مادەنيەت جانە اقپارات مينيسترلىگى قولجازبالار جانە سيرەك كىتاپتار ۇلتتىق ورتالىعىندا «قازاقستانداعى جازبا مۇرالاردىڭ رەستاۆراتسياسى جانە ساقتاۋ ماسەلەلەرى» اتتى رەسپۋبليكالىق عىلىمي-تاجىريبەلىك سەمينار ۇيىمداستىرىلىپ, وعان ەلىمىز بويىنشا ارحيۆ سالاسىنىڭ بىلىكتى ماماندارى, كىتاپحانا جانە مۋزەي قىزمەتكەرلەرى قاتىستى.
بيىل ءۇشىنشى رەت وتكىزىلىپ وتىرعان سەميناردىڭ باستى ماقساتى – رەستاۆراتور, قور ساقتاۋشى مامانداردىڭ بىلىكتىلىگىن ارتتىرۋ جانە زامانعا ساي جاڭا تەحنولوگيالاردى مەڭگەرىپ, ورتاق تاجىريبە الماسۋعا مۇمكىندىك تۋدىرۋمەن قاتار, جازبا مۇرالاردى بولاشاققا امان جەتكىزۋدىڭ امال-ايلاسىن تالقىلاۋ.
بۇل رەتكى باس قوسۋدىڭ ءمانى تۋرالى بايانداعان قولجازبالار جانە سيرەك كىتاپتار ۇلتتىق ورتالىعىنىڭ ديرەكتورى جاندوس بولدىقوۆتىڭ ايتۋىنا قاراعاندا, مەكەمە قازىرگى تاڭدا زەرتحانالىق رەستاۆراتسيا جانە كونسەرۆاتسيا جۇمىستارىنىڭ تولىق تسيكلىن اتقارا الاتىن دەڭگەيگە جەتكەن. ياعني زەرتحانا قىزمەتكەرلەرى كەيىنگى جىلدارى بىلىكتىلىگىن ارتتىرۋ ءۇشىن تۇركيا, رەسەي, يران, ارمەنيا, كورەيا سەكىلدى ەلدەرگە بارىپ تاجىريبە الماسىپتى. ونىڭ سىرتىندا ورتالىق ماماندارى وتاندىق ءھام حالىقارالىق دەڭگەيدە ۇيىمداستىرىلعان سەمينارلارعا تۇراقتى قاتىسىپ, قاجەت جاعدايدا بايانداما جاسايتىن دارەجەگە جەتكەن. بۇلار بۇل جولى شەتەلدەن ۇيرەنگەن ءبىلىمى مەن تاجىريبەسىن وتاندىق ارىپتەستەرىمەن بولىسپەك ەكەن.
قازىرگى تاڭدا قولجازبالار جانە سيرەك كىتاپتار ۇلتتىق ورتالىعىنىڭ رەستاۆراتسيا ءبولىمىنىڭ ماماندارى كونە قولجازبالار مەن سيرەك كىتاپتاردى تازالاۋ, دەزينفەكتسيا جانە دەزينسەكتسيا جاساۋ, قالپىنا كەلتىرۋ, تۇپتەۋ, كونسەرۆاتسيالاۋ جۇمىستارىن ساپالى اتقارۋ ۇستىندە. ويتكەنى زەرتحانا اقش, ۇلىبريتانيا, كورەيا, يتاليا, جاپونيا, گەرمانيا سياقتى مەملەكەتتەردە وندىرىلگەن وزىق تەحنولوگيامەن جابدىقتالعان. ناتيجەسىندە, جازبا قۇجاتتاردى قالپىنا كەلتىرۋ زەرتحاناسى ىسكە قوسىلىپ, رەستاۆراتورلار زاماناۋي رەستاۆراتسيالىق ماتەريالداردى پايدالانۋ ارقىلى قاعاز قۇجاتتاردى جاڭعىرتۋ جۇمىستارىن جۇيەلى جۇرگىزىپ وتىر. اتاپ ايتار بولساق, اتاقتى مارال يشاننىڭ كەنەسارى حانعا تارتۋ ەتكەن قاسيەتتى قۇران كىتابىنا ورتالىق ماماندارى رەستاۆراتسيا جۇمىستارىن جۇرگىزىپ, ونى ەكى اي كولەمىندە تولىق قالپىنا كەلتىرىپتى.
ءسوزىمىزدى تۇيىندەپ ايتار بولساق, سەمينار بارىسىندا ارحيۆتىك قۇجاتتاردى قالپىنا كەلتىرۋ جانە كونسەرۆاتسيالاۋ ءۇشىن زاماناۋي جابدىقتاردى پايدالانۋ تۋرالى شەبەرلىك ساباقتارى ءوتىپ, ەڭ ءبىر پايدالى ءسات – جيىنعا قاتىسۋشىلار شەتەلدىك مامانداردىڭ بەينە باياندامالارىن تىڭدادى.