پورتۋگاليانىڭ كالداش-دا-راينيا قالاسىندا ءداستۇرلى ART&TUR حالىقارالىق تۋريستىك كينوفەستيۆالى ءوتىپ, وندا قازاقستان ءتۋريزمى تۋرالى تۇسىرىلگەن بەينەروليك ەكى اتالىم بويىنشا ۇزدىك دەپ تانىلدى.
بيىل 16-رەت ۇيىمداستىرىلعان كينوفەستيۆالدا Kazakhstan – Like Never Before ساياحات تۋرالى وتاندىق بەينەروليك «ۇزدىك ەلدىك روليك» جانە «ۇزدىك جارناما كومپانياسى» اتالىمدارى (Destination – Countries, Advertising Campaign) بويىنشا جەڭىمپاز اتاندى.
Kazakh Tourism ۇلتتىق كومپانياسى جاساعان Kazakhstan – Like Never Before بەينەروليگىندە وتاندىق, قاتار مەن بەلگيا ترەۆەل-بلوگەرلەرىنىڭ تۇركىستان قالاسى مەن الماتى وبلىسىنا جاساعان ساياحاتتارى كورسەتىلىپ, ەلىمىزدى جاڭا قىرىنان تانۋعا شاقىرادى.
«بۇل روليك – ەلىمىزدىڭ تاڭعاجايىپ تابيعاتى مەن مادەني مۇراسىنا شەتەلدىك تۋريستەردىڭ نازارىن اۋدارۋ ءتاسىلىمىزدىڭ جۇزەگە اسقانىنىڭ ايقىن كورىنىسى. بايقاۋ ۇيىمداستىرۋشىلارى تاراپىنان بەرىلگەن جوعارى باعا ەلىمىزدىڭ الەم تۋريستەرى الدىندا وتە قىزىقتى مەكەن ەكەنىن جانە بەينەروليكتىڭ وتە ساپالى ءارى كرەاتيۆتى جاسالعانىن تاعى دا دالەلدەدى», دەپ اتاپ ءوتتى تۋريزم جانە سپورت ۆيتسە-ءمينيسترى ەرجان ەركىنباەۆ.
بەينەروليكتى دايىنداۋمەن ادىلەت راحمەتوللا جانە كونستانتين كيكۆيدزە باستاعان وتاندىق بىرىككەن شىعارماشىلىق توپ اينالىستى.
بايقاۋعا الەم بويىنشا ءتۇرلى جوبالار ۇسىنىلىپ, جارنامالىق كومپانيالار, جارنامالىق فيلمدەر, انيماتسيالار, اۆتورلىق ساياحات بەينەروليكتەرى, دەرەكتى فيلمدەر, ۆەب-قۇجاتتار جانە تەلەباعدارلامالار سياقتى اتالىمدار بويىنشا ۇزدىكتەر انىقتالدى.
حالىقارالىق بايقاۋدىڭ قازىلار القاسى قۇرامىنا اۋديوۆيزۋالدى كينو, تۋريزم, ماركەتينگ جانە كوممۋنيكاتسيا سالاسىنداعى ماماندار مەن ساراپشىلار كىردى.
بۇل – قازاقستاننىڭ اتالعان الاڭداعى العاشقى جەتىستىگى ەمەس. 2021 جىلعى فەستيۆال اياسىندا Kazakh Tourism ۇلتتىق كومپانياسى جاساعان Travelstan بەينەروليگى ۇزدىك جارناما روليگى اتالىمىندا ۇزدىك دەپ تانىلعان ەدى. ال وتكەن جىلى «توماس پەن ليۋسي اتكينسونداردىڭ قازاقستانعا كوزقاراسى» كوممۋنيكاتسيالىق جوباسى ەكىنشى ورىنعا يە بولدى.