قۇتقارۋشىلار كۇنى قارساڭىندا كەشە استاناداعى ۇركەر شاعىن اۋدانىندا ءورت ءسوندىرۋشى اسقار زابيكۋلين اتىنداعى كوشە اشىلدى, دەپ حابارلايدى Egemen.kz استانا قالاسىنىڭ تجد ءباسپاسوز قىزمەتىنە سىلتەمە جاساپ.
بۇعان دەيىن مەملەكەت باسشىسىنىڭ تاپسىرماسىمەن استانا قالاسى ءماسليحاتىنىڭ 2023 جىلعى 19 قاڭتارداعى شەشىمىمەن استانا قالاسىنداعى كوشەلەردىڭ بىرىنە ءورت ءسوندىرۋشى اسقار زابيكۋليننىڭ ەسىمى بەرىلىپ, ەستەلىك تاقتايشا ورناتىلعان ەدى. كەشە كوشەنىڭ سالتاناتتى اشىلۋ ءراسىمى ءوتتى. وعان باتىردىڭ تۋىستارى, جۇبايى مەن بالالارى, توتەنشە جاعدايلار دەپارتامەنتىنىڭ قىزمەتكەرلەرى قاتىستى. ولار ەرلىكپەن قازا تاپقان ءورت ءسوندىرۋشىنى ەسكە الىپ, جاڭادان اشىلعان كوشەنىڭ بويىندا اعاش وتىرعىزدى.
ەسكە سالايىق, اسقار زابيكۋلين وتكەن جىلى قىزمەتتىك مىندەتىن اتقارۋ كەزىندە 3 ادامدى ورتتەن قۇتقارىپ, العان جاراقاتىنان اۋرۋحانادا كوز جۇمعان ەدى. مارقۇمنىڭ ارتىندا جۇبايى مەن ەكى بالاسى قالدى.