امەريكالىق اكتەر لەوناردو دي كاپريو قازاقستاندى كيىكتىڭ كوبەيۋىمەن قۇتتىقتادى. ول ارقاشان الەۋمەتتىك جەلىدەگى پاراقشاسىندا جويىلۋ قاۋپى جوعارى فاۋنا, فلورا بايلىقتارىن ەسكە سالىپ, قورعاۋعا ۇندەپ وتىرادى. لەوناردو دي كاپريو, ءتىپتى, ءوزىن Instagram پاراقشاسىندا اكتەر ءارى تابيعات قورعاۋشىسى دەپ تانىستىرادى, دەپ جازادى Egemen.kz.
ول كيىكتەر حالىقارالىق تابيعاتتى قورعاۋ وداعىنىڭ (IUCN) قىزىل تىزىمىندەگى «جويىلىپ كەتۋ قاۋپى تونگەن جانۋارلار» ساناتىنان «جويىلۋ قاۋپى از» ساناتىنا اۋىسقانىن ايتقان.
«بۇل بۇرىن-سوڭدى بولماعان جاعداي قازاقستانداعى اقبوكەن پوپۋلياتسياسىنىڭ ساقتالۋىن كورسەتەدى. 2005 جىلى ولاردىڭ سانى نەبارى 48 000 بولدى, ال قازىر 1,9 ميلليوننان استى. براكونەرلىككە قارسى كۇرەس باستامالارىنا, قۇقىقتىق ءتارتىپتى نىعايتۋعا جانە جاڭا قورعالاتىن اۋماقتاردى قۇرۋعا قوماقتى قاراجات بولگەن قازاقستان ۇكىمەتىن قۇتتىقتايمىز. ولاردىڭ تابيعاتتى قورعاۋ ۇيىمدارىمەن, ۋنيۆەرسيتەتتەرمەن جانە عالىمدارمەن ىنتىماقتاستىعى – بىرلەسكەن كۇش-جىگەردىڭ ارقاسىندا قول جەتكىزىلگەن تابيعاتتى قورعاۋ ىسىندەگى شىنايى تابىستىڭ مىسالى», دەپ جازدى اكتەر Instagram پاراقشاسىندا.
ايتا كەتەيىك, بۇعان دەيىن ەكولوگيا مينيسترلىگى قازاق دالاسىندا كيىكتىڭ قايتا كوبەيۋىنە بايلانىستى ولاردىڭ «جويىلۋ قاۋپى از جانۋارلار» ساناتىنا كوشىرىلگەنىن جاريالاعان بولاتىن.