قر ەنەرگەتيكا ءمينيسترى الماسادام ساتقاليەۆ KazEnergy XV ەۋرازيالىق فورۋمى بارىسىندا جانار-جاعارماي باعاسى تۋرالى ءسوز قوزعادى, دەپ حابارلايدى Egemen.kz.
بۇگىن XV KazEnergy ەۋرازيالىق فورۋمى اياسىندا وتكەن بريفينگ بارىسىندا قر ەنەرگەتيكا ءمينيسترى الماسادام ساتقاليەۆ قازاقستاندا بەنزين باعاسىنىڭ الداعى بولجامى قولايلى ەكەنىن اتاپ ءوتتى.
«الداعى ۋاقىتتا بەنزيننىڭ قىمباتتاۋىنا ەش سەبەپ جوق. ايتا كەتسەم, قازاقستاندا سۇرانىس پەن تۇتىنۋ تەڭگەرىلدى, ديزەل وتىنىنا قاجەتتى مۇناي ونىمدەرىنىڭ قورى قالىپتاستىرىلدى. ەلدە جانارماي تاپشىلىعى بولجانىپ وتىرعان جوق», دەپ سەندىردى الماسادام ساتقاليەۆ.
الايدا مينيستر نارىقتا بەلگىلى ءبىر تاۋەكەلدەر بار ەكەنىن دە جوققا شىعارمادى.
«دەسە دە يمپورتتىق جانارماي باعاسى قىمباتتاۋى مۇمكىن, بۇل ىشكى نارىقتاعى باعالارعا پروپورتسيونالدى اسەر ەتەدى.قازىر ءبىز قازاقستان رەسپۋبليكاسىندا وندىرىلەتىن ونىمدەرگە ەرەكشە نازار اۋدارىپ وتىرمىز», دەپ قوستى ا.ساتقاليەۆ.