بۇگىن سەنات دەپۋتاتتارى تۇركى اكادەمياسىنا ارنايى باردى, دەپ جازادى Egemen.kz.
جوعارعى پالاتانىڭ حالىقارالىق قاتىناستار, قورعانىس جانە قاۋىپسىزدىك كوميتەتى دەلەگاتسياسىن تۇركى اكادەمياسىنىڭ پرەزيدەنتى شاھين مۇستافاەۆ قابىلدادى.
كەلەلى كەزدەسۋگە تۇركى اكادەمياسىنىڭ پرەزيدەنتى شاھين مۇستافاەۆ, قازاقستان رەسپۋبليكاسى پارلامەنتى سەناتىنىڭ دەپۋتتارى دارحان قىدىرالى, عالياسقار سارىباەۆ, اليشەر ساتۆالديەۆ, گەننادي شيپوۆسكيح, تۇركى اكادەمياسىنىڭ ۆيتسە-پرەزيدەنتى اسحات كەسىكباەۆ, اكادەميا پرەزيدەنتىنىڭ كەڭەسشىسى تىلەۋجان سەكسەنباي قاتىستى.
كەزدەسۋ بارىسىندا تاراپتار تۇركى دۇنيەسىنە ورتاق ماسەلەردى, اتاپ ايتقاندا عىلىم جانە ءبىلىم, مادەني-گۋمانيتارلىق بايلانىستار, سونىمەن قاتار, عىلىمي يننوۆاتسيا سالالارى بويىنشا پىكىر الماستى.
اكادەميا باسشىسى ش. مۇستافاەۆ ۇيىمنىڭ قىزمەتى مەن جۇزەگە اسىرىلىپ جاتقان عىلىمي جوبالار تۋرالى اقپارات بەردى. سونداي-اق ول تۇركى اكادەمياسىنىڭ جۇمىس باعىتىنىڭ گۋمانيتارلىق سالادا عانا شەكتەلمەي, اۋقىمىن باسقا عىلىم باعدارلارىندا كەڭەيتۋ ماقساتىندا جاڭا باستامالاردى قولعا العانىن جانە اتالعان جوبالارعا قازاقستاندىق عالىمداردىڭ دا اتسالىسىپ جاتقانىن اتاپ ءوتتى.
ءوز كەزەگىندە كوميتەت حاتشىسى دارحان قىدىرالى ءوزارا عىلىمي ينتەگراتسيانى دامىتۋدىڭ ارقاسىندا تۇركى حالىقتارىنىڭ بىرلىگى نىعايىپ, قازىرگى تاڭدا الەمدىك قاۋىمداستىقتا بەدەلى ارتىپ كەلە جاتقانىن ايتتى.
وسى ورايدا ول باۋىرلاس ەلدەردىڭ مەملەكەت باسشىلارى تۇركى الەمى ىنتىماقتاستىعىنىڭ دامۋىنا باسا نازار اۋداراتىن, سونىمەن قاتار الداعى ۋاقىتتا دا قازاقستان تاراپىنىڭ تۇركى اكادەمياسىنىڭ اتالعان باعىتتاعى باستامالارىنا قولداۋ كورسەتەتىنىن جەتكىزدى.
«جۋىردا استانا قالاسىندا وتكەن تمۇ مەرەيلى 10-شى سامميتىندە مەملەكەتتەرىمىزدىڭ باسشىلارى باۋىرلاس ەلدەرىمىز اراسىنداعى ءوزارا ءىس-قيمىلدى ودان ءارى دامىتۋعا باعىتتالعان ماڭىزدى شەشىمدەر قابىلدادى. بۇل رەتتە قازاقستان پارلامەنتى دە ءوز تاراپىنان عىلىمي ينتەگراتسيانى نىعايتۋعا زاڭنامالىق جانە باسقا تاراپتاردان قولداۋ كورسەتۋگە دايىن», دەدى د. قىدىرالى.
كەزدەسۋ سوڭىندا سەنات دەپۋتاتتارى تۇركى اكادەميانىڭ بۇعان دەيىن اتقارعان جۇمىستارىنا جانە كەيىنگى كەزدەرى قولعا العان جوبالارىنا جوعارى باعا بەرىپ, ۇيىم باسشىسىنا ريزاشىلىعىن ءبىلدىردى.
ءوز كەزەگىندە اكادەميا باسشىسى جوعارى پالاتا دەلەگاتسياسىنا ۇيىمنىڭ 2023 جىلعى اتاۋلى داتالار بويىنشا باسىپ شىعارعان ەڭبەكتەرىن تارتۋ ەتتى.
سونىمەن قاتار مارتەبەلى قوناقتار تۇركى مۇراجايى مەن كىتاپحاناسىن ارالاپ, وندا ساقتالعان بەلگىلى تۇركولوگتاردىڭ جەكە زاتتارىمەن, قولجازبا جانە كىتاپ قورلارىمەن تانىستى.