پرەمەر-مينيستر ءاليحان سمايىلوۆ تۇركىستان وبلىسىنا بارعان جۇمىس ساپارى بارىسىندا زاماناۋي كوپبەيىندى اۋرۋحانا قۇرىلىسىمەن تانىستى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
570 توسەك-ورىندىق زاماناۋي كوپبەيىندى وبلىستىق اۋرۋحانا قۇرىلىسى جۇمىسىنىڭ قازىرگى كەزدە شامامەن 50%-ى اياقتالعان. نىساننىڭ پايدالانۋعا بەرىلەتىن مەرزىمى كەلەسى جىلدىڭ جەلتوقسان ايىنا جوسپارلانعان.
ءاليحان سمايىلوۆ تۇركىستان وبلىسىندا 2 ملن-نان استام ادام تۇراتىنىن, سوندىقتان جاڭا الەۋمەتتىك نىسانداردى ىسكە قوسۋدىڭ ماڭىزدىلىعىن اتاپ ءوتتى.
«بۇل – وتە ماڭىزدى جوبا. وڭىردە سىرقاتتار سانى كوبەيىپ وتىر, مۇنداعى اۋرۋحانالار تاپشىلىعىن كورىپ وتىرمىز. سوندىقتان جوبانى مەملەكەتتىك-جەكەمەنشىك ارىپتەستىك شەڭبەرىندە كەشىكتىرمەي ىسكە قوسۋ ماڭىزدى. تەحنيكالىق ماسەلەلەرگە كەلسەك, مۇنى دەنساۋلىق ساقتاۋ مينيسترلىگىمەن بىرلەسىپ پىسىقتاپ, جىل سوڭىنا دەيىن كەلىسىمدى بەكىتۋ كەرەك», دەدى ۇكىمەت باسشىسى.
بۇل رەتتە ول «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وبلىستا 49 جاڭا العاشقى مەديتسينالىق-سانيتاريالىق كومەك كورسەتۋ نىسانىن سالۋ جانە 4 اۋداندىق اۋرۋحانانى جاڭعىرتۋ جوسپارلانىپ وتىرعانىن ەسكە سالدى.
«جالپى, دەنساۋلىق ساقتاۋ سالاسىنداعى بارلىق نىساندار مينيسترلىكتىڭ باقىلاۋىندا بولۋى جانە ۋاقتىلى ىسكە اسىرىلۋى ءتيىس», دەپ تۇيىندەدى پرەمەر-مينيستر.