قوستاناي وبلىسىنىڭ پوليتسەيلەرى شەتەلدىكتەن اقبوكەن مۇيىزدەرىن تاركىلەدى, دەپ حابارلايدى Egemen.kz Polisia.kz-كە سىلتەمە جاساپ.
«22 جەلتوقساندا «اقبوكەن» جەدەل الدىن الۋ شاراسىن جۇرگىزۋ بارىسىندا ەكاتەرينبۋرگ – الماتى رەسپۋبليكالىق اۆتوجولىندا قوستاناي قالاسىنان شىعا بەرىستەن وبلىستىق پد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جەرگىلىكتى پوليتسيا قىزمەتى باسقارماسىنىڭ قىزمەتكەرلەرىمەن بىرلەسىپ Toyota Alphard اۆتوكولىگىن توقتاتتى. اۆتوكولىكتى تەكسەرۋ بارىسىندا جۇكسالعىشتان 29 جاستاعى جولاۋشىعا, كورشى شەتەل ازاماتىنا تيەسىلى ءۇش جول سومكەسى تابىلدى. سومكەلەردە اقبوكەن ءمۇيىزى تۇرىندەگى 916 دەريۆات, 7,5 ميلليون تەڭگە سوماسىندا اقشالاي قاراجات بولدى. بولجام بويىنشا, قۇقىق بۇزۋشى مەملەكەتكە شامامەن 2 ميلليارد تەڭگە شىعىن كەلتىردى», دەلىنگەن اقپاراتتا.
وسى دەرەك بويىنشا پوليتسيا قر قك-ءنىڭ 339-بابى 3-بولىگى (سيرەك كەزدەسەتىن جانە قۇرىپ كەتۋ قاۋپى تونگەن, سونداي-اق پايدالانۋعا تىيىم سالىنعان وسىمدىكتەر مەن جانۋارلار تۇرلەرىنە, ولاردىڭ بولىكتەرىنە نەمەسە دەريۆاتتارىنا زاڭسىز قاراۋ) بويىنشا سوتقا دەيىنگى تەرگەپ-تەكسەرۋدى باستادى. بارلىق قاجەتتى تەرگەۋ شارالارى جۇرگىزىلىپ جاتىر. ءتيىستى ساراپتامالار كەشەنى تاعايىندالدى.