پاۆلودار وبلىسىنىڭ اكىمى اسايىن بايحانوۆ ەكىباستۇزدىڭ الداعى جىلۋ ماۋسىمىنا دايىندىعىن تەكسەردى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
«ەكىباستۇز جەو-داعى جوندەۋ جۇمىستارى كەستەگە سايكەس جۇرگىزىلىپ جاتىر. بۇگىنگى تاڭدا 3 ەنەرگەتيكالىق قازاندىق پايدالانۋعا دايىن جانە جىلۋ بەرۋ ماۋسىمى باستالعانعا دەيىن تاعى 3 سۋ جىلىتاتىن قازاندىق اگرەگاتى دايىن بولادى. قالعان 4 قازاندىقتى جوندەۋ قازان ايىنىڭ سوڭىنا دەيىن اياقتاۋ جوسپارلانىپ وتىر. اباي كوشەسىندەگى 3 جىلۋ ماگيسترالىن (№4 مەكتەپتەن مارعۇلان كوشەسىنە دەيىن) قايتا جاڭارتۋ جۇمىستارى تولىعىمەن اياقتالدى. اتالعان 3 ماگيسترال جوعارى قىسىممەن سىناقتان وتكىزىلىپ, قازىر جۋ جۇمىستارى جۇرگىزىلىپ جاتىر. بۇگىن م. ءجۇسىپ كوشەسى بويىنداعى جم-2 ماگيسترالىن (دوستىق دۇكەنىنەن «قازاقستان» كينوتەاترى ايالداماسىنا دەيىن) سىناقتان وتكىزۋ جۇمىستارىنا دا كىرىستى. مۇندا جىلۋ ماگيسترالىندەگى جاڭا جانە ەسكى قۇبىرلاردىڭ تۇيىسكەن جەرىن قوساتىن تىعىزداعىش كومپەنساتور ىستەن شىقتى. قۇبىرلار زارداپ شەككەن جوق. ەرتەڭ تۇسكە دەيىن اقاۋ جويىلادى, سودان كەيىن وسى ماگيسترالدىق جەلىنى سىناۋ جانە جۋ جۇمىستارى قايتا جالعاسادى. كوكتەمگى جانە كۇزگى گيدراۆليكالىق سىناقتاردان كەيىن ەكىباستۇزدىڭ جىلۋمەن جابدىقتاۋ جەلىلەرىندە بارلىعى 388 اقاۋ جويىلدى. قالا تۇرعىندارىنان كەلىپ تۇسكەن وتىنىشتەر بويىنشا ورامىشىلىك جىلۋ جەلىلەرىندەگى 14 پروبلەمالىق ۋچاسكەنى جوندەۋ جۇمىستارى جۇرگىزىلىپ جاتىر. ءوڭىر باسشىسى جم-1 جانە جم-3 جىلۋ ماگيسترالدارىن قايتا جاڭارتۋ ءۇشىن جوبالىق-سمەتالىق قۇجاتتامانى دايىنداۋدى تاپسىردى. ويتكەنى, بۇعان دەيىن 1973 جىلى سالىنعان اتالعان ماگيسترالدىڭ م.ءجۇسىپ كوشەسى بويىنداعى ۋچاسكەسىندە اقاۋ ورىن العان بولاتىن. جۇمىستار جۇرگىزۋ بارىسىندا ماماندار قۇبىر مەتالىنىڭ 3 مم-گە دەيىن جۇقارعانىن انىقتادى», دەلىنگەن حابارلامادا.
ا.بايحانوۆ جاڭادان تارتىلعان جەلىلەردى جوعارى قىسىممەن تەكسەرىپ, اقاۋ شىقسا جوندەپ, قىسقى ماۋسىمعا دايىندىعىن تەكسەرۋ ماڭىزدى ەكەنىن ايتتى. ەكىباستۇزداعى 690 كوپقاباتتى تۇرعىن ءۇيدىڭ 665-ءى جىلۋدى قابىلداۋعا تولىقتاي دايىن. 25 تۇرعىن ۇيدە ىشكى جىلىتۋ جۇيەلەرىن جوندەۋ, جۋ, سىعىمداۋ جۇمىستارى اياقتالىپ كەلەدى.
«1 قازاننان باستاپ ەكىباستۇزدا جىلۋ بەرۋ ماۋسىمىن باستاۋ جوسپارلانىپ وتىر. جىلۋدى قابىلداۋعا دايىندىق بويىنشا بارلىق جۇمىستار ۋاقىتىندا جانە بارىنشا ساپالى ورىندالۋى قاجەت. كوممۋنالدىق قىزمەتتەر تاۋلىك بويى جۇمىس رەجيمىنە كوشۋى كەرەك. جىلۋمەن جابدىقتاۋدى باستاۋ ءبىر بولەك, الايدا, جۇيەنى تەڭدەستىرۋ دە ماڭىزدى. جىلۋ جەلىلەرى قىزمەتتەرى مەن قالالىق تۇرعىن ءۇي ينسپەكتسياسى ءبولىمى تاراپىنان ىشكى جىلۋمەن جابدىقتاۋ جۇيەلەرىن رەتتەۋ جانە شەتكى ۇيلەردەگى گيدراۆليكالىق پارامەترلەردى تەڭدەستىرۋ بويىنشا ۇيلەسىمدى جۇمىس قاجەت», دەگەن اسايىن بايحانوۆ بىلتىرعىداي كەلەڭسىزدىك قايتالانباۋىن قاتاڭ تاپسىردى.