يلوننىڭ ينتەرنەتى

تسيفرلىق دامۋ, يننوۆاتسيا­لار جانە اەروعارىش ونەر­كا­سىبى مينيسترلىگى SpaceX كومپا­نيا­سىنىڭ كومەگىمەن شالعايداعى 10 اۋىلدىق مەكتەپتى عالامتورعا قوسپاقشى. Starlink جەلىسى قاناتقاقتى رەجىمدە كوكتال, كۇيگەن, قاراوي, جىڭىشكە, ەرەۋىل, كەنسۋ, سارىكول, تالدى, قاراعايلى, مايشۇقىر اۋىل­دارى­نىڭ مەكتەپتەرىندە جۇمىس ىستەيدى.

«اقمولا وبلىسى مايشۇقىر اۋىلىنىڭ باستاۋىش مەكتەبىندە 35 وقۋشى وقيدى. ەندى ولاردا قالالىق مەكتەپ وقۋشىلارى سياقتى قوسىمشا ساباقتار مەن ينتەرنەتكە قول جەتكىزۋ مۇمكىندىگى بار. Starlink ارقىلى قوسىلۋدىڭ تاعى ءبىر ارتىقشىلىعى – باعا مەكتەپتەردىڭ ينتەرنەتتەگى اعىم­داعى شىعىندارىنان قىمبات بولمايدى. ءتىپتى ارزانىراق. بايلانىس ساپاسى الدەقايدا جاقسى», دەپ حابارلادى تسيفر­لىق دامۋ, يننوۆاتسيالار جانە اەروعارىش ونەركاسىبى مينيستر­لىگىنىڭ ءباسپاسوز قىزمەتى.

مينيسترلىكتىڭ Starlink-ءتى­­ تاڭداۋىنىڭ 3 سەبەبى بار: شال­عاي ايماقتارعا قولجەتىمدى, جوعارى جىلدامدىق, تسيفرلىق ينفرا­قۇرىلىمدى دامىتۋ. مينيستر باعدات مۋسين Digital Bridge 2023 فورۋمىندا وتاندىق تەلەكوم-كومپانيالاردىڭ شالعايداعى مەكتەپتەردى ينتەرنەتپەن قامتا­ما­سىز ەتە الماعانىن ايتقان ەدى. ونىڭ تۇسىندىرۋىنشە, ۆەدومستۆو سول سەبەپتى يلون ماسكتىڭ كومپانياسىنا جۇگىنگەن.

– SpaceX ۆيتسە-پرەزيدەنتى لورەن درەيەر ەكەۋمىز پرەزي­دەنتكە سپۋتنيكتىك انتەننالار­ ارقىلى سەكۋندىنا 4 مەگابيت ينتەرنەت الاتىن شالعاي اۋداندارداعى 2000 مەكتەپتى Starlink-پەن التى اي ىشىندە قامتاماسىز ەتەتىنىمىزدى حابار­لادىق. وسىلايشا, مەكتەپ­تەردەگى ينتەرنەت ماسەلەسىن ءبىرجولا شەشە­مىز. كەيدە ەل ىشىندەگى ماسە­لە­لەردى ءوزىمىز شەشكىمىز كەلگەنمەن, قولدان كەلمەي جاتاتىنى بار. بۇلاي بولعانىنا كەشىرىم سۇرايمىن. بىراق SpaceX سياقتى دامىعان تەحنولوگيالار بار كەزدە, ولاردى قولدانباۋ دا قاتەلىك بولار ەدى, – دەدى ب.مۋسين.

جاقىندا عانا Kazinform پاۆلودار وبلىسىنداعى 20-عا جۋىق مەكتەپتى Starlink-كە قوسۋ دا جوسپارلانىپ وتىرعانىن حابارلاعان بولاتىن. بۇلار – ينتەرنەتكە كىرۋ مەن جەلى قوسۋ­دىڭ تەحنيكالىق مۇمكىندىگى جوق اۋىل­­دىق مەكتەپتەر. قوسىلۋ قۇنى ءبىر ابونەنت ءۇشىن ايىنا 200 دوللاردى نەمەسە 94 مىڭ تەڭگەنى قۇرايدى.

– بىزدە ماسەلەسى كوپ مەكتەپتەر بار. وندا مۇلدەم ينتەرنەت جوق دەپ ايتۋعا بولادى. وسى 21 مەكتەپتى جوعارى جىلدامدىقتى Starlink ينتەر­نە­تىمەن قامتاماسىز ەتكى­مىز كەلەدى. ولاردىڭ ينتەرنەتكە قول­ جەتكىزۋىن قامتاماسىز ەتۋ­دىڭ باسقا مۇمكىندىگى جوق. بۇل اۋىل­دارعا ەشكىم وپتيكا سالا المايدى. سەبەبى وتە قىم­بات, راديورەلەلىك ستانسالار بۇل ماسەلەنى تەحنيكالىق الەۋە­تىنىڭ جەتپەۋىنەن شەشە المايدى. اسىرەسە باياناۋىل اۋدانىندا تاۋلى جەرلەر بار, وندا جەر بەدەرىنىڭ ەرەكشەلىگىنە قاتىستى ساپالى سيگنال بەرۋ­دە قيىندىق كوپ, – دەيدى پاۆ­لو­دار وبلىستىق تسيفرلىق تەحنولوگيا­لار باسقارماسىنىڭ باسشىسى ەلنۇر وتەباەۆ.

ونىڭ ايتۋىنشا, قازىر پاۆلو­دار وبلىسىندا 352 اۋىلدىڭ 11-ىندە سىمدى نەمەسە ءموبيلدى جەلىگە قوسىلۋ مۇمكىندىگى جوق. مۇندا 1,1 مىڭنان استام ادام تۇرادى. ينتەرنەتكە قولجەتىمدى بىرقاتار اۋىل بار, بىراق ونىڭ ساپاسى مەن جىلدامدىعى ورتاشادان تومەن. ۇيدەگى ينتەرنەتكە قاتىستى ماسەلەلەر دە جەتكىلىكتى.