كوكشەتاۋدا اقان سەرى قورامسا ۇلىنىڭ 180 جىلدىعى مەن ءيمانجۇسىپ قۇتپان ۇلىنىڭ 160 جىلدىعىنا ارنالعان «ارقانىڭ ءان دارياسى» رەسپۋبليكالىق ءداستۇرلى انشىلەر بايقاۋى ءوتتى.
كەربەز كوكشە توپىراعىندا دۇنيەگە كەلىپ, ونەر ءورىسىنىڭ قازاق دالاسىندا وركەن جايۋىنا ولشەۋسىز ۇلەس قوسقان تۇعىرى بيىك, رۋحى ءورشىل ارقا ءوڭىرىنىڭ اقيىق دۇلدۇلدەرى – اقان سەرى قورامسا ۇلى مەن ءيمانجۇسىپ قۇتپان ۇلىنىڭ شىعارمالارىن حالىققا كەڭىنەن ناسيحاتتاۋ ماقساتىندا ۇيىمداستىرىلعان بايقاۋعا ەلىمىزدىڭ ءار وڭىرىنەن 12 ءانشى قاتىسىپ, باق سىنادى.
بايقاۋعا ءبىرجان سال اتىنداعى مۋزىكا كوللەدجىنىڭ ديرەكتورى, «مادەنيەت سالاسىنىڭ ۇزدىگى» سايان مۇحامەديار (قازىلار القاسىنىڭ توراعاسى), قازاقستاننىڭ ەڭبەك سىڭىرگەن ءارتىسى, ءداستۇرلى ءانشى بيسارا ماكەنقىزى, قازاقستاننىڭ ەڭبەك سىڭىرگەن قايراتكەرى, ونەر ۋنيۆەرسيتەتىنىڭ دوتسەنتى, ءداستۇرلى ءانشى تولعانباي سەمباەۆ, مالىك عابدۋللين مۋزەيىنىڭ ديرەكتورى, «مادەنيەت سالاسىنىڭ ۇزدىگى», ءداستۇرلى ءانشى كەنجەباي مۇقىشەۆ, اقمولا وبلىستىق حالىق شىعارماشىلىعى جانە مادەني دەمالىس ورتالىعى ديرەكتورىنىڭ مىندەتىن اتقارۋشى اسحات ماعاۋين قازىلىق ەتتى.
ونەرلى دودانىڭ قورىتىندىسى بويىنشا ءىىI دارەجەلى ديپلوم جانە 300 مىڭ تەڭگە اقشالاي سىيلىقپەن اقمولالىق ءانشى ديانا التايقىزى, قىزىلوردالىق نۇرتىلەك اقتاەۆ ماراپاتتالدى. ءىى ورىن مەن 500 مىڭ تەڭگە اقشالاي سەرتيفيكات كوكشەتاۋلىق تولەگەن امانوۆقا بۇيىردى. ال الماتى وبلىسىنىڭ وكىلى ءىدىرباي بايباقتى ءى دارەجەلى ديپلومعا جانە 800 مىڭ تەڭگە اقشالاي سىيلىققا يە بولدى.
«ارقانىڭ ءان دارياسى» رەسپۋبليكالىق ءداستۇرلى انشىلەر بايقاۋىندا ۇزدىك ونەر كورسەتىپ, ورىنداۋشىلىق شەبەرلىگىن تانىتقانى ءۇشىن باس جۇلدە – 1 ملن تەڭگەنىڭ اقشالاي سەرتيفيكاتىنا جانە ۇيىمداستىرۋ القاسىنىڭ ديپلومىنا اباي وبلىسىنان كەلگەن ءانشى تاڭات مۇقىشەۆ لايىق دەپ تانىلدى.
سونىمەن بىرگە بىرقاتار انشىگە ۇيىمداستىرۋ القاسىنىڭ ديپلومى مەن 100 مىڭ تەڭگە اقشالاي سىيلىق بەرىلدى.