كۇن سايىن قازاقستاندا قىزىلشانىڭ 300-گە جۋىق جاعدايى تىركەلەدى, نەگىزگى سىرقاتتانۋشىلىق ۆاكتسيناتسيالانباعان ادامداردىڭ ەسەبىنەن تىركەلەدى. بۇل تۋرالى 6 جەلتوقساندا وكق-دا وتكەن ساراپتامالىق بريفينگتە قر دسم ۇلتتىق قوعامدىق دەنساۋلىق ساقتاۋ ورتالىعىنىڭ باسقارما توراعاسى مانار سماعۇل مالىمدەدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
جىل باسىنان بەرى ەلىمىزدە قىزىلشانىڭ 20 188 جاعدايى تىركەلدى, ونىڭ ىشىندە 81% (16351) – 14 جاسقا دەيىنگى بالالاردىڭ, 3,4% (706) – جاسوسپىرىمدەردىڭ, 15,4% (3131) – ەرەسەكتەردىڭ اراسىندا.
قىزىلشا اۋرۋى بارلىق وڭىرلەردە تىركەلدى. شىمكەنت قالاسىندا جوعارى دەڭگەي بايقالدى – 3069 جاعداي (100 مىڭ حالىققا شاققانداعى كورسەتكىش – 263,5), الماتى قالاسىندا – 3010 جاعداي (136,5), جامبىل – 2724 جاعداي (224,0), ماڭعىستاۋ – 1701 (218,0), الماتى – 1812 (119,0), اتىراۋ – 1377 (196,6), اقتوبە – 1485 (158,7), قىزىلوردا وبلىستارىندا – 1182 جاعداي (139,8).
«جالپى رەسپۋبليكا بويىنشا اۋرۋ بالالار اراسىندا ۆاكتسيناتسيالانباعان بالالاردىڭ ۇلەسى 83,6% -دى قۇرادى (13 670 جاعداي)», دەدى مانار سماعۇل.
مانار سماعۇل قىزىلشاعا قارسى ۆاكتسينا 60 جىل بويى قولدانىلىپ كەلە جاتقانىن جانە اۋرۋدىڭ تارالۋىن توقتاتۋ ءۇشىن ۇسىنىلعانىن اتاپ ءوتتى. سونىمەن قاتار اتا-انالاردى بالالاردى قىزىلشاعا قارسى ۋاقتىلى ۆاكتسيناتسيالاۋعا, 6-10 ايلىق جانە 2-5 جاس ارالىعىنداعى بالالارعا قوسىمشا يممۋنداۋعا شاقىردى.