قازىرگى تاڭدا الماتى وبلىستىق «جاستار رۋحى» جاستار قاناتىنىڭ قاتارىندا 200-دەن استام ۆولونتەر بار. جاقسىلىق جاساۋعا نيەتتى جاستاردىڭ قاتارى ۋاقىت وتكەن سايىن كوبەيىپ كەلەدى.
سولاردىڭ ءبىرى – 20 جاستاعى نۇربەك ەرگەشباي «Amanat» پارتياسى جانىنداعى «جاستار رۋحى» جاستار قاناتىنىڭ ۆولونتەرى رەتىندە بىرقاتار ىزگى ىستەردىڭ بەل ورتاسىنان كورىنىپ جۇرگەن جاس. جاس تا بولسا جاقسىلىق جاساۋعا قۇمار ول ۆولونتەرلىك جۇمىستارعا اتسالىسۋدى 2019 جىلى باستاعان. سودان بەرى ءوڭىر اۋماعىندا «جاستار رۋحى» جاستار قاناتىنىڭ ۇيىمداستىرۋىمەن «ارداگەرلەردى ارداقتايىق», «كەدەرگىسىز كەلەشەك», «قۋانىش سىيلا», «تازاLike» ەكولوگيالىق اكتسياسى جانە «قاۋىپسىز قوعام» اتتى ءىس-شارالارعا بەلسەنە اتسالىسىپ كەلەدى.
نۇربەك العاشقى ۆولونتەرلىك جۇمىسىن ورتتەن زارداپ شەككەن قوستاناي جۇرتىنا كومەك بەرۋدەن باستاعان. قالا تۇرعىندارى مەن قوعام بەلسەندىلەرىنىڭ اكەلگەن ءاربىر زاتتارىن ىرىكتەپ, مەجەلەگەن جەرگە جەتۋىن قاداعالاعان جاس ءوزىنىڭ اتىنان دا كيىم-كەشەك پەن توسەك جابدىقتارىن جىبەرىپ, گۋمانيتارلىق كومەك كورسەتۋدە ايانىپ قالماعان. سودان بەرى قايىرىمدىلىق جاساۋ, قينالعانعا قولۇشىن بەرۋدەن جاڭىلعان ەمەس.
«كەدەرگىسىز كەلەشەك» جوباسى اياسىندا از قامتىلعان وتباسىلارعا ازىق-ت ۇلىك سەبەتتەرىن جەتكىزۋ جانە «قۋانىش سىيلا» اكتسياسى اياسىندا مۇمكىندىگى شەكتەۋلى بالالارعا سىيلىقتار اپارىپ, كونتسەرتتىك باعدارلامالار جاساۋ ارقىلى قامكوڭىل بالالاردى قۋانتقان.
سونداي-اق «تازاLike» ەكولوگيالىق اكتسياسىندا دا ۆولونتەرلەر قوناەۆ اتالارىنىڭ ەسىمى بەرىلگەن قالانىڭ تازالىعىن ساقتاپ, ءار اپتا سايىن سەنبىلىكتەر جاساۋدى قولعا العان. «جاستار رۋحى» جاستار قاناتىمەن بىرگە «تاڭبالى تاس» اتتى تاريحي ورىندى تازالاۋعا 100-دەن اسا ۆولونتەر قاتىسقان.
«جاستار اراسىندا بەلەڭ الىپ وتىرعان كەلەڭسىز ماسەلەلەردىڭ ءبىرى – زورلىق-زومبىلىق جانە ۆانداليزم. وسى جاعدايعا بايلانىستى قوناەۆ قالاسىنىڭ جەرگىلىكتى پوليتسيا باسقارماسىمەن بىرلەسىپ, تۇنگى جانە كۇندىزگى رەيدتتەرگە شىعامىز. ۆولونتەرلىك جۇمىس وتە قىزىق, قانشاما جانعا كومەك كورسەتەسىڭ, ولاردىڭ العىسىن الاسىڭ. «باتامەن ەل كوگەرەر, جاڭبىرمەن جەر كوگەرەر» دەمەكشى, ۇلكەندەردىڭ باتاسىن الىپ جۇمىسىمىزدى جۇرەك قالاۋىمەن اتقارامىز», دەگەن ن.ەرگەشباي ۆولونتەرلىك جۇمىستى اتقارا ءجۇرىپ پارتيا جانە مەملەكەت باسشىسىنىڭ العىسحاتتارىمەن ماراپاتتالعانىن دا ماقتانىشپەن جەتكىزدى.
الماتى وبلىسى