پرەزيدەنت قاسىم-جومارت توقاەۆ «التىن ساپا» جانە «پارىز» سىيلىعىنىڭ لاۋرەاتتارىن ماراپاتتاۋ راسىمىندە ءسوز سويلەدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«بارشاڭىزدى «التىن ساپا», «پارىز», «قازاقستاننىڭ ۇزدىك تاۋارى» بايقاۋلارىنىڭ ءوز مارەسىنە جەتۋىمەن قۇتتىقتايمىن! ءبىز جىل سايىن وسى سالتاناتتى جيىندا ەل دامۋىنا ەلەۋلى ۇلەس قوسقان كاسىپكەرلەرگە قۇرمەت كورسەتەمىز. بۇل – تالاي جىلدان بەرى جاقسى داستۇرگە اينالعان ماڭىزدى ءىس-شارا. قازىر قازاقستاندا بيزنەس سالاسى قارقىندى دامىپ كەلەدى. بۇعان مەملەكەت تاراپىنان بارلىق جاعداي جاسالىپ جاتىر. شاعىن جانە ورتا بيزنەستىڭ ىشكى جالپى ونىمدەگى ۇلەسى 36 پايىزدان استى. بۇل – شىن مانىندە, جوعارى كورسەتكىش. وسى سالادا جۇمىس ىستەيتىن ادامداردىڭ سانى 4,3 ميلليونعا جەتتى. ياعني ەڭبەككە جارامدى ازاماتتاردىڭ 45 پايىزى دەگەن ءسوز», دەدى ق.توقاەۆ.
پرەزيدەنتتىڭ ايتۋىنشا, يندۋستريالاندىرۋ جۇمىسى سوڭعى جىلدارى جوعارى قارقىنمەن جۇزەگە اسىرىلىپ كەلەدى.
«بىلتىر وڭدەۋ ونەركاسىبىنىڭ ەكسپورتى 26 ميلليارد دوللاردان استى. بۇل – رەكوردتىق كورسەتكىش. وتكەن جىلى وسى سالاعا 1,5 تريلليون تەڭگە ينۆەستيتسيا تارتىلدى. وڭدەۋ كاسىپورىندارىن دامىتۋعا بارىنشا جاعداي جاسالدى. سونىڭ ناتيجەسىندە رەسپۋبليكالىق بيۋدجەتكە تۇسەتىن سالىق 5 ەسە ارتتى. وسىلايشا, بيزنەس وكىلدەرى مەملەكەتتىڭ سەنىمدى سەرىكتەسىنە اينالدى.
ءبىز بيىل جاڭا ەكونوميكالىق ۇلگىگە كوشە باستادىق. ەڭ الدىمەن, ەكونوميكامىزدا ادىلدىك بولۋعا ءتيىس. سوندىقتان بىرقاتار ماڭىزدى ماسەلەگە نازار اۋدارۋ قاجەت», دەدى ەل پرەزيدەنتى.