ەل بىرلىگىمەن مىقتى

ەل تىزگىنىن قاسىم-جومارت كەمەل ۇلى العاننان بەرى جاڭارۋعا باعىت العان مەملەكەتتە ءومىر ءسۇرىپ جاتقانىمىزدى ءبارىمىز سەزىنەمىز. راس, ازىرشە جاڭا قازاقستاندى, ادىلەتتى قازاقستاندى قۇرىپ تاستادىق دەپ كەۋدەمىزدى قاعا الماسپىز. بىراق باعىتىمىز ايقىن, ماقساتىمىز بيىك, سول جولعا تۇسكەنىمىز انىق. پرەزيدەنت ايتىپ وتىرعانداي, «...وسى ماقساتقا جەتۋ ءۇشىن ءبىز ءبىر ەل بولىپ, بىلەك سىبانا جۇمىس ىستەۋىمىز كەرەك».

پرەزيدەنت قاسىرەتتى قاڭتارعا قا­تىستى سۇراقتارعا دا ادەتتەگىدەي تۋرا جاۋاپ بەرىپ, قاسكويلەردىڭ مەم­لە­كەتتىك توڭكەرىس جاساماق بولعانىن اشىق ايتىپ وتىر. بۇل رەتتە سۇراق تا ورىندى, جاۋاپ تا سالماقتى شىققان. ويت­­كەنى ءالى كۇنگە دەيىن ارامىزدا بەي­بىت شەرۋ ەدى, بيلىك نەگە قارۋ قول­دان­دى دەيتىندەر بار. ولارعا مەنىڭ ايتارىم, قايداعى بەيبىت شەرۋ؟

ەگەر پرەزيدەنتىمىز قالىپتاسقان احۋالدى دۇرىس باعالاپ, تىعىرىققا تىرەلگەن ەلدى, بەيبىت حالىقتى قور­عاۋدىڭ پارمەندى شارالارىن قا­بىلداپ, جەدەل جۇزەگە اسىرماعاندا الدىن الا جان-جاقتى ويلاستىرىلعان, مۇزداي قارۋلانعان سودىرلاردىڭ سويقانى نەگە اكەلىپ سوقتىراتىنىن بولجاۋدىڭ ءوزى قيىن ەدى. بىلە بىلسەك, مەملەكەت باسشىسىنىڭ تاباندىلىعىنىڭ, ەرىك-جىگەرىنىڭ, باتىل ءىس-قيمىلدارىنىڭ ارقاسىندا عانا امان قالدىق. اقيقاتى سول, ەل باسىنا كۇن تۋعاندا, قاسىم-جومارت توقاەۆ بۇكىل جاۋاپكەرشىلىكتى موينىنا الىپ, باتىل قيمىلداپ, ءوزىنىڭ ناعىز كوشباسشى ەكەنىن دالەلدەدى.

سوڭعى وتىز جىلدا ءبارىمىز اۋىز­بەن وراق ورىپ, جۇماقتا ءومىر ءسۇرىپ جاتقانداي اسەردە بولدىق. قازاقستان باي­لىعىنىڭ جارتىسى ساناۋلى ادام­نىڭ قولىنا ءوتىپ كەتكەنىن ەندى ءبىلىپ جاتىرمىز. پرەزيدەنت حالىقتان ەشتەڭەنى جاسىرىپ وتىرعان جوق, ءار سوزىندە ەلدەگى جاعدايدىڭ كۇردەلى ەكەنىن دات­تەپ, ونىڭ ءبارىن بىرلىگىمىزبەن, ۇيىم­شىل­دىعىمىزبەن, ەلدەگى تىنىش­تىقتى ساقتاي وتىرىپ قانا رەتكە كەلتىرە الاتىنىمىزدى, جىلدار بويى قوردالانعان ماسەلەلەردىڭ ءبىر كۇندە, ءبىر ايدا, ءتىپتى ءبىر جىلدا شەشىلە قالمايتىنىن ايتىپ وتىر.

سۇحباتتان تۇيگەن تاعى ءبىر وي – قازىر ۇلكەن وزگەرىس كەزەڭىندەمىز. ماقسا­تىمىز – حالىق سوزىنە قۇلاق اساتىن مەملەكەت قۇرۋ. وركەنيەت جولىن تاڭ­دا­دىق. پرەزيدەنت, پارلامەنت, ۇكىمەت ادىلەتتى قوعام ورناتۋعا, مو­نوپوليالاردى جويۋعا, ساياسي ترانس­فورماتسيا جاساۋعا, ەلىمىزدىڭ ەكو­نوميكالىق دامۋىن جەدەلدەتۋگە كۇش سالىپ جاتىر. وسى ىستەردەن قوعامنىڭ ءاربىر مۇشەسى شەت قالماۋعا ءتيىس. «باياندى بولاشاققا دا بىرگە قادام باسۋىمىز قاجەت. ءبىز وتكەندى اڭساۋمەن ءومىر سۇرمەۋىمىز كەرەك. كەرىسىنشە, كەلەشەگىمىزدى كەمەل ەتۋگە ۇمتىلىپ, ۇلتتىڭ ۇلىلىعىن ناقتى ىسپەن دالەلدەۋگە ءتيىسپىز. دۇنيە­تا­نىمىمىزعا جات مادەنيەتتەرگە كوزسىز ەلىكتەۋدەن, جالعان پاتريوتيزمنەن, داڭعويلىق پەن داراقىلىقتان ساق­تانۋىمىز كەرەك. حالقىمىزدىڭ بو­يىنداعى كەمشىلىكتەرگە كوز جۇما قاراماي, ودان ارىلۋىمىز قاجەت. مۇنىڭ ءبارى كۇن سايىن قۇبىلعان تۇر­لاۋ­سىز زاماندا ءومىر ءسۇرىپ جاتقان قازاقستاننىڭ كەلەشەگى ءۇشىن ايرىقشا ماڭىزدى», دەيدى پرەزيدەنت.

قاسىم-جومارت كەمەل ۇلىنىڭ جالپى­ۇلتتىق قۇندىلىقتار, ساپالى ۇلت قالىپتاستىرۋ جولدارى تۋرالى ايتقان ويلارىن دا قولدايمىن. راسىندا دا, ەڭبەكقورلىق, بىلىمپازدىق, كاسىبيلىك, بىرلىك, ىنتىماق, جاناشىرلىق, ىسكەر­لىك, باستاماشىلدىق, ادالدىق, قارا­پايىمدىلىق جانە ۇنەمشىلدىك قانا ءبىزدى تابىسقا جەتەلەيدى.

ءبارىمىز دە ەلدىڭ بولاشاعىن ويلايمىز. ەلىمىز امان, جۇرتىمىز تىنىش بولسا ەكەن دەيمىز. ول ءۇشىن بىزگە ەڭ باس­تىسى بىرلىك كەرەك.

جاراسباي سۇلەيمەنوۆ,

سولتۇستىك قازاقستان وبلىستىق قوعامدىق كەڭەس توراعاسى