قر مادەنيەت قايراتكەرى, بەلگىلى ءانشى قاراقات ءابىلدينا جاس قىز-جىگىتتەرگە اقىل-كەڭەسىن جەتكىزدى, دەپ حابارلايدى Egemen.kz.
“1001 ءتۇن” باعدارلاماسىنا قوناق بولعان ونەر يەسى وتباسى قۇندىلىعى جايىندا پىكىرىن ءبىلدىرىپ, جاستار جار تاڭداۋدا الدامشى سەزىمگە بەرىلمەۋ قاجەتتىگىن العا تارتتى.
- قوعامدا ايەلگە قول كوتەرەتىن ەر-ازاماتتارىمىزدىڭ بەلەڭ الىپ بارا جاتقانى جانعا باتادى. ءبارىمىز دە ۇل-قىز ءوسىرىپ وتىرمىز. ءوزىمىزدى نە كۇتىپ تۇرعانىن بىلمەيمىز. ايرانداي ۇيىپ وتىرعان وتباسىنىڭ شىرقى بۇزىلىپ, بالالار جەتىم قالىپ جاتىر. ارينە, جانعا باتاتىن دۇنيەلەر. وسى كەلەڭسىز وقيعالاردى بولدىرماۋ ەكى جاسقا تىكەلەي بايلانىستى. ومىرلىك سەرىگىڭدى تاڭداعان كەزدە سەن ونىڭ تەگى كىم, قاي جاقتان ەكەنىن زەردەلەپ, ءبىراز ءجۇرىپ, كوزىڭدى جەتكىزىپ, ءارى-بەرى تانۋىڭ كەرەك, - دەدى كوپ بالالى انا.
ونىڭ پايىمىنشا, ەڭ اۋەلى ادام ءوزىنىڭ ومىرىنە ۇلكەن جاۋاپكەرشىلىكپەن قاراۋى ءتيىس. اياعىن شالىس باسپاۋ ءۇشىن وزدەرى قىز بولىپ جۇرگەن كەزدىڭ وزىندە شوشاڭداماي ءجۇرۋى كەرەك.
- قالاي بولسا, سولاي جەڭىل جۇرىسكە سالىنىپ, وت باسىپ قالىپ جاتادى. سونداي جاعدايدىڭ سالدارى جاقسى بولمايدى. سوندىقتان دا "قىزعا قىرىق ۇيدەن تىيىم" دەپ قازاق بەكەر ايتپاعان, – دەيدى ءانشى.
سونداي-اق ونەر يەسى وتباسىنداعى جانجال كەزىندە الدىمەن سالماق ايەلگە تۇسەتىنىن اتاپ ءوتتى. ايتۋىنشا, ەرلى-زايىپتىلاردىڭ قارىم-قاتىناسىن نىعايتاتىن ايەل كورىنەدى.
- ايەل – ءۇيدىڭ بەرەكەسى مەن شىعارى. كوپ نارسە اينالىپ كەلگەندە ايەل زاتىنا بايلانىستى. ويتكەنى ايەلدىڭ ارقاسىنداعى جاۋاپكەرشىلىكتىڭ جۇگى اۋىر. قالاي ايتساڭىز دا ول – شىندىق. وتباسىلىق قارىم-قاتىناس, بالا تاربيەسى, ۇيدەگى تىرشىلىكتىڭ بارلىعى ايەلدەن سۇرالادى. بالا ساباقتى جاقسى وقىماي جاتسا دا اناسى جاۋاپتى. سوندىقتان دا قىزدارعا, سىڭلىلەرىمە وت باسپاۋ ءۇشىن, وكىنبەستەي ءومىر ءسۇرۋ ءۇشىن كىشكەنە ءوز بولاشاقتارىڭىزعا, ومىرلەرىڭىزگە ابايلاپ قادام باسىڭىزدار دەپ ايتقىم كەلەدى. ارينە ءبىر ادامدى تولىق تانىپ-ءبىلىپ ۇلگەرمەيسىڭ, دەگەنمەن دە شامالى ۋاقىت ءجۇرىپ, كوز جەتكىزىپ, سودان كەيىن تۇرمىسقا شىقسا ەكەن, نەكەلى جارىنا ءسۇيىپ قوسىلسا, سەزىممەن قوسىلسا ەكەن دەيمىن. سەزىم باردا سەنىم پايدا بولادى. ادال تازا ماحابباتپەن قوسىلعان ەكى ادام قانشا جەردەن, قانداي جاعداي بولماسىن ءبىر-بىرىنە مەيىرىمدى, قايىرىمدى, كەشىرىمدى بولادى. ولاردىڭ ءىسى ۇلكەن داۋ-جانجالعا ۇلاسپايدى, – دەپ تۇيىندەدى ءانشى.