جاڭا جىل مەملەكەت باسشىسىنىڭ ەلىمىزدىڭ باس گازەتىنە بەرگەن باعدارلامالىق سۇحباتىمەن باستالدى. اۋقىمدى سۇحبات بيلىكتىڭ بارلىق تارماقتارىنا ۇلكەن جاۋاپكەرشىلىك پەن جالپى قوعامعا ايتارلىقتاي وي سالادى.
ەل پرەزيدەنتى جۇرت اۋزىندا جۇرگەن اڭگىمەلەرگە اشىق پىكىرىن ءبىلدىرىپ, بىرقاتار ماسەلەلەر تۋرالى ويىن اشىق جەتكىزگەن. سونىڭ ىشىندە قاڭتار وقيعاسى, قوس بيلىك جانە ەسكى جۇيە تۋراسىنداعى كوپ قاۋەسەتتەرگە نۇكتە قويادى. مەملەكەت باسشىسى كوپ سوزدەن ارىلىپ, ەل بولىپ, بۇگىنىمىز بەن ەرتەڭىمىزگە بىلەك تۇرە جۇمىس ىستەيتىن ۋاقىت جەتكەنىن شەگەلەپ ايتقان.
ۇلۋ جىلىندا قازاقستاننىڭ حالىقارالىق دەڭگەيدەگى ۇلكەن شارالارعا ۇيىتقى بولۋى دا اسا ماڭىزدى. 2024 جىلى ەلىمىزدە بىرقاتار اۋقىمدى سامميت, فورۋمدار وتەدى. قازاقستان بىرنەشە بەدەلدى حالىقارالىق ۇيىمعا, اتاپ ايتساق, شانحاي ىنتىماقتاستىق ۇيىمىنا, ۇجىمدىق قاۋىپسىزدىك تۋرالى شارت ۇيىمىنا, ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە, تۇركى مەملەكەتتەرى ۇيىمىنا, ارالدى قۇتقارۋ حالىقارالىق قورىنا, ازىق-ت ۇلىك قاۋىپسىزدىگى جونىندەگى يسلام ۇيىمىنا توراعالىق ەتەدى. سونداي-اق مەملەكەت باسشىسى, دۇنيەجۇزىلىك كوشپەندىلەر ويىنىن وتكىزۋ دە ەلىمىز ءۇشىن ايتۋلى وقيعا بولماق ەكەنىن ايتتى. بايراقتى باسەكە ۇلتتىق سپورت پەن سالاماتتى ءومىر سالتىن دارىپتەۋ جاعىنان دا, ۇلى دالاداعى كوشپەلىلەر وركەنيەتىنىڭ مۇراگەرى سانالاتىن باۋىرلاس حالىقتاردىڭ مادەني-گۋمانيتارلىق بايلانىسىن ارتتىرۋ تۇرعىسىنان دا ماڭىزدى ەكەنى ءسوزسىز.
الەمدىك دەڭگەيدەگى ساياساتتانۋشىلار مەن ساراپشىلار ءححى عاسىر – «ازيا عاسىرى» دەگەندى ءجيى ايتىپ ءجۇر. ولاردىڭ ايتۋىنشا, ازيانىڭ بولاشاعى الەمنىڭ بولاشاعىنا اسەر ەتەدى. ىرگەمىزدەگى قىتايداعى تەحنولوگيالىق-وندىرىستىك ۇدەرىس وعان دالەل. ازيا مەن ەۋروپانى جالعاعان بىزدەر ءۇشىن دە بۇل زور مۇمكىندىك ەكەنىن پرەزيدەنت باسا ايتىپ وتىر: «ورتالىق ازيا – گەوساياسي احۋالعا قاتىستى ءوز پايىمى بار ءارى قارقىندى دامىپ جاتقان ايماق. بۇگىندە بۇل ءوڭىر ساۋدا, ينۆەستيتسيا, بيزنەس, يننوۆاتسيا ءۇشىن جاڭا مۇمكىندىكتەر ورنى بولىپ وتىر. سول سەبەپتى الەم ەلدەرى ورتالىق ازياعا ايرىقشا نازار اۋدارۋدا. «س5+» ۇلگىسى ماڭىزدى ديالوگ الاڭىنا اينالدى».
