ء«بىز (الماتىلىق «قايرات» فۋتبول كلۋبىنىڭ ويىنشىلارى) كسرو چەمپيوناتىنداعى كەزەكتى ماتچتى وتكىزۋ ءۇشىن مينسك قالاسىنىڭ اۋەجايىندا بولدىق. ويتكەنى بىرىنشىلىك كەستەسى بويىنشا ءبىز جەرگىلىكتى «دينامو» كومانداسىمەن ويناۋىمىز قاجەت. ال وزبەكستاننىڭ «پاحتاكور» ويىنشىلارى باكۋ قالاسىندا تارتىسقا ءتۇسۋى ءتيىس بولاتىن. ءبىز جوسپار بويىنشا «پاحتاكور» كلۋبىنىڭ ويىنشىلارى بار ۇشاققا مينسكىدەن ءمىنىپ باكۋگە ۇشۋعا ءتيىستى ەدىك. بەلارۋس ەلىنىڭ استاناسىنداعى اۋەجايدا وتىرعاندا اۋە اپاتىنىڭ ورىن العانىن حابارلادى. «ورتالىق ازيا ەلدەرىنىڭ فۋتبول كومانداسى اپاتقا ۇشىرادى» دەگەن قارالى حاباردان ەسەڭگىرەپ قالدىق. دەرەۋ الماتىعا تەلەفون شالىپ ءوزىمىزدىڭ ءدىن-امان ەكەنىمىزدى ايتتىق. ءبىر ساعاتتان كەيىن عانا ەكى ۇشاق سوقتىعىسىپ, زامانداستارىمىز, تالانتتى فۋتبولشىلاردىڭ قازا تاپقانىن ەستىدىك», دەدى قۇرالبەك ورداباەۆ.
داڭقتى قاقپاشى قۇرالبەك ورداباەۆتى 1971 جىلى «پاحتاكور» فۋتبول كلۋبىنىڭ باسشىلارى مەن باس باپكەرى كومانداعا شاقىرعانىن دا ايتتى, اكەسى كەلىسىم بەرمەگەندىكتەن بارماعانىن جەتكىزدى.
1979 جىلدىڭ 11 تامىزىندا 8400 مەتر بيىكتە ەكى تۋ-134 ۇشاعى سوقتىعىسىپ, 178 جولاۋشى قازا تاپتى. ولاردىڭ اراسىندا «پاحتاكور» فۋتبول كومانداسىنىڭ 14 ويىنشىسى مەن كلۋب جەتەكشىلەرى دە بار بولاتىن.