ەڭبەكشىقازاق اۋدانىنىڭ تۇرگەن اۋىلىنداعى م.ۆ.لومونوسوۆ اتىنداعى مەكتەپ پەن اقشي اۋىلىندا ورنالاسقان بولەك باتىر مەكتەبىنىڭ «جاس بۇركىت» اسكەري-پاتريوتتىق كلۋبىنىڭ وقۋشىلارى 6654 اسكەري بولىمىنە كەلىپ, قۇقىقتىق ءتارتىپ اسكەرىنىڭ ومىرىمەن تانىستى.
«جاس بۇركىت» اسكەري-پاتريوتتىق كلۋبىنىڭ ماقساتى – وسكەلەڭ ۇرپاقتىڭ بويىنا وتانسۇيگىشتىك سەزىمىن قالىپتاستىرۋ جانە ولاردىڭ تۋعان جەرگە, ەلگە دەگەن سۇيىسپەنشىلىگىن وياتۋ. اسكەري كلۋبتىڭ قىزمەتىنە, سونداي-اق جاستاردى پاتريوتتىق رۋحتا تاربيەلەۋ ىسىنە 6654 اسكەري ءبولىمى كومانديرىنىڭ تجاقج جونىندەگى ورىنباسارى, پولكوۆنيك جاندوس كولباەۆتىڭ دا قوسقان ۇلەسى زور. ءىس-شارا اياسىندا جاندوس جامال ۇلىنىڭ ۇيىمداستىرۋىمەن مەكتەپ وقۋشىلارىنا ارناپ سپورتتىق ءىس-شارالار ءوتىپ, اسكەري تەحنيكالىق, قارۋ-جاراق كورمەسى تانىستىرىلدى.
– تاربيە – وتباسىنان باستالادى. «ۇيادا نە كورسەڭ, ۇشقاندا سونى ىلەرسىڭ» دەگەن ماقال وسى ءسوزىمىزدىڭ دالەلى. «جاس بۇركىت» اسكەري-پاتريوتتىق كلۋبىنىڭ وقۋشىلارىن اسكەري بولىمدە كورگەنىمىزگە وتە قۋانىشتىمىز. سەبەبى جاس ۇرپاقتىڭ بويىنا پاتريوتتىق سەزىمدى قالىپتاستىرىپ, ولاردى ەڭبەككە, وتاندى سۇيۋگە باۋلۋ – ءبىزدىڭ مىندەتىمىز. ەلىنە ادال قىزمەت ەتەتىن جاستاردى تاربيەلەۋ – باستى مۇددەمىز. كلۋبتىڭ دا كوزدەگەن ماقساتى سول, – دەگەن پولكوۆنيك ج.كولباەۆ 6654 اسكەري ءبولىمى اسكەري-پاتريوتتىق كلۋب باسشىلىعىمەن تىعىز قارىم-قاتىناس جاسايتىنىن جانە ءارى قاراي دا جەمىستى ەڭبەك ەتە بەرۋگە مۇددەلى ەكەنىن جەتكىزدى.
– وقۋشىلاردىڭ اسكەري ومىرگە دەگەن قىزىعۋشىلىقتارى جانارلارىنان بايقالىپ تۇر, ولار ءۇشىن بارلىعى قىزىق. «قارۋ-جاراقتى قالاي پايدالانۋ كەرەك؟», «اسكەري تەحنيكانىڭ قىزمەتى قانداي؟» دەگەن سۇراقتار قويىپ, پىكىرتالاس ءوربىتتى. «اسكەري كيىم كيگەن كەزدە بويىمىزدا ماقتانىش سەزىمى پايدا بولادى» دەپ سەزىمدەرىمەن ءبولىسىپ جاتقان بالالاردى كورگەن ساتتە ولارمەن اتقارىلاتىن جۇمىستىڭ ءساتتى بولاتىنىنا سەنىمىم مول. سوندىقتان مۇنداي ءىس-شارالاردى ءجيى ۇيىمداستىرىپ تۇرۋ قاجەت, – دەدى ول.
قۇرالاي جۇماقىزى
الماتى وبلىسى