جاقىندا استانا قالاسىنداعى دەنە شىنىقتىرۋ جانە بۇقارالىق سپورت اكادەمياسىنا حالىقارالىق اباي اتىنداعى مادەنيەت پەن ونەردى قولداۋ قورىنىڭ ديرەكتورى اسلان عافۋروۆ باستاعان توپ قوناققا كەلدى.
سپورت اكادەمياسىندا وتكەن دوڭگەلەك ۇستەلگە جوعارى وقۋ ورنىنىڭ رەكتورى بولاتبەك دۇكەتاەۆ, اكادەميانىڭ پرورەكتورلارى ايبول كولباەۆ, تۇرسىنزادا قۋانعاليەۆا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانىنداعى «اباي» اكادەمياسى عزي جەتەكشىسى جاندوس اۋباكىر جانە اقپارات قۇرالدارى وكىلدەرى, عالىمدار قاتىستى.
– اباي دانىشپان ۇلتتىق سپورت تۇرلەرىنە دە بەيجاي قاراماعان. بايگە اتتارىن ۇستاعان, كوكپار دەسە ەلەڭدەپ, ۇيىندە وتىرا الماعان. كوكپارشىلارعا اقىل-كەڭەس بەرىپ وتىرعان. ءبىزدىڭ استاناداعى سپورت اكادەمياسىنا كەلىپ, مەموراندۋمعا قول قويۋداعى ماقساتىمىز – ءبىلىم الىپ جاتقان جاستاردىڭ بويىندا ەلى مەن جەرىن سۇيەتىن قاسيەت قالىپتاستىرىپ, سپورتتا جاقسى ناتيجەلەرگە جەتۋ, – دەدى ا.عافۋروۆ.
اكادەميا رەكتورى بولاتبەك اسىلبەك ۇلىنىڭ ايتۋىنشا, اشىلعانىنا نەبارى ەكى جىل بولعان وقۋ ورنىندا بۇل كۇندەرى 800-گە تارتا سپورت ساڭلاقتارى مەن بولاشاق باپكەرلەر ءبىلىم الىپ جاتىر.
مەموراندۋم اياسىندا تاراپتار عىلىمي-ادىسنامالىق, اقپاراتتىق, ساراپتامالىق قىزمەت سالاسىندا, سونداي-اق سپورت سالاسىندا ۇلتتىق قۇندىلىقتار نەگىزىندە بىرلەسكەن جوبالاردى جۇزەگە اسىرۋ, كونفەرەنتسيالار, دوڭگەلەك ۇستەلدەر ۇيىمداستىرۋ, كونسۋلتاتسيالىق كومەك كورسەتۋ باعىتىندا ىنتىماقتاستىق ورناتپاق. ۇلتتىق سپورت تۇرلەرىنەن ءتۇرلى دەڭگەيدەگى ءدۇبىرلى جارىستاردى ءجيى وتكىزىپ تۇرۋ باستى نازاردا بولماق.
سپورت اكادەمياسى مەن «اباي» قورى وسىلايشا يگىلىكتى ءىستى قولعا الدى. ءىس-شارا بارىسىندا اكادەميا ستۋدەنتتەرى ابايدىڭ قارا سوزدەرىنە نەگىزدەلگەن قويىلىم قويىپ, وزدەرىنىڭ ءبىلىمدى ەكەنىن كورسەتتى.
وڭداسىن ەلۋباي,
جۋرناليست
استانا