شىڭىلتىر ايازى بەت شىمشىعان قىستىڭ شاقىرايىپ تۇرعان اشىق كۇنى الدامشى كەلەدى. باياۋ بۇرقاسىنداتىپ بارىپ باستالعان بوران اياق استىنان كارىنە ءمىنىپ, الگىندە عانا مۇلگىپ تۇرعان الەمنىڭ استان-كەستەنىن شىعارىپ جىبەرۋى مۇمكىن. ءدال وسىلاي باستالعان قارلى بوران بىرنەشە كۇن بويى ەستى الىپ, ءوڭىر جۇرتشىلىعىن ابدەن ابىگەرگە سالعانى راس. تاياق تاستام جەردى كوزدەن تاسالاپ, اينالانى الەمتاپىرىق ەتىپ جىبەرگەن اقتۇتەك بوراندا توتەنشە جاعداي قىزمەتكەرلەرى مەن پوليتسيا ساپىنداعىلار تىنىمسىز ىزدەۋ-قۇتقارۋ شارالارىن ءمىنسىز اتقارىپ شىقتى.
مەڭدىقارا اۋدانىندا اداسىپ كەتكەن مالشى جانىنا ەرگەن ءيتىنىڭ ارقاسىندا امان قالىپ وتىر. قاڭتاردىڭ 14-ىندە مال ىزدەپ شىققان تابىنشى ۇشتى-كۇيلى جوعالىپ كەتكەن. 15 قاڭتاردا ۆولونتەرلەردىڭ ءبىرى جوعالعان مالشىنىڭ اتىن بوس جۇرگەن جەرىنەن تاۋىپ الادى. استىنداعى اتىنان اۋىپ ءتۇسىپ قالعان مالشى كۇندىز جاياۋ ءجۇرىپ جول ىزدەپ, تۇندە ساي جەردى ىقتاپ, ءيتىن قۇشاقتاپ جىلىنىپ جان ساقتاعان. قارلى بوراننىڭ استىندا دالانى جاياۋ كەزگەن مالشى ءۇشىنشى كۇنى ءوزىن ىزدەپ جۇرگەن قۇتقارۋشىلار كولىگىنىڭ جارىعىن دا كورگەن. الايدا كوزىمە ەلەستەگەن شىعار دەپ ويلاپ, ول جاققا ۇمتىلا قويماعان. تاڭەرتەڭ سول كولىكتىڭ ىزىنە تۇسەدى. ابىروي بولعاندا, ك-700 تراكتورىنىڭ ءىزى بوس تۇرعان اڭشىلار ۇيىنە اكەلگەن. تاتار ءدامى تاۋسىلماعان مالشى سول جەردە بوراننىڭ باسىلۋىن كۇتىپ, كۇن تىنشىعان سوڭ, يتىنە ەرىپ امان-ەسەن اۋىلعا ورالدى.
بوراندى كۇنى جىلقى ىزدەپ شىققان ارقالىق قالاسىنىڭ ماڭىنداعى فۋرمانوۆ اۋىلىنىڭ تۇرعىنى دا ءۇش كۇننەن كەيىن تابىلدى. بەس بالانىڭ اكەسى تالعات كەنجيندى ۋچاسكەلىك پوليتسەي ۆوستوچنوە اۋىلىنان 5 شاقىرىم جەردەن تاۋىپ العان. قازىر اۋىر جاعدايدا ارقالىق اۋرۋحاناسىنىڭ جانساقتاۋ بولىمىندە جاتىر. بەتى مەن قول-اياعىن ءىى-ءىىى دارەجەدە ۇسىك شالعان.
تالعات تا 14 قاڭتاردا جىلقى ىزدەپ شىققان. 15 قاڭتاردا مالشىنىڭ مىنگەن اتى مەن ءبىر ءۇيىر جىلقى تابىلدى. بىراق ءوزى جوق. مالشىنى تجد قىزمەتكەرلەرى, جەرگىلىكتى شارۋا قوجالىقتارىنىڭ جۇمىسشىلارى مەن ۆولونتەرلەر 3 كۇن ىزدەدى. ءتورتىنشى كۇنى ىزدەۋ شارالارىنا تىكۇشاق قوسىلدى.
قۇتقارۋشىلار 14 قاڭتاردا بوراندا اداسىپ كەتكەن ارقالىق قالاسىنا قاراستى ميرنىي اۋىلىنىڭ تۇرعىنىن دا قۇلاپ جاتقان جەرىنەن تاۋىپ الىپ, اجال ارانىنان اراشالاپ قالدى. بەتى-قولىن ۇسىك شالعان ايەل قازىر جانساقتاۋ بولىمىندە جاتىر.
وبلىستىق تجد-نىڭ مالىمەتىنشە, وسى ءۇش كۇننىڭ ىشىندە 56 جولاۋشى, 6 بالا قۇتقارىلىپ, قار قۇرساۋىندا قالعان 72 ادام قاۋىپسىز جەرگە ەۆاكۋاتسيالانعان.
قوستاناي