الماتىدان اقتوبەگە باعىت العان پويىزدا جولسەرىك قىزدىڭ كومەگىمەن جۇكتى ايەل قىز بالانى دۇنيەگە اكەلدى, دەپ حابارلايدى Egemen.kz.
جاس انا ايناگۇل تىلەۋبەرگەنوۆا الماتى-اقتوبە باعىتىنداعى №33 پويىزبەن توعىس ستانساسىنان اقتوبە قالاسىنا بارا جاتقان. 7 قاڭتاردا جولاۋشىنى تولعاعى قىستى.
«پويىز بريگاداسىنىڭ جۇمىسشىلارى نۇسقاۋ بويىنشا ماشينيستكە حابارلاپ, جاقىن ماڭداعى جەم ستانتسياسىنا جەدەل جاردەم بريگاداسىن شاقىردى. جەدەل جاردەم كەلگەنگە دەيىن پويىز جولسەرىگى عاليا قابدراحمانوۆا ۆاگوندا ايەلگە بوسانۋعا كومەك كورسەتتى, ال ساعات 14:27-دە جاس انا امان-ەسەن قىز بالانى دۇنيەگە اكەلدى», دەلىنگەن جولاۋشىلار تاسىمالى كومپانياسىنىڭ ءباسپاسوز قىزمەتى تاراتقان حابارلامادا.
جەم ستانساسىنا جەتكەندە جاڭا تۋعان نارەستە مەن ونىڭ اناسىن جەدەل جاردەم قىزمەتكەرلەرى قابىلدادى.
«پويىزدىڭ بارلىق قىزمەتكەرلەرىنە وسىنداي توتەنشە جاعدايدا قول ۇشىن بەرىپ, مەنى جالعىز قالدىرماعاندارى ءۇشىن ۇلكەن العىسىمدى بىلدىرەمىن. ەندى قىزىما وسكەندە ايتارىم بار», دەيدى بالانىڭ اناسى ايناگۇل تىلەۋبەرگەنوۆا.
كەيىنىرەك جاڭادان تۋعان شاقالاققا ماليكا دەگەن ەسىم قويىلعانى بەلگىلى بولدى.
ايتا كەتەيىك, سوڭعى 3 جىلدا كومپانيا پويىزدارىندا 11 ءسابي دۇنيەگە كەلگەن.