كوستەنكو اتىنداعى شاحتاداعى ورتتەن قازا تاپقان تاعى ءبىر ادامنىڭ ءمايىتى تابىلدى. بۇل تۋرالى قاراعاندى وبلىسىنىڭ اكىمى ەرماعانبەت بولەكپاەۆ ايتتى, دەپ حابارلايدى Egemen.kz.
«كوستەنكو شاحتاسىندا 33 كەنشىنىڭ ءمايىتى تابىلدى, 13 ادام ىزدەستىرىلىپ جاتىر. اقپارات تۇسكەن ساتتەن باستاپ ءبىز بارلىق قىزمەتتىڭ ارەكەتىن ۇيلەستىرۋ ءۇشىن جەدەل شتاب قۇردىق. 252 كەنشىنىڭ 208-ءى جەر بەتىنە شىعارىلدى, ولاردىڭ 18-ءى مەديتسينالىق كومەككە جۇگىندى», دەدى اكىم ءباسپاسوز ءماسليحاتىندا.
ونىڭ ايتۋىنشا, زارداپ شەككەندەر قازىر دارىگەرلەردىڭ باقىلاۋىندا.
ەسكە سالايىق, «ارسەلورميتتال تەمىرتاۋ» اق-عا قاراستى كوستەنكو شاحتاسىنان ورت شىقتى. پرەزيدەنت ۇكىمەتكە «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋدى تاپسىردى. باس پروكۋراتۋرا اتالعان ىسكە قاتىستى سوتقا دەيىنگى تەرگەپ-تەكسەرۋدى باستادى. مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن قاراعاندى وبلىسىندا «ارسەلورميتتال تەمىرتاۋ» اق-نىڭ كوستەنكو اتىنداعى شاحتاسىندا ورىن العان اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى. مەملەكەت باسشىسى قاسىم-جومارت توقاەۆ اپاتتىڭ ءمان-جايىن انىقتاپ, ءتيىستى شەشىم قابىلداۋ ءۇشىن قاراعاندى وبلىسىنداعى قايعىلى وقيعا ورىن العان جەرگە باردى. 29 قازان ەلىمىزدە جالپىۇلتتىق ازا تۇتۋ كۇنى دەپ جاريالاندى.