ۇلتتىق پارككە كىرۋدىڭ جاڭا ءتاريفى

سونىمەن, 2024 جىلى ۇلتتىق پارك اۋماعىنا كىرگەنى ءۇشىن الىناتىن الىم مىناداي كولەمدە بەلگىلەندى: جاياۋ جۇرگىنشىگە – 0,1 اەك (369 تەڭگە); موتوتسيكل, موپەد, كۆادروتسيكل ءۇشىن – 0,2 اەك (738 تەڭگە); جەڭىل اۆتوكولىككە – 0,3 اەك (1 108 تەڭگە); سىيىمدىلىعى 16 ورىنعا دەيىنگى شاعىن اۆتوبۋس پەن جۇك كولىگىنە – 1 اەك (3 692 تەڭگە); 32 ورىنعا دەيىنگى اۆتوبۋستارعا – 2 اەك (7 384 تەڭگە); 32-دەن اسا ورىندىقتى اۆتوبۋسقا – 3 اەك (11 076 تەڭگە).

ەرەكشە قورعالاتىن تابيعي اۋماق­تاردا ورنالاسقان ەلدى مەكەندەردە تۇرا­تىن جانە سول جەردە ورنالاسقان ساياجاي­لارى بار جەكە تۇلعالار تولەمنەن بوساتىلادى. بۋراباي, بۇلاندى جانە ەڭ­بەك­شىلدەر اۋداندارىنىڭ ۇلتتىق پارك اۋما­عىنان تىس ورنالاسقان ەلدى مەكەندەرىنىڭ حالقى جالپى نەگىزدە اقى تو­لەۋگە مىندەتتى. بۇل ۇلتتىق پاركپەن ىرگەلەس جەرلەردە تۇراتىندارعا دا قاتىستى.

1 قاڭتاردان باستاپ جەكە جانە زاڭدى تۇلعالاردىڭ اۆتوكولىك قۇرالدارىنان ۇلتتىق پارك اۋماعىندا بولعان ءاربىر كۇنى ءۇشىن تولەم الىنادى. ەرەكشە قورعالاتىن تابيعي اۋماقتاردى پايدالانعانى الىم­نىڭ اشىقتىعىن قامتاماسىز ەتىپ, سىبايلاس جەمقورلىق قاۋپىن ازايتۋ ءۇشىن «بۋراباي» مەملەكەتتىك ۇلتتىق پاركىندە 5 باقىلاۋ-وتكىزۋ بەكەتى اۆتوماتتاندىرىلدى. وتكىزۋ بەكەتتەرىنىڭ ءبارى ەكىنشى دەڭگەيلى بانكتەردىڭ تولەم قىزمەتىنە قوسىلعان (kaspi.kz, homebank, Jusan). ياعني تولەمدى تەرمينال ارقىلى دا, بانكتىك اۋدارىممەن دە جاساۋعا بولادى. ونلاين تولەۋ ءۇشىن بانكتەردىڭ QR-كودتارى قويىلعان. Kaspi.kz قوسىم­شاسىمەن تولەۋ ءۇشىن شوتىڭىزدى اقى­لى جولدارداعى سياقتى الدىن الا تولتىرۋعا بولادى. ونداي كەزدە ۇلتتىق پارك­تەن شىققاندا تولەم اۆتوماتتى تۇردە ەسەپشوتىڭىزدان الىنادى. تولەم بانكتىك اۋدارىممەن دە, قولما-قول دا جاسالادى.

وسى ورايدا باقىلاۋ-وتكىزۋ بەكەتىندە كەپتەلىس بولماۋى ءۇشىن مارشرۋتتى الدىن الا جوسپارلاپ, بۋراباي اۋىلىنداعى عانا ەمەس, باسقا دا وتكىزۋ بەكەتتەرىنەن دە شىعۋعا بولاتىنىن ەسكەرۋلەرىڭىزدى سۇرايمىز. اتاپ ايتقاندا, №1 وتكىزۋ بەكەتى – استانا – پەتروپاۆل تاس جولى جاعىندا; №2 وتكىزۋ بەكەتى – بۋراباي اۋىلىندا; №3 وتكىزۋ بەكەتى – ششۋچينسك قالاسى ارقىلى ششۋچينسك – بۋراباي كۋ­رورتتىق ايماعىنا كىرەر تۇستا; №4 وتكىزۋ بەكەتى – مەملەكەتتىك ۇلتتىق پارك اۋما­عىنا ششۋچينسك قالاسىنان «بالداۋرەن» وقۋ-ساۋىقتىرۋ ورتالىعى باعىتىنداعى كىرەبەرىستە; №5 وتكىزۋ بەكەتى – قاتاركول كولىنىڭ جانىنداعى پريوزەرنىي ورمان شارۋاشىلىعىنىڭ اۋماعىندا.

تاريف «ەرەكشە قورعالاتىن تابيعي اۋماقتار تۋرالى» قر زاڭىنىڭ 38-بابىنا وراي وزگەردى. كولىك قۇرالدارى ادامدارعا قاراعاندا قورشاعان ورتاعا كوبىرەك زيان كەلتىرەتىنى (اۋانى لاستايدى, زياندى حيميالىق زاتتار تارالادى, دىبىسى قاتتى) ەسكەرىلدى. ەرەكشە قورعالاتىن تابيعي اۋماقتارداعى تولەم رەس­پۋبليكالىق بيۋد­جەتكە تۇسەدى, «بۋرا­باي» مۇتپ-نىڭ مىندەتىنە ونى تەك جيناۋ كىرەدى.