پانامادا World Robot Olympiad ءوتتى. ەل تاريحىندا تۇڭعىش رەت وتاندىق ءۇش كوماندا WRO تۇعىرىنا كوتەرىلىپ, قورجىن ەكى كۇمىس, ءتورت قولامەن تولىقتى.
World Robot Olympiad – بۇكىل الەم بويىنشا روبوتتەحنيكا مەن STEM ءبىلىم بەرۋ جۇيەسىن دامىتاتىن جاھاندىق وليمپيادا. دۇنيەجۇزىلىك دوداعا قازاقستان كومانداسى بيىل بەسىنشى رەت قاتىسىپ وتىر. ەل قۇراماسى WRO ەل چەمپيوناتىنىڭ قورىتىندىسى بويىنشا جاساقتالعان. ەلورداداعى «Robotek» مەكتەبىنىڭ وقۋشىلارى ءامىر قاراباەۆ پەن اڭسار ساۋىرباەۆ «Future Engineers» كاتەگورياسى بويىنشا WRO-2023 كۇمىس جۇلدەسىن قانجىعالارىنا بايلادى. سونداي-اق ۆاگيز ديسەمباەۆ پەن جانارىس قاپاروۆ ەل قورجىنىن قولامەن تولىقتىردى. قىزىلوردا قالاسىنداعى نازارباەۆ زياتكەرلىك مەكتەبىنىڭ وقۋشىلارى ماكسيم ۋسولتسەۆ پەن دىنمۇحامەد ابديەۆ «Robomission» كاتەگورياسى بويىنشا ءۇشىنشى ورىن الدى.
«بۇل مەنىڭ وسىنداي حالىقارالىق جارىسقا ەكىنشى كەلۋىم. وسىعان دەيىن دورتمۋندتا بولعان سايىسقا قاتىسقانمىن. شىنىمدى ايتسام, بيىل ءوزىمدى ەركىن ءارى سەنىمدى ۇستادىم. جارىستىڭ ءبىرىنشى كۇنى-اق جاقسى ناتيجە كورسەتتىم. جالپى, روبوتتەحنيكادا ەڭ باستىسى لوگيكا مىقتى بولۋى كەرەك», دەيدى جەڭىمپاز جانارىس قاپاروۆ.
پانامادا وتكەن جىلدىڭ باستى جارىسىندا 81 ەل باق سىنادى. قاتىسۋشىلاردى قولداۋعا وتكەن جىلى دورتمۋندتا WRO ەستافەتاسىن قابىلداعان پانامانىڭ ءبىرىنشى حانىمى يازمين كولون كارتيزو كەلدى. قازاقستان جاساعان ستەندتە يازمين كولون كارتيزو ءبىزدىڭ جىگىتتەرگە ساتتىلىك تىلەگەن دە بولاتىن. دۇنيەجۇزىلىك روبوتتەحنيكا وليمپياداسىنىڭ جاھاندىق كۇن ءتارتىبى ادام مەن روبوت ىنتىماقتاستىعىن تابىستى جانە قاۋىپسىز ەتۋ ماسەلەسىنە ارنالعان. WRO-نىڭ نەگىزگى تاقىرىپتارى ءداستۇرلى تۇردە بۇۇ-نىڭ تۇراقتى دامۋ ماقساتتارىمەن بايلانىستى. 2023 جىلعا ارنالعان تاقىرىپ الەم ەلدەرىنە ورتاق – «Connecting the World», «الەمدى بايلانىستىرامىز». كوماندالار تسيفرلىق يندۋستريا ءۇشىن ينفراقۇرىلىم مەن لوگيستيكانى جاسايتىن روبوتتارمەن جۇمىس ىستەدى.
«الەمنىڭ تۇكپىر-تۇكپىرىنەن كەلگەن وقۋشىلاردىڭ تالابى بيىك, ىنتاسى جوعارى. ەل مويىنداعان زەرەك بالالار جارىسقا بار كۇش-جىگەرىن سالىپ كەلدى. ءبىر ماقسات جولىندا, جەڭىس ءۇشىن كەلگەن بالالاردىڭ تالابى كوڭىل كونشىتەدى», دەيدى قازاقستان قۇراماسىنىڭ باپكەرى ميراس مۇراتحانوۆ.
ءۇش كۇن بويى World Robot Olympiad الەمدىك فينالىندا وتاندىق قۇلتەمىر قۇراستىرۋشىلار بىرەگەي شىعارماشىلىق, ينجەنەرلىك شەشىمدەر مەن جەڭىسكە دەگەن سەنىمدىلىگىمەن كوزگە ءتۇستى. جالپى ەسەپتە قازاقستان قۇراماسى مالايزيا قۇراماسىنا عانا ەسە جىبەرىپ, ەكىنشى ورىنعا كوتەرىلدى. ايتا كەتەيىك, قازاقستان تۋىنىڭ بايراقتى باسەكەدە ءۇش رەت جەلبىرەۋى تسيفرلاندىرۋ جانە اقپاراتتىق تەحنولوگيالار كۇنىنە سايكەس كەلگەن بولاتىن.
پانامادا وتكەن بۇكىلالەمدىك روبوتتەحنيكا وليمپياداسى اياسىندا ەلوردالىق «Robotek» كومپانياسى امەريكا قۇراما شتاتتارى, قىتاي مەن ازەربايجاننىڭ تانىمال روبوتتەحنيكا مەكتەپتەرى, كلۋبتارىمەن ىنتىماقتاستىق تۋرالى مەموراندۋمدارعا قول قويدى. «الداعى ۋاقىتتا قازاقستانمەن بىرلەسىپ جۇمىس ىستەۋگە نيەتتىمىز. سەبەبى قازاق وقۋشىلارى وتە تالانتتى. بۇگىنگى جارىستا ءبىزدى ءتانتى ەتتى», دەدى ۇيىمداستىرۋشى ۋيليام ۋونگ.
World Robot Olympiad باس حاتشىسى كلاۋس كريستەنسەن «Robotek» مەكتەبىنىڭ ەلدەگى WRO, STEM ءبىلىم بەرۋ جانە روبوتتەحنيكانىڭ جاھاندىق ميسسياسىن ىلگەرىلەتۋ بويىنشا اۋقىمدى جوبالارىن جوعارى باعالادى. كلاۋس كريستەنسەن ينفورماتيكا مۇعالىمدەرى مەن مەكتەپ وقۋشىلارىن وقىتۋعا جانە روبوتتەحنيكاعا قىزىعۋشىلىقتى ارتتىرۋعا ارنالعان تانىمال «Ozyq Urpaq» جوباسىن ەرەكشە اتاپ ءوتتى.
روبوتتەحنيكا – زياتكەرلىك اۆتوماتتاندىرىلعان تەحنيكالىق جۇيەلەردى ازىرلەيتىن, ونى وندىرىسكە ەنگىزەتىن قولدانبالى عىلىم. بۇل عىلىمدى دامىتۋ ەلدى تسيفرلاندىرۋدى جەدەلدەتەدى.