مەن 1940 جىلى دۇنيەگە كەلىپ, ەسىمدى بىلگەننەن سوعىستان سانسىراپ شىققان ەلدىڭ ەڭسەسىن تۇزەۋگە اتسالىسقانداردىڭ ءبىرىمىن. ارينە, قوعامعا جاساعان قىزمەتىمىزدى بۇلدامايمىز. بىراق جارتى الەمدى جايپاعان سوعىستان كەيىن تىرلىككە ارالاسىپ, جۇرتپەن بىرگە تالاي قيىندىقتان وتكەن بىزگە قارتايعاندا الەۋمەتتىك جاعداي جاسالماي وتىر. مەن دە, وسى كۇنى قاتارى سيرەگەن مەنىڭ قاتارلاستارىم دا وسى ۋاقىتقا دەيىن ارناۋلى مەملەكەتتىك جاردەماقى الا الماي كەلەمىز.
2020 جىلى «ارداگەرلەر تۋرالى» العاشقى زاڭ قابىلدانعاندا بوركىمىزدى اسپانعا اتىپ قۋانىپ ەدىك. ماڭىزدى قۇجاتتىڭ 7-بابىنىڭ 4-تارماعىندا 1941 جىلعى 22 ماۋسىم – 1945 جىلعى 9 مامىر ارالىعىندا كەمiندە التى اي جۇمىس iستەگەن (قىزمەت وتكەرگەن) جانە ەكىنشى دۇنيەجۇزىلىك سوعىس جىلدارىندا تىلداعى قاجىرلى ەڭبەگi مەن مiنسiز اسكەري قىزمەتى ءۇشىن بۇرىنعى كسر وداعىنىڭ وردەندەرiمەن جانە مەدالدارىمەن ناگرادتالماعان ادامداردىڭ ەڭبەك ارداگەرىنە جاتاتىنى كورسەتىلگەن. زاڭنىڭ 12, 15-باپتارىندا ارداگەرلەردى الەۋمەتتىك قولداۋ شارالارى, قولداۋدى قارجىلاندىرۋ تۋرالى ايتىلعانى قۋانتىپ ەدى.
جەرگىلىكتى وكىلدى ورگاندار, ۇيىمداردىڭ باسشىلارى ءوز قۇزىرەتتەرى شەگىندە قوسىمشا الەۋمەتتىك قولداۋ شارالارىن جانە ەمدەلۋگە جول ءجۇرۋ (ەكى جاققا), سونداي-اق ارداگەرلەرگە جانە وسى زاڭنىڭ كۇشى قولدانىلاتىن باسقا دا ادامدارعا ماتەريالدىق جانە باسقا دا كومەك تۇرلەرىن كورسەتۋ بويىنشا جەڭىلدىكتەردى بەلگىلەي الادى دەگەنىنەن كوپ ءۇمىت كۇتىپ ەدىك. بىراق سونىڭ جۇزەگە اسۋى قيىن بولىپ تۇر.
جوعارىدا جازعانىمداي, ء«بارى دە مايدان ءۇشىن, ءبارى دە جەڭىس ءۇشىن» دەگەن جىلدارى ءبىز بەلىمىز قاتپاي جاتىپ ەڭبەككە ارالاستىق. ارناۋلى زاڭ قابىلدانعان سوڭ الەۋمەتتىك قولداۋدان دامەلەنىپ, جان-جاققا سۇراۋ سالدىم. وسىدان 5 جىل بۇرىن قازالىدان قىزىلورداعا قونىس اۋدارعاندىقتان قازالىعا حابار سالىپ, قۇجاتتارىمدى تۇگەلدەدىم. ءتيىستى ورىنداردىڭ بارىنە بارىپ شىقتىم, اياعىم جەتپەيتىن قاشىقتاعىلارىنا حات جازدىم. سونداعى بىلگەنىم, ءبىزدىڭ ماسەلەمىزدى قالا اكىمى جانىنداعى ارنايى كوميسسيا قارايدى ەكەن. ولارعا قالالىق ارداگەرلەر ۇيىمى ۇسىنىس جاسايتىن كورىنەدى. «جازعان قۇلدا شارشاۋ جوق» دەپ, ۇيىمعا دا باردىم. بىراق قالانىڭ ءبىر شەتىنەن تابانىم تاۋسىلىپ, نەشە بارعاندا توراعاسىن ورنىنان تابا الماي قاتتى قينالدىم. ءبىر قالادا ءجۇرىپ, التى اي تابىلماعان توراعا ۇستىنەن وبلىستىق ارداگەرلەر ۇيىمىنا شاعىمدانۋعا ءماجبۇر بولدىم. جارتى جىل جۇگىرگەن شارۋامدى جارتى ساعاتتا شەشكەن وبلىستىق ۇيىمداعىلاردىڭ ۇسىنىسىمەن قالالىق ارداگەرلەر ۇيىمى توراعاسى سۇلتانبەك تاۋىپباەۆ مەنى اقىرى قابىلدادى. قابىلداعانى بار بولسىن, مەنىڭ كوزىمشە ماماندارعا حابارلاسىپ, «بۇل ماسەلە مۇلدەم شەشىلمەيدى» دەپ ارىزىمدى وزىمە لاقتىرعانى جانىما باتتى. ارىزىما جازباشا جاۋاپ قايتارۋ جونىندەگى تالابىمدى قۇلاعىنا دا قىستىرعان جوق. سودان بەرى نەشە بارسام دا توراعا تاپتىرماي ءجۇر. وسىلايشا, ءبىر ادامنىڭ كەردەڭدىگىنىڭ كەسىرىنەن الەۋمەتتىك قولداۋ ىزدەگەن تالپىنىسىم تۇيىققا تىرەلىپ تۇر.
كارىم بايمۇرات,
زەينەتكەر
قىزىلوردا