الماتى وبلىسىنىڭ ورتالىعى قوناەۆ قالاسىندا شاحماتتان «Konaev Cup-2023» ءىى حالىقارالىق ءتۋرنيرى ءوتتى. بۇل جارىستا 14 ەلدەن كەلگەن 53 شاحماتشى باق سىنادى. ولاردىڭ قاتارىندا اقش, يران, بەلارۋس, ءۇندىستان, يزرايل, ۋكراينا, ازەربايجان, ارمەنيا, رەسەي, گرۋزيا, تاجىكستان, قىرعىزستان, وزبەكستان جانە قازاقستاننىڭ اتاقتى گروسسمەيستەرلەرى مەن جاس ويىنشىلارى بار.
ءدۇبىرلى دودانىڭ اشىلۋ راسىمىندە «ەلىمىزدە شاحماتتىڭ دامۋىنا مەملەكەتتىك دەڭگەيدە قولداۋ كورسەتىلىپ كەلەدى. ەل پرەزيدەنتى قاسىم-جومارت توقاەۆ قازىرگى قوعامعا ينتەللەكتى جوعارى, تەرەڭ ويلايتىن ادامدار قاجەت ەكەنىن ۇنەمى ايتادى. شاحمات – اقىل-ويدى دامىتۋشى دارا ويىن. «Konaev Cup» ءتۋرنيرى قازاقستانداعى شاحماتتى دامىتۋدا ۇلكەن ءرول اتقارادى. وسىنداي ماڭىزدى جارىستاردى ۇيىمداستىرۋ حالىقتىڭ سپورتقا دەگەن قىزىعۋشىلىعىن ارتتىراتىنى ءسوزسىز. قازىرگى كەزدە قوناەۆ قالاسى ءىرى سپورتتىق شارالاردى وتكىزۋ ارقىلى الەمدىك سپورت جۇلدىزدارىن شوعىرلاندىراتىن ورتالىق رەتىندە تانىلىپ كەلەدى», دەدى الماتى وبلىسىنىڭ اكىمى مارات سۇلتانعازيەۆ.
وسى سالتاناتتى ءىس-شارا بارىسىندا وبلىس باسشىسى جاقىندا عانا يتالياداعى الەم چەمپيوناتىندا كۇمىس جۇلدەگەر اتانعان ەلناز قالياحمەتتى قۇتتىقتادى. ال قازاقستان شاحمات فەدەراتسياسىنىڭ ۆيتسە-پرەزيدەنتى مارات ەسەنوۆ سپورتتىڭ وسى ءتۇرىنىڭ دامۋىنا بارىنا ۇلەس قوسىپ جۇرگەن الماتى وبلىسىنىڭ ازاماتتارىنا ءوز ريزاشىلىعىن بىلدىرە وتىرىپ: «بۇگىن ءبىز ءبىرىنشى كەزەكتە شاحمات ويىنىنىڭ قۇندىلىعىن تاعى ءبىر كورسەتۋ ءۇشىن جينالىپ وتىرمىز. 2019 جىلى قازاقستان الەمدىك شاحمات استاناسى اتانىپ, سول كەزدە ەلىمىزدە كوماندالىق الەم چەمپيوناتى ۇيىمداستىرىلدى. سودان بەرى رەسپۋبليكامىزدا ءتۇرلى حالىقارالىق جارىس وتكىزىپ, ءبىزدىڭ ورەندەرىمىز اقش, يسپانيا, ازەربايجان, ءۇندىستاننىڭ ۇزدىك ويىنشىلارىمەن تەڭ دارەجەدە ونەر كورسەتتى. بۇگىنگى تۋرنيرگە كەلەر بولساق, ەكىنشى جىل قاتارىنان ساڭلاقتار قوناەۆ قالاسىندا باس قوسىپ وتىر. بۇل – جاس سپورتشىلارعا وزدەرىن جاقسى قىرىنان كورسەتۋ ءۇشىن تۋىنداپ وتىرعان تاماشا مۇمكىندىك», دەپ اتاپ ءوتتى.
اتالعان جارىستىڭ چەمپيوندىق اتاعىن ەڭ تاڭداۋلى 12 گروسسمەيستەر ساراپقا سالدى. 11 كەزەڭگە سوزىلعان سايىستىڭ قورىتىندىسى بويىنشا باس جۇلدە مەن 500 مىڭ تەڭگەلىك اقشالاي سىيلىققا اقش-تان ات تەرلەتىپ كەلگەن گروسسمەيستەر تيمۋر گارەەۆ يە بولدى. ول – ەكى بىردەي وليمپياداعا قاتىسقان ساقا ويىنشى. ەكىنشى جانە ءۇشىنشى ورىندى ازەربايجاندىق ۆۋگار راسۋلوۆ پەن قازاق شاحماتشىسى ازامات وتەعاليەۆ يەلەنسە, ۇزدىك بەستىكتى ارمەنيالىق مانۋەل پەتروسيان مەن يراندىق بارديا دەنەشۆار تۇيىندەدى.