بيىل استاناداعى الماتى اۋدانى ارداگەرلەرىنىڭ «ەلوردا» حالىقتىق قورىنىڭ قۇرىلعانىنا 15 جىل تولدى. وسىعان وراي اتالعان ونەر ۇجىمىنىڭ مەرەيتويلىق كونتسەرتى ءوتتى.
2008 جىلى «الاش اماناتى» قوعامدىق بىرلەستىگى جانىنان قۇرىلعان ارداگەرلەر ءانسامبلى كەيىن حورعا اينالىپ, قالا تۇرعىندارىنا لەزدە تانىمال بولدى. اتالعان ونەر ۇجىمى باس شاھاردا وتەتىن ءتۇرلى مادەني ءىس-شارالارعا بەلسەنە قاتىسادى. اسىرەسە قالا مەكتەپتەرى مەن جوعارى وقۋ ورىندارىندا وقۋشىلارمەن, ستۋدەنتتەرمەن كەزدەسىپ, حالقىمىزدىڭ عاجايىپ باي ونەرىن ناسيحاتتاپ جۇرگەنىن ەرەكشە ايتۋعا بولادى. ءبىر جاعىنان, «ەلوردا» حالىقتىق ارداگەرلەر حورى كىندىك قالامەن عانا شەكتەلمەي, ەلىمىزدىڭ باسقا دا وڭىرلەرىنە بارىپ, ءوز ونەرلەرىن كورسەتىپ ءجۇر. ماسەلەن, اقمولا وبلىسىنىڭ بىرنەشە اۋدانىنا بارىپ, كونتسەرت قويدى. ودان قالدى شىعىس قازاقستان وبلىسىنداعى تابيعاتى كوركەم كاتونقاراعاي اۋدانىنا گاسترولدىك ساپارمەن بارىپ, ءبىر اپتا سول ەل تۇرعىندارىنا ونەر كورسەتتى. اۋدان باسشىلارى دا ەلوردادان بارعان ارداگەرلەر حورىن قۇشاق جايا قارسى الدى. 2021 جىلى ونەر ۇجىمىنا قازىرگى مادەنيەت جانە اقپارات مينيسترلىگىنىڭ بۇيرىعىمەن «حالىقتىق حور» اتاعى بەرىلدى. مۇنى حور ونەرپازدارىنا كورسەتىلگەن قۇرمەت دەپ بىلەمىز.
قازىرگى تاڭدا حور قۇرامىندا مۇعالىم, دارىگەر, ينجەنەر, قۇرىلىسشى, مەملەكەتتىك قىزمەتكەر دەيسىز بە, قىسقاسى, ءتۇرلى ماماندىق يەلەرى بار. ولاردىڭ جاس مولشەرى 65-تەن 81 جاسقا دەيىنگى ارالىقتى قامتيدى. حور ۇجىمىنىڭ نەگىزگى ماقساتى – وسكەلەڭ ۇرپاقتىڭ بويىنا قازاقتىڭ ءانى مەن كۇيىن, سالت-ءداستۇرىن ءسىڭىرۋ.
مەرەيتويلىق كونتسەرت شىمىلدىعى «ەلوردا» حالىقتىق ارداگەرلەر حورىنىڭ انۇرانىمەن اشىلدى. بۇل تۋىندىنىڭ ءسوزىن ەسەنبەك ساتباەۆ, مۋزىكاسىن جەكەن تەبەرىكوۆ جازعان. اسەم ءان حور مۇشەلەرىنىڭ ورىنداۋىندا تىڭدارمان جۇرەگىنە بىردەن جول تاپتى. سونداي-اق ساحنادا جەكە داۋىستا ايگۇل دۇيسەباەۆا, باقىتجان جۇقاتاەۆا, اقىنگۇل المۇقانقىزى, فاريدا الداجانوۆا, ءبيبى قابىلشاەۆا سەكىلدى اپالارىمىز سالعان اندەردى دە جۇرتشىلىق وتە جىلى قابىلدادى. اسىرەسە بازارباي دانەعۇلوۆ اعامىز ۇلت ۇستازى احمەت بايتۇرسىن ۇلىنىڭ «اققۇم» ءانىن زور داۋسىمەن بابىنا كەلتىرىپ شىرقاعاندا دەلەبەسى قوزباعان جان قالمادى. ەسەنبەك ساتباەۆ مايلىقوجانىڭ تەرمەسىمەن تىڭدارمانداردى ءبىر سەرپىلتتى. ايەلدەر ۆوكالدىق توبىنىڭ ءشامشى قالداياقوۆ اندەرىنەن ورىندالعان پوپۋرري دە جيىلعان قاۋىمعا قاتتى ۇنادى.
جالپى, «ەلوردا» حالىقتىق ارداگەرلەر حورىنىڭ مۇشەلەرى مەرەيتويلىق كونتسەرتكە وتە تىڭعىلىقتى دايىندالعان. ۇلتتىق كيىمدەرىمەن اتالارىمىز بەن اپالارىمىز شىعا كەلگەندە, ساحنا وزگەشە تۇرگە بولەندى. بۇل جەردە حور جەتەكشىسى, ەڭبەك ارداگەرى ءۇمىت دۇيسەنوۆا مەن حوردىڭ كوركەمدىك جەتەكشىسى, مادەنيەت قايراتكەرى جەكەن تەبەرىكوۆتىڭ ەڭبەگى زور ەكەنىن ايتا كەتەيىك. ويتكەنى حور مۇشەلەرىنىڭ ورىنداعان شىعارمالاردىڭ تىڭدارمانعا جەتۋى, داۋىستارىنىڭ انىقتىعى كاسىبي شەبەرلەردەن ەش كەمدىگى جوق. ولار ءيىرىمى تەرەڭ تۋىندىلاردىڭ ءوزىن تىڭدارمانعا كەرەمەت جەتكىزە ءبىلدى. حور ونەرپازدارىنىڭ كونتسەرتتى مۋزىكاسىن كورنەكتى كومپوزيتور ەسكەندىر حاسانعاليەۆ, ءسوزىن اتاقتى اقىن قادىر مىرزا ءالى جازعان «اتامەكەن» انىمەن قورىتىندىلاۋى دا وتە ءساتتى شىقتى.
سونداي-اق كەش اياسىندا ونەر ۇجىمىنىڭ وتكەن تاريحى, مۇشەلەرى تۋرالى باياندالعان «ونەردى اسقاقتاتقان «ەلوردا» حالىقتىق حورى» اتتى كىتاپتىڭ تۇساۋى كەسىلدى. تۇساۋكەسەردە ءسوز العان الماتى اۋدانى ارداگەرلەر كەڭەسىنىڭ توراعاسى مارات مۇستافين بۇل جيناقتىڭ مازمۇنى ەرەكشە ەكەنىن اتاپ ءوتتى. جيناقتىڭ اۆتورى – ولكەتانۋشى, ەرەيمەنتاۋ اۋدانىڭ قۇرمەتتى ازاماتى ماناپ ادىرەشەۆ.