الەم چەمپيوناتىنىڭ ءۇش دۇركىن جۇلدەگەرى اۋىلدا سيىر ساۋىپ, اساۋ ۇيرەتەدى

– كوپ اتا-انا بالالارىنىڭ ءىرى دودالارداعى ايقاسىن  تاماشالاۋعا كەلگەندە دەگبىرى قاشاتىنى بەلگىلى. «بالاسى اتقا شاپسا, اناسى ۇيدە وتىرىپ تاقىم قىساتىن» ەلمىز. ەگىز قىزىڭىزدىڭ سىڭارى ءجاميلانىڭ  جازعى ازيا ويىندارىنداعى بەلدەسۋىن تاماشالاداڭىز با؟

– بۇرىن قارايتىنمىن,  كەيىنگى كەزدە اسىرەسە  بيىل سەربيادا وتكەن الەم چەمپيوناتىنان كەيىن كورمەيتىن بولدىم. اناسى مەن ۇلىم  تىكەلەي ەفيردەن  قالت جىبەرمەي تاماشالايدى. ال مەن قىزدارىم كىلەمگە شىعاتىن كۇنى اللادان جاردەم, كۇش-قۋات سۇراپ, مەشىتكە بارىپ دۇعا تىلەپ سىرتتا جۇرەمىن. بەلدەسۋىن سوڭىرا يۋتۋبتان كورەم. قىركۇيەك ايىندا سەربيانىڭ استاناسى بەلگرادتا وتكەن الەم چەمپيوناتىنىڭ جارتىلاي فينالىندا موڭعول قىزىنا ەسە جىبەردى. ونى ءجاميلا بۇعان دەيىن ءۇش رەت ايقىن ۇتقان بولاتىن. كەيىن ءوزى دە ايتتى, سول  بەلدەسۋدە ول  فينالعا شىققان اقش  بالۋانىن ويلاپ ابدىرادى. ويتكەنى بىلتىرعى الەم چەمپيوناتىنىڭ فينالىندا امەريكالىق بالۋانعا ەسە  جىبەرىپ, كۇمىس مەدالدى مىسە تۇتتى. ەسەمدى قايتسەم دە   قايتارامىن دەپ ءجۇرىپ  جارتىلاي فينالدا  موڭعول قىزىمەن كۇرەستە اسىعىپ تا كەتتى.   

– ءجاميلا سەربيادا وتكەن الەم چەمپيوناتىندا قولا مەدال  ولجالادى. ارادا ەكى اپتا وتەر-وتپەس ۋاقىتتا ازيا چەمپيوناتىنىڭ فينالىنا جەتتى. يىعىنداعى جاراقاتىنان قۇلان-تازا ايىقپاعان سەكىلدى.

– ءيا, وڭ يىعىنىڭ جاراقاتى بار. ونىڭ ۇستىنە بۇرىن 72 كەلى سالماقتا كۇرەستى, قىتايداعى ازيا ويىندارىنا 76 كەلىدە قاتىستى. بۇل  وليمپيادالىق سالماق سانالعاندىقتان مىقتىنىڭ ءبارى وسىندا. فينالدىق بەلدەسۋىن كەيىن قايتالاپ تا كوردىم, جاڭا سالماق دارەجەسىنە اۋىسقانى ايقىن بايقالىپ تۇردى. مۇمكىن كۇشى جەتپەي قالعان شىعار, ايتپەسە جىعاتىن زور مۇمكىندىگى بولدى.  

– ەرتەرەكتە الەۋمەتتىك جەلىدە ءجاميلانىڭ سيىر ساۋىپ وتىرعان بەينەجازباسى تارادى. ەگىز قىزدارىڭىزدى ءۇي شارۋاسىنا سالاتىن سياقتىسىز. ازيانىڭ ءۇش دۇركىن چەمپيونى, دۇنيە  چەمپيوناتىنىڭ ءۇش  مارتە جۇلدەگەرىن «جۇمساۋ» قيىندىق تۋدىرماي ما؟

– ەڭ ءبىرىنشى مادينا مەن ءجاميلا – مەنىڭ قىزدارىم. مەيلى ول وليمپيادانى ءۇش مارتە ۇتسىن, الەم چەمپيوناتىندا ون رەت جەڭىسكە جەتسىن, مەن ءۇشىن بالام عانا. شىنىن ايتقاندا بالالارىمنىڭ  سپورتتاعى جەتىستىگىنەن گورى كەلەشەكتە وتباسىنىڭ ۇيىتقىسى بولىپ, ساليقالى ۇرپاق ءوسىرىپ, ەلگە تۇلعا بولار ازاماتتار تاربيەلەسە, مەن ءۇشىن  سول ماقتانىش. قىز قوناق قاشاندا. ەرتەڭ بۇلار جات شاڭىراقتىڭ بوساعاسىن اتتاپ كەلىن اتانادى. سول كەزدە ءۇيدىڭ شارۋاسىن ىستەي بىلمەسە وزىنە سىن ەمەس پە؟ اناسىنىڭ تاربيەسى سولاي, ەكەۋى دە  بالا كۇنىنەن ءۇيدىڭ  تىرشىلىگىن اتقارىپ ءوستى. ءتىپتى اساۋ ۇيرەتكەن جاستايىنان. 25 جىلداي بولدى, جىلقى وسىرەمىز. ءجاميلا دا ءمادينا دا جەتكىنشەك شاعىندا باستىقپاعان اساۋدى وزدەرى ۇستاپ ۇيرەتىپ جۋاسىتىپ الاتىن. ءاربىر اتا-انا قىزدى دا, ۇلدى دا ەڭ الدىمەن ادام ەتىپ تاربيەلەۋگە ءتيىس دەپ سانايمىن. سپورتشىعا ەڭ اۋەلى مىنەز كەرەك. ءاليحان بوكەيحانوۆ  اتامىز ايتپاقشى, «ۇلتقا قىزمەت ەتۋ بىلىمنەن ەمەس, مىنەزدەن» قاشاندا. ءوزىم دە 17 جىل فۋتبول وينادىم, 22 جىل الماتى قالاسىنىڭ وليمپيادالىق رەزەرۆىن دايارلاۋ مەكتەبىن باسقاردىم. سوندىقتان سپورتتىڭ قانداي اۋىر جول ەكەنىن جەتە بىلەمىن. قىزدارىمنىڭ دا  وسى اۋىر جولدى تاڭداپ, سپورتتى سەرىك ەتۋى مىنەزىنەن دەپ سانايمىن.

– ءجاميلا وليمپيادالىق سالماققا اۋىستى. 

– ءيا, ازىرگە سالماعى جەتىڭكىرەمەيدى. ونىڭ ۇستىنە 76 كەلى وليمپيادا باعدارلاماسىنا ەنگەن سالماق بولعاندىقتان دۇنيەنىڭ ءتورت تارابىنداعى مەن دەگەن مىقتىنىڭ ءبارى بار. سولارمەن تايتالاسا ءجۇرىپ كەلەسى جىلى وتەتىن پاريج وليمپياداسىنا قاتىسىپ, ەلىمىزدى قۋانتۋعا بار كۇشتى سالامىز.