ورتالىق كوممۋنيكاتسيالار قىزمەتىندە وتكەن بريفينگتە تۇركىستان وبلىسىنىڭ اكىمى دارحان ساتىبالدى قوجا احمەت ياساۋي كەسەنەسىنە لاڭكەستىك ارەكەت جاسالماق بولعانىن ايتتى. وسى وقيعادان كەيىن اكىمدىك كەسەنەگە ستراتەگيالىق مارتەبە بەرۋدى سۇراپ ۇكىمەتكە ارنايى حات جولداعان, دەپ جازادى Egemen.kz.
تۇركىستان وبلىسىنىڭ اكىمى كەسەنە اۋماعىندا تەراكت جاساۋ ارەكەتى قايتالانباسىنا ەشكىم كەپىلدىك بەرە المايتىنىن تىلگە تيەك ەتتى. وسىعان وراي, تۇركى جۇرتى ءۇشىن ماڭىزدى كەسەنەنى ەرەكشە كۇزەتپەن قامتاماسىز ەتۋ سۇرالعان.
«تەراكت جاساۋ ارەكەتى اقپان ايىندا بولدى. مەن ءوزىم باق-تاعى اقپاراتتىڭ ارقاسىندا ءبىلدىم. مەنىڭ مالىمەتىم بويىنشا, مۇنداي ارەكەتتى تاجىكستان ازاماتى, شەتەلدىڭ ازاماتى جاساماق بولعان كورىنەدى. ول باسقا اعىمنىڭ جاقتاۋشىسى بولۋى مۇمكىن. نەگە مۇنداي ارەكەتكە بارعانىن بىلمەيمىن, ايتا المايمىن. ءبىز ۇكىمەتكە كەسەنەنى ستراتەگيالىق نىساندار تىزىمىنە قوسۋدى سۇراپ حات جولدادىق. تىزىمگە ەنگىزىلگەننەن كەيىن ارنايى كۇزەتپەن قامتاماسىز ەتىلىپ, قاۋىپسىزدىك شارالارى جۇرگىزىلەدى», دەدى دارحان ساتىبالدى.