مەملەكەت باسشىسىنىڭ ايتۋىنشا, تۇراقتى ءارى ءوزارا سەنىمگە نەگىزدەلگەن جوعارى دەڭگەيدەگى ديالوگتەر بولماسا, ايماقتاعى مەملەكەتتەردىڭ باسقا دا ىقپالدى ەلدەرمەن قارىم-قاتىناسىن قارقىندى دامىتۋى نەعايبىل. سوڭعى جىلدارى بۇل باعىتتا ءبىرشاما ىلگەرىلەۋ بار. اسىرەسە, ورتالىق ازيا مەملەكەتتەرى باسشىلارىنىڭ جىل سايىنعى كونسۋلتاتيۆتىك كەزدەسۋلەرى ناتيجەلى ءوتىپ كەلەدى. قازاقستان توراعا رەتىندە بيىل دا وسىنداي ۇلگىدەگى كەزدەسۋ ۇيىمداستىرادى.
تاعى ءبىر ماڭىزدى شارا – استانا حالىقارالىق فورۋمى. بيىلعى ماۋسىم ايىندا وتەتىن القالى جيىنعا الەمنىڭ كوپتەگەن كوشباسشىسى مەن جاھاندىق دەڭگەيدەگى كومپانيالاردىڭ جەتەكشىلەرى قاتىسادى. جيىندا كليماتتىڭ وزگەرۋى, ازىق-ت ۇلىك تاپشىلىعى جانە ەنەرگەتيكالىق قاۋىپسىزدىك سياقتى بارشا ەلدەرگە ورتاق ماسەلەلەر تالقىلانادى. بۇگىندە الەم بۇرىن-سوڭدى بولماعان قيىندىقتارعا تاپ بولىپ وتىر. دەگەنمەن, كەز كەلگەن جۇيەلىك داعدارىس قاۋىپتەردىڭ كەڭ اۋقىمىن تۋدىرۋمەن قاتار, وزىمەن بىرگە جاڭا بىرەگەي مۇمكىندىكتەردى دە الىپ جۇرەدى. سوندىقتان بىزگە سول مۇمكىندىكتەردى جىبەرىپ الماۋ جولىندا كۇش بىرىكتىرىپ, بىرلەسە جۇمىس ىستەۋ ماڭىزدى.
بىلتىر تۇركىستانداعى ۇلتتىق قۇرىلتايدا ق.توقاەۆ ەلىمىزدىڭ تاعى ءبىر ايرىقشا بەلگىسى – كوشپەلىلەر وركەنيەتىنىڭ مۇراسىنا توقتالعان بولاتىن. «بۇل ءبىزدىڭ حالقىمىزدىڭ بۇكىل الەمگە تانىمال باستى برەندتەرىنىڭ ءبىرى. مەنىڭ باستامام بويىنشا V دۇنيەجۇزىلىك كوشپەلىلەر ويىندارى 2024 جىلى قازاقستاندا وتەدى. بۇل شارا ۇلتتىق سپورت تۇرلەرىن دامىتۋعا ىقپال ەتەدى. ءبىز بۇل حالىقارالىق جارىستاردى جوعارى دەڭگەيدە وتكىزۋگە ءتيىسپىز», دەگەن ەدى مەملەكەت باسشىسى. بۇگىنگى سۇحباتىندا دا وسى ماڭىزدى شاراعا ەرەكشە ءمان بەرىپ وتىر. شىنىمەن دە كوشپەلىلەر مادەنيەتىندە ءبىزدىڭ ەلىمىز – ۇلتتىق كودىمىزعا ورگانيكالىق تۇردە توقىلعان ءتۇرلى مادەنيەتتەردىڭ توعىسقان ورتالىعى جانە توعىسقان جەرى. قازاقستان استاناسىنا بارلىعى 100 ەلدەن 4 مىڭعا جۋىق قاتىسۋشى كەلمەك. ايتۋلى شارالار 20 جارىس جانە 10 كورنەكى سپورت ءتۇرى بويىنشا وتەدى. ولاردىڭ قاتارىندا ات جارىسى, ۇلتتىق كۇرەس تۇرلەرى, ءداستۇرلى ينتەللەكتۋالدىق ويىندار, جەكپە-جەكتەن جارىستار, ءداستۇرلى ساداق اتۋ, قۇس اۋلاۋدىڭ ۇلتتىق تۇرلەرى, ات جارىسى, حالىق ويىندارى, سونداي-اق ەتنوستىق سپورت تۇرلەرىنەن كورسەتىلىم قويىلىمدارى بار. تارتىستى سپورت تۇرلەرىنەن 110 مەدال جيىنتىعى ساراپقا سالىنادى. مۇنىڭ ءوزى – مەملەكەتىمىزدىڭ مەرەيىن ءوسىرىپ, ۇلتتىق كودىمىزدى كورسەتۋدە ۇلكەن مۇمكىندىك.
بيبىگۇل جەكسەنباي,
سەنات دەپۋتاتى