جۋىردا باس قالا جۇرگىزۋشىلەرى كوگىلدىر وتىن تاپشىلىعىنا شاعىمدانعان ەدى. وسى تۇستا ەنەرگەتيكا ءمينيسترى الماسادام ساتقاليەۆ استانادا گاز تاپشىلىعى نەدەن بولعانىن ءتۇسىندىرىپ بەردى, دەپ حابارلايدى Egemen.kz.
ءمينيستردىڭ ايتۋىنشا, قازاقستاندا سۇيىتىلعان مۇناي گازىنىڭ باعاسى اي-92 بەنزينى مەن ديزەل وتىنىمەن سالىستىرعاندا ايتارلىقتاي تومەن. بۇل اۆتوموبيلدەردى جانارمايدىڭ وسى تۇرىنە جاپپاي كوشىرۋگە سەبەپ بولدى. ونىڭ ۇستىنە جۇرگىزۋشىلەردىڭ باسىم بولىگى كولىكتەرىن گازعا اۋىستىرا باستادى.
«ەنەرگەتيكا مينيسترلىگى بۇل رەسۋرس ەلىمىزدە شەكتەۋلى ەكەنىن بىرنەشە رەت مالىمدەگەن, تۇتىنۋدىڭ مۇنشالىقتى ءوسۋىن قاناعاتتاندىرۋعا جەتكىلىكسىز. ءبىز بۇل تۋرالى كولىك يەلەرىنە الدىن الا ەسكەرتتىك», دەدى الماسادام ساتقاليەۆ.
رەسمي دەرەككە سايكەس, جىل باسىنان بەرى سۇيىتىلعان مۇناي گازىن تۇتىنۋ 25%-دان استامعا وسكەن. ەندى قالىپتاسقان تاپشىلىقتى جويۋ ءۇشىن مينيسترلىك تاراپىنان ءتيىمدى شارالار قابىلدانعانى ورىندى.
«تاپشىلىقتى جابۋ ءۇشىن بىرقاتار شارا قابىلدادىق. ماسەلەن, تشو شامامەن 66 پايىزىن ىشكى نارىققا جىبەردى. ءبىز «قازمۇنايگازدان» اي سايىن 10 مىڭ كولەم الىپ وتىردىق, ياعني, ولاردىڭ بارلىق كولەمىن ىشكى نارىققا شىعاردىق. الايدا رەسۋرس شەكتەۋلى. قازىر سۇيىتىلعان مۇناي گازىن ءوندىرۋ دەڭگەيىندە بالانس ۇستاپ وتىرمىز. ەگەر مۇناي وڭدەۋ زاۋىتتارىنىڭ بىرىنە جوندەۋ جۇرگىزىلسە, كولەمدەر ەل بويىنشا قايتا بولىنەتىنى جانە ولاردى قولمەن باسقارۋعا تۋرا كەلەتىنى انىق. استانادا وسى جاعداي بولدى», دەپ ءتۇسىندىردى مينيستر.