شىمكەنت قالاسىندا ورتالىق «Aq meshit» مەشىتى اۋلاسىندا ورنالاسقان ستۋدەنتتەر ءۇيىنىڭ اشىلۋ سالتاناتى ءوتىپ, وعان قازاقستان مۇسىلماندارى ءدىني باسقارماسىنىڭ توراعاسى ناۋرىزباي قاجى تاعان ۇلى ارنايى قاتىستى, دەپ حابارلايدى Egemen.kz.
يگى ءىس-شارادا باسقارما توراعاسى ن.تاعان ۇلى ستۋدەنتتەر ءۇيىنىڭ اشىلۋى ەرەكشە وقيعا ەكەنىن اتاپ ءوتتى. ەلىمىزدەگى بارشا ءدىن قىزمەتكەرلەرىنە جولداعان باعدارلىق بايانداماسىندا رەسپۋبليكالىق ماڭىزى بار 3 قالا مەن وبلىس ورتالىقتارىنان الەۋمەتتىك از قامتىلعان وتباسىلاردان شىققان ستۋدەنتتەرگە ارناپ قايىرىمدىلىق تۇرعىسىندا ءمۇفتيات جاتاقحانالارىن اشۋدى تاپسىرعانىن ايتتى. قازىرگى تاڭدا جاتاقحانا تاپشىلىعى قوعامداعى كۇردەلى ماسەلەگە اينالعانىن, قالاعا وقۋ ىزدەپ كەلگەن جەتكىنشەكتەر ءۇشىن جاتاقحانا اۋاداي قاجەت ەكەنىن تىلگە تيەك ەتتى.
«اسىرەسە الەۋمەتتىك جاعدايى تومەن وتباسىلاردان شىققان ستۋدەنتتەر ءۇشىن پاتەر جالداۋ – قيىننىڭ-قيىنى. بۇل جاتاقحاناعا كوپبالالى وتباسىدان شىققان, اتا-اناسىنان ايىرىلعان ستۋدەنتتەر قابىلدانادى. جاتاقحانادا شاكىرتتەردىڭ الاڭسىز ءبىلىم الۋىنا جاعداي جاسالعان, مۇنداي عيماراتتار ەلىمىزدىڭ ءار وڭىرىنەن اشىلىپ, ەلىمىزدە جاتاقحانا تاپشىلىعى ازاياتىنىنا سەنەمىن», دەدى ناۋرىزباي تاعان ۇلى.
قمدب توراعاسى سويلەگەن سوزىندە ءبىلىم, ءدىني ءىلىم جولىنداعى جاستارعا كومەكتەسۋ–ۇلكەن ساۋاپتى ءىس ەكەنىن اتاپ, ءبىلىم جولىنداعى جاستارعا كومەكتەسۋدى پايعامبارلىق مارتەبەدەن كەيىنگى ورىنعا قويعان عۇلاما يبن مۋباراكتىڭ ءسوزىن مىسالعا كەلتىردى.
ء«بىلىم الۋشىعا كومەكتەسۋ دەگەنىمىز–ىلىم ۇيرەنۋشى ادامنىڭ ساۋابىنداي ساۋاپقا كەنەلۋ دەگەن ءسوز. اللا تاعالا يگى ىسكە ۇلەس قوسقان بارشا ازاماتقا مول ساۋاپتان جازسىن», دەدى باس ءمۇفتي ناۋرىزباي قاجى تاعان ۇلى.
ستۋدەنتتەر ۇيىنە جەرگىلىكتى جوعارى وقۋ ورىندارىنان قابىلدانعان 10 ستۋدەنتتىڭ تاماعى جانە جاتىن ورىندارى اقىسىز قامتىلعان.