مەملەكەت باسشىسى قاسىم-جومارت توقاەۆ «التىن ساپا» جانە «پارىز» سىيلىعىنىڭ لاۋرەاتتارىن ماراپاتتاۋ راسىمىندە بيزنەس وكىلدەرى مەن مەملەكەت اراسىنداعى قاتىناستىڭ جۇيەلى جولعا قويىلعانىن جەتكىزدى. سونداي-اق كاسىپكەرلىكتى دامىتۋدا كەزدەسەتىن كەدەرگىلەردى اۆتوماتتاندىرۋ تاسىلىنە توقتالدى, دەپ جازادى Egemen.kz اقورداعا سىلتەمە جاساپ.
پرەزيدەنت ەكونوميكانىڭ نەگىزگى كۇشىنە بالانىپ وتىرعان كاسىپكەرلىكتى ءجوندى-ءجونسىز تەكسەرۋ ازاياتىنىن ايتتى. بيزنەستى ينسپەكتسيالىق تەكسەرۋ ەندى ەكى ەسە قىسقارادى.
«ۇكىمەت پەن بيزنەس-قوعامداستىق بىرلەسىپ, كاسىپكەرلىكتى دامىتۋعا كەدەرگى كەلتىرەتىن ارتىق تالاپتاردى انىقتاۋ ءۇشىن اۋقىمدى جۇمىستار جۇرگىزدى. سونىڭ ناتيجەسىندە, 10 مىڭنان استام زاڭ نورماسى جاڭا رەتتەۋشى ساياساتتىڭ نەگىزگى تالاپتارىنا ساي كەلمەيتىنى انىقتالدى. بۇگىندە ونىڭ 90 پايىزى كۇشىن جويدى. قالعانى جىل سوڭىنا دەيىن رەتكە كەلتىرىلەدى.
سىن-قاتەرلەردى باسقارۋدىڭ اۆتوماتتاندىرىلعان جۇيەسى باقىلاۋشى ورگانداردىڭ بيزنەسكە قىسىمىن شەكتەۋدىڭ ماڭىزدى قۇرالىنا اينالادى. ول 2024 جىلدىڭ 1 قاڭتارىنان باستاپ ىسكە قوسىلادى جانە ادامنىڭ قاتىسۋىنسىز تەكسەرۋدى بەلگىلەۋگە مۇمكىندىك بەرەدى. ناتيجەسىندە, بيزنەسكە جوسپارلى ينسپەكتسيا جاساۋ ەكى ەسە قىسقارادى. ال ايىپپۇلدار سانى بىرنەشە ەسە ازايادى», دەدى قاسىم-جومارت توقاەۆ.
بۇگىندە بيزنەس پەن مەملەكەت اراسىنداعى ورنىقتى قاتىناسقا جاڭا ازىرلەنىپ جاتقان سالىق كودەكسى وڭ اسەر ەتپەك. كودەكس نەگىزىندە كاسىپكەرلەرگە سالىناتىن سالىق ءتارتىبى وڭتايلى تاسىلگە كوشپەك. جاڭا سالىق كودەكسى بيزنەس وكىلدەرىنىڭ كوپ جاعدايدا ايىپپۇل ارقالاۋىنان امان ساقتايدى.
«بيزنەس سۋبەكتىلەرىنىڭ سالىقتىق ەسەبىن 30 پايىزعا ازايتۋ جوسپارلانىپ وتىر. سالىقتىق تولەمدەر سانى كەم دەگەندە 20 پايىزعا وڭتايلاندىرىلادى. كولىك قۇرالدارىنا ارنالعان سالىق بويىنشا ەسەپ ايىرىسۋ مەن دەكلاراتسيا, سونداي-اق جەر مەن م ۇلىك سالىعىنا قاتىستى جۇكتەمە ءبىر ميلليون تەڭگەدەن از بولسا, ەسەپ ايىرىسۋ الىنىپ تاستالادى. كاسىپكەرلەردىڭ بانكتەردەگى شوتتارىن بۇعاتتاۋ كەزىندە ولاردىڭ سالىقتىق قارىزىنا تەڭ كولەمدەگى قارجىسىنا عانا شەكتەۋ قويىلادى», دەدى پرەزيدەنت «التىن ساپا» جانە «پارىز» سىيلىعىنىڭ لاۋرەاتتارىن ماراپاتتاۋ راسىمىندە.