ۇلتتىق نەيروحيرۋرگيا ورتالىعىنىڭ دارىگەرلەرى ءبىر جارىم جاستاعى بالاعا كۇردەلى وپەراتسيا جاساپ, ميىنداعى ىسىكتى الىپ تاستادى. بۇل وپەراتسيا ءمامس جۇيەسى اياسىندا جۇزەگە استى.
ناۋقاستىڭ اناسىنىڭ ايتۋىنشا, بالا ءبىر جاسقا دەيىن قاتارلاستارىنان قالماي, تولىققاندى ءوسىپ كەلە جاتقان. بىراق ارادا كوپ ۋاقىت وتپەي اۋرۋدىڭ العاشقى بەلگىلەرى بايقالا باستايدى. اناسى ۇلىنىڭ سەبەپسىز جىلاپ, مازاسىزداناتىنىن, كوز ۇياشىعى قوزعالىسىنىڭ بۇزىلۋىن, مەزگىل-مەزگىل قۇساتىنىن, سول قولى مەن اياعىنىڭ السىزدىگىن بايقايدى.
سودان اناسى №2 قالالىق بالالار اۋرۋحاناسىنا قارالۋعا بارادى. وندا بالانى نەيروحيرۋرگتەر قاراپ, مرت زەرتتەۋ جۇرگىزگەن. مرت ناتيجەلەرى بويىنشا بالادا وڭ جارتىشاردىڭ ساماي-ماڭداي-توبە بولىكتەرىندە جانە وڭ جاق قارىنشانىڭ پروەكتسياسىندا ورنالاسقان 7 سم ۇلكەن مي ىسىگى انىقتالادى.
جەدەل ەمدەۋ ءۇشىن بالا ۇلتتىق نەيروحيرۋرگيا ورتالىعىنا جىبەرىلدى. بالالار نەيروحيرۋرگياسى بولىمشەسىنىڭ مەڭگەرۋشىسى عابيت ولەڭبايدىڭ ايتۋىنشا, ىسىكتىڭ كولەمى وتە ۇلكەن (6,5ح6, 8ح7,1 سم), بالا ميىنىڭ جارتىسىنا جۋىعىن الىپ جاتىر جانە ميدىڭ فۋنكتسيونالدى ماڭىزدى ايماقتارىندا ورنالاسقان. سوندىقتان وپەراتسيا وتە كۇردەلى ءوتىپتى. سونىمەن قاتار اۋىر اسقىنۋلارعا اكەلۋى مۇمكىن وپەراتسيالىق قان جوعالتۋ قاۋپى جوعارى بولعان.
ء«بىز ميدىڭ جارتىشارىنداعى ساماي-ماڭداي-توبە بولىكتەرىندە كولەمدى تۇزىلگەن ىسىكتى ميكروحيرۋرگيالىق جولمەن الىپ تاستادىق. وپەراتسيا كەزىندە بارلىق زاماناۋي ءادىس قولدانىلدى. سونداي-اق قىزمەتكەرلەردىڭ جوعارى بىلىكتىلىگى مەن ورتالىقتىڭ وپەراتسيالىق بلوگىنىڭ جوعارى دەڭگەيدە جابدىقتالۋى دا وپەراتسيانىڭ ءساتتى وتۋىنە ىقپال ەتتى. قازىرگى ۋاقىتتا بالا وپەراتسيادان كەيىنگى ەمنەن ءوتىپ, اناسىمەن بىرگە پالاتاعا شىعارىلدى», دەدى ع.ولەڭباي.
وسى ورايدا انەستەزيولوگتەردىڭ جوعارى كاسىبيلىگىن اتاپ ءوتۋ كەرەك. مۇنداي كىشكەنتاي جاستاعى بالاعا وپەراتسيا جاساۋدا انەستەزيا بەرۋدىڭ قيىندىقتارى بارشىلىق. قان, تىنىس الۋدى مۇقيات باقىلاۋ, انەستەزيانى وتە ىجداعاتتى ەسەپتەۋ, جالپى بالانىڭ ءومىرى ءۇشىن ۇلكەن جاۋاپكەرشىلىك نەيروحيرۋرگتەردىڭ, انەستەزيولوگتەردىڭ, ترانسفۋزيولوگتەردىڭ, ورتا جانە كىشى مەديتسينالىق قىزمەتكەرلەردىڭ موينىندا بولدى.
وپەراتسيانى پروفەسسور, ۇعا اكادەميگى سەرىك اقشولاقوۆ, جوعارى بىلىكتى نەيروحيرۋرگ-دارىگەر, بالالار نەيروحيرۋرگياسى بولىمشەسىنىڭ مەڭگەرۋشىسى, «ۇنو» اق پروفەسسورى عابيت ولەڭباي, نەيروحيرۋرگ دارىگەر ساپاربەك سەيىتبەكوۆ جاسادى. سونداي-اق وپەراتسيا بارىسىندا انەستەزيولوگ-رەانيماتولوگ دارىگەر جۇمادۋللا شاديەۆ, مەيىرگەر انەستەزيولوگ جانار ارىنوۆا, ترانسفۋزيولوگ دارىگەر ەربول قۋانىشەۆ جانە وپەراتسيا مەيىرگەرى ارايلىم چامكاروۆالار بولدى.