سەنات توراعاسى ماۋلەن اشىمباەۆ 2024-2026 جىلدارعا ارنالعان رەسپۋبليكالىق بيۋدجەت جانە ۇلتتىق قوردان كەپىلدەندىرىلگەن ترانسفەرت تۋرالى زاڭداردى قاراۋ بارىسىندا ماسەلە كوتەردى, دەپ حابارلايدى Egemen.kz جوعارعى پالاتانىڭ ء باسپاسوز قىزمەتىنە سىلتەمە جاساپ.
سەنات سپيكەرى پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆتان بيزنەستىڭ دامۋ قارقىنى تومەندەيتىن بولسا, سالىق تۇسىمدەرىنىڭ قاجەتتى كولەمى قالاي قامتاماسىز ەتىلەتىنىن, قوسىلعان قۇن سالىعى بيۋدجەتكە تۇسەتىن سالىق تۇسىمدەرىنىڭ ماسەلەسىن قانشالىقتى شەشەتىنىن سۇرادى. م.اشىمباەۆ قاراشا ايىنىڭ باسىنا دەيىن جينالادى دەپ جوسپارلانعان 11 ترلن تەڭگەدەن 9,6 ترلن تەڭگەسى جينالعان.
«بيىل شامامەن 14 تريلليون سالىق ءتۇسىمى جوسپارلانعان ەدى. ارينە, ناقتى كورسەتكىش بۇدان تومەن بولۋى مۇمكىن. وسى جاعدايدا كەلەسى جىلعا, 2024 جىلدىڭ بيۋدجەتىنە ءبىز شامامەن 16 تريلليون تەڭگە كولەمىندە سالىق ءتۇسىمىن سالامىز. ياعني, بۇل وتە ماڭىزدى ءوسىم بولىپ وتىر. سالىقتى اكىمشىلەندىرۋ سالىقتىڭ ءبىر بولىگىن قامتاماسىز ەتۋگە ءتيىس. بىراق سالىق تۇسىمدەرىن تاعى قالاي قامتاماسىز ەتۋ جوسپارلانۋدا؟ ءبىزدىڭ ويىمىزشا, ءسىزدىڭ جاۋابىڭىزدا ول سالىقتى كوتەرۋ ارقىلى بولادى. قازىر وسى تۋرالى ايتىلىپ وتىر. بىراق بيۋدجەتكە سالىق تۇسىمدەرى ماسەلەسىن شەشۋگە قوسىلعان قۇن سالىعىنىڭ ءوسىمى قانشالىقتى كومەكتەسەدى؟ وسىعان بايلانىستى سىزدە 2024 جىلعى بيۋدجەتكە 16 تريلليون تەڭگە كولەمىندە سالىق تۇسىمدەرىن قامتاماسىز ەتۋگە بايلانىستى قانداي دا ءبىر پىسىقتالعان ۇستانىمدار بار ما؟ بۇل قالاي قامتاماسىز ەتىلەدى؟» دەپ سۇرادى م.اشىمباەۆ.