ماجارستاننىڭ باس شاھارى بۋداپەشتتە شايبالى حوككەيدەن جاستار اراسىنداعى IA ديۆيزيونىنىڭ الەم چەمپيوناتى اياقتالدى. جاھاندىق دودادا قازاقستان قۇراماسى مەرزىمىنەن بۇرىن بىرىنشىلىكتىڭ باس جۇلدەسىن جەڭىپ الدى. جەرلەستەرىمىز باستاپقى ءتورت ويىندا ماجارستان, فرانتسيا, دانيا, جاپونيا قۇرامالارىن تىزە بۇكتىرسە, سوڭعى ماتچتا اۋستريا جاستارىنا بۋليتتەر سەرياسىندا ەسە جىبەردى. جارىس قورىتىندىسىندا سەرگەي ستارىگين شاكىرتتەرى 13 ۇپايمەن توپ جاردى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
جاستار قۇراماسىنىڭ اتالعان جەڭىسىنەن كەيىن قازاقستان تاريحي جەتىستىككە قول جەتكىزدى. اتاپ ايتقاندا, 2024 جىلى وتەتىن الەم چەمپيوناتىنىڭ ەليتالى ديۆيزيونىندا بىردەن ءۇش قۇرامامىز – ياعني, جاسوسپىرىمدەر, جاستار, ەرەسەكتەر اراسىنداعى ۇلتتىق قۇراما ونەر كورسەتۋ مۇمكىندىگىنە يە بولدى.
حوككەيشىلەردى جارقىن جەڭىستەرىمەن قۇتتىقتاعان تۋريزم جانە سپورت ءمينيسترى ەرمەك مارجىقپاەۆ بيىل شايبالى حوككەيدەن ءار جاستاعى ۇلتتىق قۇرامالارىمىز تاماشا ناتيجەگە قول جەتكىزىپ, تاريحتا العاش رەت الەم چەمپيوناتىنىڭ ەليتالى ديۆيزيونىندا وينايتىنىن, ەلىمىزدە شايبالى حوككەيدىڭ قارقىندى دامىپ كەلە جاتقانىن اتاپ ءوتتى.
ەسكە سالايىق, بيىل ءساۋىر ايىندا جاسوسپىرىمدەر قۇراماسى IA ديۆيزيونىنداعى الەم چەمپيوناتىندا ءبىرىنشى ورىندى يەلەنىپ, ەليتالى توپقا جوعارىلاعان. ال ەرەسەكتەر قۇراماسى توپتىق كەزەڭدە ءۇش رەت جەڭىسكە جەتىپ, ەليتالى توپتاعى ورنىن ساقتاپ قالدى جانە توپ-ديۆيزيوندا قاتارىنان ءتورتىنشى جىل ويناعالى وتىر.