بۇگىن قوستاناي وبلىسىندا پارلامەنت سەناتىنا دەپۋتاتتىققا ءوتۋ بويىنشا سايلاۋ ءوتتى. ناتيجەسىندە Amanat پارتياسى فيليالىنىڭ توراعاسى بيبىگۇل اققۇجينا اتالعان ايماقتان سەناتقا وكىل بولىپ سايلاندى, دەپ جازادى Egemen.kz ورتالىق سايلاۋ كوميسسياسىنىڭ سايتىنا سىلتەمە جاساپ.
كوميسسيا اقپاراتىنا سۇيەنسەك, قوستاناي وبلىسىنان سەناتقا دەپۋتات سايلانۋ ءۇشىن ءۇش كانديدات ۇمىتكەر رەتىندە تىركەلگەن.
ولاردىڭ ىشىندە بيبىگۇل اققۇجينا 193 سايلاۋشىنىڭ داۋىسىن الىپ سەناتقا ءوتتى.
ال ونىڭ قارسىلاستارى رۋدنىي ءماسليحاتىنىڭ دەپۋتاتى ازامات ىسقاقوۆقا – 27, قوستاناي اۋداندىق اۋرۋحاناسىنىڭ باس دارىگەرى ءالىمجان ءمىرمانوۆ 21 داۋىس جينادى. «بارىنە قارسىمىن» بەلگىسى بار بيۋللەتەندى 12 ادام تولتىرعان.
سونىمەن سەناتتىڭ سۋ جاڭا دەپۋتاتى تۋرالى نە بىلەمىز؟
اققۇجينا بيبىگۇل بەركۇتقىزى 1971 جىلعى 20 قاڭتاردا قوستاناي وبلىسىندا دۇنيەگە كەلگەن. ەڭبەك جولىن قوستاناي مەملەكەتتىك ۋنيۆەرسيتەتىندە پسيحولوگيا وقىتۋشىسى رەتىندە باستادى, جوعارى ءبىلىمىن دە وسى جەردەن الدى.
2000-2002 جىلدارى قر مەملەكەتتىك قىزمەت ىستەرى اگەنتتىگىنىڭ قوستاناي وبلىسى بويىنشا دەپارتامەنتىنىڭ مامانى بولىپ جۇمىس ىستەدى. 2002-2009 جىلدارى – قوستاناي وبلىسى اكىمدىگى ىشكى ساياسات باسقارماسى تالداۋ جانە مونيتورينگ جۇرگىزۋ ءبولىمىنىڭ باسشىسى.
2009-2016 جىلدارى قوستاناي وبلىسى اكىمدىگىنىڭ ىشكى ساياسات باسقارماسى باسشىسىنىڭ ورىنباسارى قىزمەتىن اتقاردى. قوستاناي قالاسى اكىمىنىڭ ورىنباسارى لاۋازىمىندا بولدى. 2017 – 2021 جىلدارى – قوستاناي وبلىسى اكىمدىگىنىڭ ىشكى ساياسات باسقارماسىنىڭ باسشىسى, وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى.
2021 جىلى Amanat پارتياسى قوستاناي وبلىستىق فيليالى توراعاسىنىڭ ءبىرىنشى ورىنباسارى قىزمەتىنە تاعايىندالدى. 2022 جىلدىڭ جەلتوقسان ايىنان وسى ۋاقىتقا دەيىن Amanat پارتياسى قوستاناي وبلىستىق فيليالىنىڭ توراعاسى قىزمەتىن اتقاردى.